ЯтӀонэрэ Самуел 11

ЯпшӀыкӀузэнэрэ шъхьэр

Имышъузэу БатщэбаӀ Даут зэрэкӀыгъугъэр

1Гъатхэм икъихьагъум, пачъыхьэхэр заом зыщыкӀорэм, идзэкӀолӀ пащэхэмрэ зэкӀэ израилылӀхэмрэ Иоаб игъусэхэу Даут заом зегъакӀохэм Ӏамонхэм атекӀохи, Раббэ къалэ къадзыхьагъ; ау ежь Даут Ерыусэлэм къыдэнэгъагъ.

2Мафэ горэм, пчыхьэм фигъэзагъэу, Даут гъолъыпӀэм къытетэджыкӀыжьыгъэу, пачъыхьэ унэм ышъхьагъ тетэу тезэкӀухьэзэ, унашъхьэм къызеплъыхым, бзылъфыгъэу зызгъэпскӀрэр къылъэгъугъ; а бзылъфыгъэр нэр пӀэпихэу дэхэ дэдагъ. 3Арти бзылъфыгъэр зыщыщыр къызэрагъэшӀэнэу Даут ыӀофытагъэхэти, ЕлыӀам ыпхъоу, хъыт лъэпкъым щыщ Урый ишъуз БатщэбаӀ арэу къэбар къыфахьыжьыгъ. 4Ар къыфащэнэу Даут иӀумэтхэр лъигъэкӀуагъэх; арти ар ащ дэжь къэкӀуагъ, ар ащ кӀыгъугъ. Бзылъфыгъэ хабзэу къыфэкӀогъагъэм ыуж зыгъэкъэбзэжьыгъо мафэхэри блэкӀыгъэхагъ. ЕтӀанэ ащ ядэжь къыгъэзэжьыгъ. 5Бзылъфыгъэр лъэрмыхьэ хъугъэти, Даут дэжь ыгъакӀохи раригъэӀуагъ: «Лъэрмыхьэ сыхъугъ».

6Арти Даут Иоаб дэжь ыгъакӀохи раригъэӀуагъ: «Хъыт лъэпкъым щыщ Урый къысфэгъакӀу». Иоаб Даут дэжь Урый ыгъэкӀуагъ. 7ЕтӀанэ Урый ащ ыдэжь къэкӀуагъэти, Иоаб изытети, дзэкӀолӀхэм язытети, заор зэрэкӀорэми Даут акӀэупчӀагъ. 8Даут Урый риӀуагъ: «Шъуадэжь кӀожьи зыгъэпсэф». Урый пачъыхьэм иунэ къикӀыжьыгъ, пачъыхьэм ишӀухьафтынхэр ащ кӀэлъахьыгъэх. 9Ау Урый изиусхьан иухъумакӀохэм ягъусэу пачъыхьэм иунэ ихьапӀэ дэжь чэщыр щырихыгъэ нахь ядэжь кӀожьыгъэп. 10Урый ядэжь мыкӀожьыгъэу аӀуи Даут къэбар къызыфахьым, Даут Урый еупчӀыгъ: «Гъогум укъытекӀыжьыгъэба, сыд пае шъуадэжь умыкӀожьыгъа?» 11Ащ ипэгъокӀэу Урый Даут къыриӀожьыгъ: «Тхьэм ипхъонтэ лъапӀи, Израили Ехъуди ядзэкӀолӀхэр чэтэнгъэӀагъэхэм ачӀэсхэу, сиӀэшъхьэтетэу Иоаби, сизиусхьан идзэкӀолӀхэри шъофым итхэу тадэжь сыкӀожьынышъ, сышхэщт, сешъощт, сишъуз сыкӀыгъущт арба! О узэрэщыӀэр, упсэ зэрэщыӀэр сэӀо, ау ар сшӀэщтэп». 12Арти Даут Урый риӀуагъ: «Непи мыщ къанэ, неущ устӀупщыжьыщт». А мафэми къыкӀэлъыкӀогъэ мафэми Урый Ерыусэлэм къыдэнэгъагъ. 13ЕтӀанэ Даут ар къыригъэблэгъагъэти, Урый ащ дэжь щышхагъ ыкӀи щешъуагъ, оутэшъофэ Даут ар ригъэшъуагъ. Ау пчыхьэм Урый изиусхьан ипщылӀхэм ягъусэу игъолъыпӀэ екӀужьи чъыежьыгъэ нахь ядэжь кӀожьыгъэп.

Даут Урый зэраригъэукӀыгъэр

14Пчэдыжьым Даут тхылъыпӀэ тхьапэм тетхи, ар Урый рити Иоаб фыригъэхьыгъ. 15А тхылъыпӀэм тыритхагъ: «КъыщауӀэу, хэкӀодэным пае, заом ианахь жъотыпӀэ горэм Урый Ӏужъугъэуцуи, шъо шъукъызэкӀэкӀожь». 16Арти къалэр аштэн зэхъум, Иоаб заор анахь зыщыхьылъэн ылъэкӀыщтыр ешӀэти, Урый ащ ыгъэкӀуагъ. 17Къалэм дзэкӀолӀхэр къыдэкӀхи Иоаб къезэуагъэх, Даут идзэкӀолӀмэ ащыщхэр ащ дэжьым хэкӀодагъэх; джащ фэдэу хъытэу Урыий къыщаукӀыгъ. 18ЕтӀанэ заор зэрэкӀуагъэм икъэбар зэрэщытэу лъагъэӀасынэу Иоаб Даут дэжь ыгъэкӀуагъэх. 19ЫӀофытагъэм фигъэпытэзэ мырэущтэу риӀуагъ: «Заор зэрэкӀуагъэм икъэбар фэпӀотэгъахэу, 20пачъыхьэр зэрэгубжыщтым гу лъыптэу, „Сыд пае шъуязэонэу къалэм ащ фэдизэу благъэу шъуекӀолӀэгъагъа? Идэпкъхэм къарадзыххэзэ къызэрэшъутырадзэщтхэм шъущыгъозагъэба? 21ЕрыубэӀал ыкъо Абимэлэх хэта зыукӀыгъэр? Бзылъфыгъэм мыжъо шъхьал къутафэр дэпкъым къыридзыхи ащ къызтырегъафэм ыужба ар етӀанэ Тэбэц зыщылӀэжьыгъэр? Сыда ащ фэдизэу благъэу дэпкъым шъузкӀекӀолӀэгъагъэр?“ къызыуиӀокӀэ, о еӀожь: „УиӀумэтэу хъытэу Урыий джащ фэдэу щыӀэжьэп“».

22Арти Иоаб иӀофтабгэ кӀуи, зыфигъэкӀуагъэр зэкӀэ Даут фынигъэсыгъ, заор зэрэкӀуагъэм икъэбари зэрэщытэу фиӀотагъ#11:22 Мы чӀыпӀэм мыщ фэдэ къэӀуакӀи иӀ: [Арти Даут Иоаб фэгубжи къаӀофтагъэм риӀуагъ: «Сыд пае шъузэонэу къалэм благъэу шъуекӀолӀэгъагъа? Хьауми дэпкъхэм къяоххэзэ шъукъызэрэхагъэфэщтыр шъушӀагъэба? Хэта ЕрыубэӀал ыкъо Абимэлэх зыукӀыгъэр? Бзылъфыгъэп шъуӀуа шъхьал къутафэр дэпкъым къезыдзыхи ащ къытезгъэфагъэр, етӀанэ ар Тэбэц щылӀэжьыгъэба? Сыд пае благъэу дэпкъым шъуекӀолӀэгъагъа?»] Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп.. 23АӀофтагъэм Даут риӀуагъ: «Ӏамон дзэкӀолӀхэр къыттекӀощтыгъэх, къытэзэонхэуи шъофым къихьэгъагъэхэти, етфыжьэхи къалэм идэхьэпӀэ къэлапчъэ нэс тфыжьыгъэх. 24Ащ дэжьым дэпкъым тетыгъэ псэгъаохэр уидзэкӀолӀхэм къызяохэм пачъыхьэм идзэкӀолӀмэ ащыщ горэхэр хэкӀодагъэх; джащ фэдэу уиӀумэт хъытэу Урыий хэкӀодагъ». 25Ащ ыуж Даут Ӏофтабгэм риӀуагъ: «Иоаб мыщ фэдэу еӀу: „Къэхъугъэм земыгъэгъэгумэкӀ, сыда пӀомэ модрэр мыдрэр ыӀоу чатэм зэхэдз ышӀырэп; къалэм пэшӀуекӀорэ заор гъэлъэши зэхэкъут“. Ар еӀуи, ыгу къыдэщай».

26ИлӀ зэрэщымыӀэжьыр Урый ишъуз зызэхехым хьадагъэ ышӀыгъ. 27Шъыгъон уахътэр ащ зеухым лъигъакӀохи Даут ыдэжь ар къаригъэщагъ, ишъуз хъуи, шъао къыфилъфыгъ. Ау Даут аущтэу зэришӀыгъэр Зиусхьаным ыгу рихьыгъэп.

Currently Selected:

ЯтӀонэрэ Самуел 11: АдыТГ

Highlight

Copy