Апэрэ Самуел 6
6
Яхэнэрэ шъхьэр
Фылистхэм Израилым и-Тхьэ ипхъонтэ лъапӀэ ичӀыпӀэ зэрахьыжьыгъэр
1Зиусхьаным ипхъонтэ лъапӀэ мэзиблэ фылист хэкум щыӀагъ#6:1 Мы чӀыпӀэм мыщ фэдэ къэӀуакӀи иӀ: [а чӀыпӀэр цыгъохэм зэлъакӀугъ]. Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп.. 2Фылист цӀыфхэм якъурмэнышӀхэмрэ усэрэжъхэмрэ къызэӀуагъакӀэхи яупчӀыгъэх: «Зиусхьаным ипхъонтэ лъапӀэ сыда етпэсыщтыр? Ар ичӀыпӀэ зэрэнэдгъэсыжьыщт шӀыкӀэм тыщыжъугъэгъуаз». 3Адрэхэм къаӀуагъ: «Израилым и-Тхьэ ипхъонтэ лъапӀэ къыздырахыгъагъэ чӀыпӀэм яжъугъэхьыжьыщтмэ, зыгорэ ешъумыпэсэу яшъумыгъэхьыжь, псэкӀодэу шъушӀагъэм пае псэкӀодышӀыкӀэгъожь къурмэн зышъушӀыкӀэ, шъухъужьынышъ, Тхьэм ынае къызкӀышъущыфагъэри къыжъугурыӀожьыщт». 4Арти цӀыфхэр къэупчӀагъэх: «ПсэкӀодышӀыкӀэгъожь къурмэнэу сыда тшӀыщтыр?» Адрэмэ къараӀожьыгъ: «Фылист Ӏэшъхьэтетхэр нэбгырэ пчъагъэу зэрэхъурэм телъытагъэу пкъышъолхэм къахигъэбэгыкӀыгъэхэм ятеплъэ зиӀэ дышъитфырэ дышъэ цыгъуитфырэ яжъугъэшӀ. ШъуиӀэшъхьэтетхэми шъори зэкӀэми зэфэдэу пщыныжь къышъуфехыгъэшъ ары. 5Арышъ, шъупкъышъолмэ къахигъэбэгыкӀыгъэхэмрэ шъуигубгъохэр зэхэзышхыхьэгъэ цыгъохэмрэ ятеплъэ яӀэу шъушӀи, Израилым и-Тхьэ рыжъугъэлъапӀэу фэжъугъэшъуашэх. Ащ шъуихьазаб нахь псынкӀэ къышъуфишӀынышъ, шъуитхьэхэми шъуичӀыгуи ынэшӀу къащыфэнкӀи мэхъу. 6Сыд пае мысыр цӀыфхэмрэ фирхьаунхэмрэ афэдэу шъугухэмкӀэ зыжъугъэжъалымра? Зиусхьаным ыкӀуачӀэ зынэсырэр къызарегъашӀэм, къамытӀупщыжьыщтыгъэхэр шъхьафит къашӀыжьхи, ахэм яхэгъэгу къагъэзэжьыгъ. 7Арышъ, зы кукӀэ къэжъугъэпс, бжьыр зыпшъэ нэмысыгъэ чэм щыпэлъфитӀу кум кӀашъушӀ, шкӀэу акӀэсхэр къакӀэшъущхи, ядэжь шъущэжьых. 8Зиусхьаным ипхъонтэ лъапӀэ кум ижъугъэуцуи, шъуихьакъкӀэ Зиусхьаным къурмэн фэшъушӀыщт дышъэ пкъыгъохэр нэмыкӀ пхъуантэ дашъулъхьэхи, ыбгъукӀэ къыгожъугъэуцуи, кур шъутӀупщи, зыфаем орэкӀо. 9Шъулъыплъ, пхъуантэр къыздыращыгъэ чӀыпӀэм, Бэтщэмэщ ылъэныкъокӀэ кум занкӀэу зигъазэкӀэ, ащыгъум Тхьэр ары мы тхьамыкӀэгъошхор къытфезыгъэхыгъэр. Ащ фэдэу зымыхъукӀэ Тхьэм ар къызэрэтфимыхьыгъэр, ошӀэ-дэмышӀэу къызэрэтэхъулӀагъэр къытфэнэфэщт». 10Фылистмэ джащ фэдэу ашӀыгъ: чэм щыпэлъфитӀу къаубыти кум кӀашӀагъэх, шкӀэу акӀэсыгъэхэр къакъырэм къычӀанагъэх. 11Зиусхьаным ипхъонтэ лъапӀи дышъэ цыгъохэмрэ апкъышъолхэм къахигъэбэгыкӀыгъэхэм ятеплъэ зиӀэхэмрэ зыдалъхьэгъэ пхъуантэри кум рагъэуцуагъэх. 12Чэмхэм Бэтщэмэщ кӀорэ гъогум фаузэнкӀыгъ; а гъогум тетхэу кӀощтыгъэх, кӀохэзэ быущтыгъэх, ау джабгъумкӀи сэмэгумкӀи дэхыщтыгъэхэп; фылист Ӏэшъхьэтетхэр ахэм ауж итхэу кӀохэзэ, Бэтщэмэщ иӀэгъо-блэгъухэм анэсыгъэх.
13Бэтщэмэщ щыщ цӀыфхэм а уахътэм коцыр лъэгум щахыщтыгъ, плъэхи Зиусхьаным ипхъонтэ лъапӀэ къызалъэгъум, гушӀуагъэх. 14Кур къакӀозэ, Бэтщэмэщ щыщ Ехъошыуа ичӀыгу Ӏахьэ къэси, ащ хэлъ мыжъошхом дэжь къыщыуцугъ. Кур гъэстыныпхъэу зэхакъутагъ, чэмэу ащ кӀэшӀэгъагъэхэр Зиусхьаным къурмэнгъэст фашӀыгъэх. 15Зиусхьаным ипхъонтэ лъапӀи дышъэм хэшӀыкӀыгъэ пкъыгъохэр зыдэлъыгъэри лэуйхэм#6:15 Лэуйхэр – джуртхэм якъурмэнышӀ лъэпкъэу Тхьэм ипхъонтэ лъапӀэ зезыхьэщтыгъэхэр ары; егъапш: Мосэ ияплӀэнэрэ тхылъ 3:6-8. къаӀатхи джа мыжъошхом тырагъэуцуагъэх. А мафэм Бэтщэмэщ дэсхэм Зиусхьаным ыцӀэкӀэ къурмэнгъэстхэри нэмыкӀ къурмэнхэри ашӀыгъэх. 16Фылист Ӏэшъхьэтетитфым а зэпстэур алъэгъуи, а мэфэ дэдэм Ӏэкърэн къагъэзэжьыгъ.
17Апкъышъолхэм къахигъэбэгыкӀыгъэхэм ятеплъэ зиӀэ дышъитфыр псэкӀодышӀыкӀэгъожь къурмэнэу фылистхэм Зиусхьаным фашӀыжьыгъэх: зыр Ащдэд, зыр Ӏаззэ, зыр Ашкъэлэн, зыр Гъат, зыр Ӏэкърэн пае; 18джащ фэдэу дышъэм хэшӀыкӀыгъэ цыгъохэри пытапӀэхэр зиӀэ фылист къалэхэмрэ къэмышӀыхьэгъэ къуаджэхэмрэ зыӀэ илъыгъэ Ӏэшъхьэтетитфым ателъытэгъагъ. Бэтщэмэщ дэсхэм Зиусхьаным ипхъонтэ лъапӀэ зытырагъэуцогъэгъэ мыжъошхор непэ къызнэсыгъэми Бэтщэмэщ щыщ Ехъошыуа ичӀыгу Ӏахьэ зэрэхэлъ.
Тхьэм ипхъонтэ лъапӀэ Къыриат-ЕӀэрим зэрагъэкощыжьыгъэр
19 # 6:19 Мы чӀыпӀэм мыщ фэдэ къэӀуакӀи иӀ: [БэтщэмэщылӀхэм ащыщэу Ехъоный ыкъохэу Зиусхьаным ипхъонтэ лъапӀэ теплъагъэхэм зыгъэгушӀонхэ къяхъулӀагъэп]. Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп. Зиусхьаным ипхъонтэ лъапӀэ зэрэдэплъагъэхэм пае Бэтщэмэщ дэсхэм Зиусхьаным ынае къащыфагъэти, нэбгырэ мин 50-м щыщэу нэбгырэ 70 ыукӀыгъ. Зиусхьаным бэлахьышхо къызэрафыригъэхыгъэм пае Бэтщэмэщ дэс цӀыфхэм хьадэгъэшхо къаӀэтыгъ. 20Бэтщэмэщ дэс цӀыфхэр къэупчӀагъэх: «Хэта Зиусхьаным, Тхьэу лъапӀэу лъагэм, ыпашъхьэ иуцон зылъэкӀыщтыр? Тэ зыхядгъэщыжьмэ, хэт дэжь Ар ядгъэхьыщта?» 21Арти къэбарыр алъагъэӀасынэу Къыриат-ЕӀэрим дэсхэм адэжь лӀыкӀохэр агъэкӀуагъэх: «Зиусхьаным ипхъонтэ лъапӀэ фылист цӀыфхэм къарагъэхьыжьыгъэшъы, шъукъакӀуи, ар шъуадэжь шъухьыжь».
Currently Selected:
Апэрэ Самуел 6: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
