Апэрэ Самуел 7
7
Яблэнэрэ шъхьэр
1Къыриат-ЕӀэрим дэсхэр къакӀохи Зиусхьаным ипхъонтэ лъапӀэ къашти, Абинэдау иунэу Ӏуашъхьэм тетым къахьыгъ, ащ ыкъо ЕлыӀазер зырагъэукъэбзи Зиусхьаным ипхъонтэ лъапӀэ ынаӀэ тыригъэтынэу пшъэрылъ фашӀыгъ.
2Пхъонтэ лъапӀэр Къыриат-ЕӀэрим къызагъэкощыжьым ыуж охътабэ тешӀагъ, илъэс 20 фэдиз горэ блэкӀыгъ. Израилым ицӀыфхэм Зиусхьаным зыфагъэзэжьыгъ.
Самуел Израилым ихьыкумышӀ зэрэхъугъэр
3ЕтӀанэ Самуел израил цӀыф пстэумэ ариӀуагъ: «Хэмэ тхьэхэри Астарти#7:3 Астарт – Астартрэ БэӀалрэ КъокӀыпӀэ Благъэм щыпсэущтыгъэ ижъырэ лъэпкъхэр тхьэу зэлъэӀущтыгъэхэм ащыщых. Астарт гъэбэжъугощагъ, БэӀал ощхымрэ хыоешхомрэ ятхьэу алъытэщтыгъ. къэшъубгынэхи, шъугухэмкӀэ Зиусхьаным зыфэжъугъаз, а зы закъом шъуфэлажь, джары фылистхэм шъуащызыухъумэщтыр». 4Арти израил цӀыфхэм БэӀалрэ#7:4 БэӀал – егъапш Астарт. Астартрэ щагъэзыехи, Зиусхьан закъом зыфагъэзэжьыгъ. 5Ащ ыуж Самуел макъэ ыгъэӀугъ: «Израил цӀыфхэр зэкӀэ Мыцпэ къыщызэӀужъугъакӀэхи, шъощ пае зэкӀэми Зиусхьаным селъэӀущт». 6Арти Мыцпэ къыщызэӀукӀагъэх. КъызэӀукӀагъэхэм псыр къахьи, апсэ Зиусхьаным зэрэфагъазэрэм ищысэу чӀыгум щыракӀутыгъ, а мафэми анэкӀыгъ. ЕтӀанэ аӀуагъ: «Зиусхьаным ыпашъхьэ псэкӀод щытшӀагъ». Ӏэшъхьэтетэу Самуел Мыцпэ къыщызэӀукӀэгъэ израил цӀыфхэр хьыкум ышӀыгъэх.
7Израил цӀыфхэр Мыцпэ къызэрэщызэӀукӀагъэхэм икъэбар фылистхэм зызэхахым, фылист Ӏэшъхьэтетхэр Израилым къытебэнэнхэу къежьагъэх. Израил цӀыфхэм ар зызэхахым фылистхэм ащыщтагъэх. 8Арти ахэм Самуел раӀуагъ: «Фылистхэм тащиухъумэнэу ти-Зиусхьанэу Тхьэм тэщ пае зэпымыоу тфелъэӀу»#7:8 Мы чӀыпӀэм мыщ фэдэ къэӀуакӀи иӀ: [Арти Самуел ыӀуагъ: «Си-Зиусхьанэу Тхьэр къэсыбгынэнэуи, шъощ пае Тхьэм семылъэӀунэуи Тхьэм ерэмышӀ!»] Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп..
9Самуел быдзыщэм джыри ешъорэ шъынэр Зиусхьаным пае къурмэнгъэст ышӀи, Израилым пае Зиусхьаным зелъэӀум, Зиусхьаным ар къызэхихыгъ. 10Самуел къурмэнгъэстыр ышӀызэ фылистхэр Израилым къезэонхэу къэсыгъэх. Зиусхьаным а мафэм мэкъэшхохэр къыгъэӀузэ, фылистхэр лъэшэу къыгъэщтагъэхэти, шъхьэджэ-псаджэу ахэм Израилыр къабгынагъ. 11Израил цӀыфхэм зэоныр Мыцпэ щырагъажьи фылистхэм язаохэзэ, ахэр къызэкӀафэхи, Бэткъар чӀыпӀэм нэс къафхи, щызэхакъутагъэх.
12ЕтӀанэ Самуел зы мыжъо горэ къышти Мыцпэрэ Ешанрэ азыфагу щигъэтӀылъыгъ, «Мы чӀыпӀэм нэс Зиусхьаныр къыддэӀэпыӀагъ» ыӀозэ, АбэнхъаӀэзэркӀэ#7:12 АбэнхъаӀэзэрым къикӀырэр – ӀэпыӀэгъум имыжъу. ащ еджагъ. 13Джащ тетэу фылистхэр агъэӀэсагъэх, ащ нахьыбэрэ ахэр Израилым ичӀыгу къихьажьыгъэхэп, Самуел щэӀэфэ фылистхэр Зиусхьаным иунашъо пэшӀуекӀошъугъэхэп. 14Фылистхэм Ӏэкърэн къыщегъэжьагъэу Гъат нэс щаштэгъэгъэ къалэхэр Израилым къызӀэкӀигъэхьажьхи, ахэм ягъунапкъэхэри фылистхэм къаӀэкӀихыжьыгъэх. Ащ ыуж Израилрэ амэрхэмрэ мамырныгъэ зэдыряӀагъ.
Самуел Израилым ихьыкумышӀ
15Самуел щэӀэфэ Израилым ихьыкумышӀщтыгъ. 16Илъэс зэкӀэлъыкӀохэм къакӀоцӀ къалэхэу Бэтэл, Гъылгъал, Мыцпэ ащ къызэпикӀухьэхэзэ, а чӀыпӀэ пстэуми израил цӀыфхэм ящыхьыкумышӀщтыгъ. 17ЕтӀанэ Рамэ къыгъэзэжьыщтыгъ, сыда пӀомэ иунэ ащ дэтыгъ. Мыщи израил цӀыфхэм ящыхьыкумышӀщтыгъ. А къалэми Зиусхьаным ыцӀэкӀэ къурмэншӀыпӀэ ащ щишӀыгъ.
Currently Selected:
Апэрэ Самуел 7: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
