Апэрэ Самуел 5
5
Ятфэнэрэ шъхьэр
Тхьэм ипхъонтэ лъапӀэ фылистхэм бэлахь къызэрафихьыгъэр
1Фылистхэм Тхьэм ипхъонтэ лъапӀэ АбэнхъаӀэзэр къыращи къалэу Ащдэд къащагъ. 2Фылистхэм Тхьэм ипхъонтэ лъапӀэ тхьэу Дагон ыцӀэкӀэ агъэуцугъэ унэм рахьи Дагон исынэ кӀэрагъэуцуагъ. 3Ащдэд дэсхэр пчэдыжьым жьэу къызэтэджыжьхэм Зиусхьаным ипхъонтэ лъапӀэ ыпашъхьэ Дагон ынэӀу егъэзыхыгъэу чӀыгум телъ. Арти Дагон къаӀатыжьи зыдэщытыгъэ чӀыпӀэм агъэуцужьыгъ. 4КъыкӀэлъыкӀорэ мафэм пчэдыжьым жьэу къызэтэджыжьхэм Зиусхьаным ипхъонтэ лъапӀэ ыпашъхьэ Дагон ынэӀу егъэзыхыгъэу чӀыгум телъ; Дагон ышъхьи ыӀитӀуи гоупкӀыгъэхэу пчъэшъхьаӀум телъыгъэх. Дагон ыпкъ закъо къэнагъ. 5Джащ пае Дагон фэлэжьэрэ къурмэнышӀхэри Дагон иунэу Ащдэд дэтым ихьэрэ пстэури а мафэм къыщегъэжьагъэу джы къызнэсыгъэми ащ ипчъэшъхьаӀу зэрэнэмысынхэм фэсакъхэзэ темыуцохэу елъэбакъох.
6Зиусхьаным ынае Ащдэд дэсхэм къащыфагъ, бэ тхьамыкӀагъоу ахэм къафыригъэхыгъэр, яфэшъуашэм ипэгъокӀэу Ащдэд щыщхэми ащ иӀэгъо-блэгъухэм ащыпсэухэрэми апкъышъолхэм къахигъэбэгыкӀыгъэх#5:6 Мы чӀыпӀэм мыщ фэдэ къэӀуакӀи иӀ: [хэгъэгу кӀоцӀыр цыгъохэм зэлъакӀугъ, къалэр гукӀодыгъом зэлъиштагъ]. Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп..
7Ащдэд дэсхэу хъугъэр зылъэгъугъэхэм аӀуагъ: «Израилым и-Тхьэ ипхъонтэ лъапӀэ тадэжь къанэ хъущтэп, сыда пӀомэ тэри титхьэу Дагони Зиусхьаным ынае къытщыфагъ». 8Фылист иӀэшъхьэтетхэм зэкӀэми макъэ арагъэӀуи, къызэӀуагъакӀэхи яупчӀыгъэх: «Сыда Израилым и-Тхьэ ипхъонтэ лъапӀэ етпэсыщтыр?» Арти Гъат дэсхэм къаӀуагъ: «Израилым и-Тхьэ ипхъонтэ лъапӀэ Гъат къарэщэжь». Израилым и-Тхьэ ипхъонтэ лъапӀэ Гъат къарагъэщэжьыгъ. 9Ар зарагъэщэжьым ыуж Зиусхьаным ынае къалэм къыщыфагъ, дэсхэр гукӀодыгъошхо хэфагъэх, ахэм зэкӀэми, кӀэлэцӀыкӀумэ къащегъэжьагъэу инмэ анэсыжьэу, апкъышъолхэм къахигъэбэгыкӀыгъэх. 10ЕтӀанэ Тхьэм ипхъонтэ лъапӀэ Ашкъэлэн арагъэщагъ. Ашкъэлэн зынагъэсым Ашкъэлэн дэсхэм куо-хьау къаӀатыгъ: «Тэри тлъэпкъи зэрэщытэу тагъэкӀодыным пае Израилым и-Тхьэ ипхъонтэ лъапӀэ къытфахьыгъ». 11Арти макъэ арагъэӀуи фылист Ӏэшъхьэтетхэр зэкӀэ къызэфащэсхи араӀуагъ: «Израилым и-Тхьэ ипхъонтэ лъапӀэ къыздырахыгъэ чӀыпӀэм арэхьыжь, тэри тлъэпкъи темыкӀодылӀэнхэм пае». Сыдэу щытми зэрэкъалэу щынэгъошхом зэлъиштагъ, Тхьэми ынае ащ дэсхэм къащыфагъ. 12Яфэшъуашэм ипэгъокӀэу апкъышъолхэм къахигъэбэгыкӀыгъэх, гуӀэным хэт къэлэдэсхэм ягъог макъэ ошъогум нэс зиӀэтщтыгъэ.
Currently Selected:
Апэрэ Самуел 5: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
