Апэрэ Самуел 23

ЯтӀокӀэнэрэ щырэ шъхьэр

Даут къалэу КъыӀил пыйхэм зэращиухъумагъэр

1Ащ ыуж Даут макъэ къырагъэӀугъ: «Фылистхэр КъыӀил къытебэнагъэх, хьамэщым телъыр зэкӀэ тыращы». 2Арти Даут Зиусхьаным еупчӀыгъ: «СыкӀощта, а фылистхэм сатекӀощта?» Ащ лъыпытэу Зиусхьаным Даут къыриӀожьыгъ: «КӀо, фылистхэм уатекӀонышъ, КъыӀил къэуухъумэщт». 3Ау Даут игъусагъэхэм къыраӀуагъ: «Мыщ, Ехъудэм, тызэрэщыӀэу тэщынэмэ, КъыӀил тыкӀонышъ, фылистмэ ядзэхэм сыдэущтэу тапэуцужьыщта?» 4Арти Даут джыри Зиусхьаным зеупчӀым, Зиусхьаным къыриӀожьыгъ: «Тэджи КъыӀил кӀо, фылистхэр Сэ о пӀэ къислъхьащтых». 5ЕтӀанэ Даут ицӀыфхэр игъусэхэу ежьи, КъыӀил кӀуагъэ, фылистхэм язауи ябылымхэр къызатырехым, ахэр зэхихьаджыхьэхи, КъыӀил дэсхэр Даут псэоу къыгъэнэжьыгъэх.

6Ахъымэлэх ыкъо Абыетар Даут дэжь КъыӀил къызэкӀом, мыжъогъуазэр къыздихьыгъагъ. 7ЕтӀанэ Даут КъыӀил къызэрэсыгъэм икъэбар Саул зынагъэсым, Саул ыӀуагъ: «Тхьэм ар сӀэ къырилъхьагъ, сыда пӀомэ къэлапчъэхэмрэ сэххэмрэкӀэ зэтегъэпытыхьэгъэ къалэм дахьи, ащ зыдишӀыхьажьыгъ». 8КъыӀил зэлъекӀунхэшъ, Даутрэ игъусэхэмрэ ащ къыдамыгъэкӀхэу даубытэнхэм пае, Саул зэрэхэгъэгоу заом рищэжьагъ. 9Даут Саул игухэлъ бзаджэ зыфэдэр къызешӀэм, къурмэнышӀэу Абыетар риӀуагъ: «Мыжъогъуазэр къахь». 10Даут къыӀуагъ: «Израилым и-Зиусхьанэу Тхьэр! Сэщ нахь хэмылъэу КъыӀил къэкӀонышъ, ар зэрипхъонэу Саул гухэлъ зэришӀыгъэм икъэбар уиӀумэт зэхихыгъ. 11Сэррэ сигъусэхэмрэ КъыӀил дэсхэм Саул тыӀэкӀалъхьащта? УиӀумэт къэбар къызэрэлъыӀэсыгъэм фэдэу Саул мыщ къэкӀощта? Израилым и-Зиусхьанэу Тхьэр! УиӀумэт къэбарым щыгъэгъуаз». Арти Зиусхьаным ащ къыриӀуагъ: «КъэкӀощт». 12ЕтӀанэ Даут еупчӀыгъ: «КъыӀил дэсхэм сэррэ сигъусэхэмрэ Саул тыӀэкӀалъхьащта?» «ШъуӀэкӀалъхьащт» ыӀуи, Зиусхьаным къыриӀожьыгъ. 13Ащ ыуж Даути нэбгырэ шъих фэдиз хъоу игъусагъэхэми КъыӀил къабгыни, зызщагъэбылъын лъыхъухэу нэмыкӀ чӀыпӀабэ къызэпакӀухьагъ. Даут КъыӀил къызэрибгынагъэм икъэбар Саул зылъагъэӀэсым, игухэлъ зэблихъужьыгъ.

Даут шъофнэкӀэу Зиф зызэрэщигъэбылъыгъэр

14Даут шъофнэкӀым ит пытапӀэм, шъофнэкӀэу Зиф къэзыуцухьэрэ къушъхьэлъэ хэкум защигъэбылъщтыгъ. Саул мафэ къэс ащ лъыхъущтыгъэ, ау Тхьэм Даут ащ къыӀэкӀигъэхьагъэп. 15Ыпсэ ыгъэгъунэу Саул ыуж къызэрихьагъэм Даут щыгъуазэти, Хъорыш пэмычыжьэу шъофнэкӀэу Зиф итыгъ. 16ЕтӀанэ Саул ыкъо Ионэтан Даут дэжь, Хъорыш, къакӀуи Тхьэр гугъэпӀэшхоу зэрэщытымкӀэ шӀошъхъуныгъэ ригъэшӀи, 17къыриӀуагъ: «Умыщын, сыда пӀомэ сятэу Саул о къыплъыӀэсыщтэп, оры Израилым ипачъыхьащтри, уаужкӀэ сэры ятӀонэрэщтыр; сятэу Саули ащ щыгъуаз». 18Ащ ыуж ахэм Зиусхьаныр яшыхьатэу Ӏуагъэ зэдашӀи, Даут Хъорыш къани, Ионэтан ядэжь кӀожьыгъэ. 19ЕтӀанэ Зиф щыщхэр Саул дэжь, ГъыбӀэ, къакӀохи къыраӀуагъ: «ШъофнэкӀым ит пытапӀэу тадэжькӀэ щыӀэм, Ещымон икъыблэкӀэ щыӀэ Ӏуашъхьэу Хъахыл, Даут зыщегъэбылъы. 20О узщыфаем, пачъыхьэр, кӀо, тэ тиӀофыр ар пачъыхьэм ыӀэ къидгъэхьаныр ары». 21Саул ахэм ариӀуагъ: «Шъугу къызэрэсфэгъурэм пае Зиусхьаным ынэшӀу къышъущэф. 22ШъукӀуи джыри зэ жъугъэунэфы, илъэужхэр къыхэжъугъэщых, зылъэгъугъэхэм шъуяупчӀ, сыда пӀомэ ар тхьагъэпцӀэу къэбархэр зэхэсэхы. 23Зызщигъэбылърэ чӀыпӀэхэр зэкӀэ къызэжъугъашӀи, къэбар шъыпкъэр къысфэшъухьыжьи, сыжъудежьэщт. А лъэныкъом ар щыӀэу къычӀэкӀмэ, ехъуд унагъо пэпчъ ащ сыщылъыхъущт». 24Ащ ыуж ахэр къэтэджыжьхи, Саул нахьи нахь пасэу ахэр Зиф нэсыгъэх. А уахътэм Даутрэ игъусэхэмрэ Ещымон икъыблэ лъэныкъокӀэ щыӀэ шъофнэкӀэу МэӀон зыщагъэбылъщтыгъэ. 25ЕтӀанэ Саулрэ игъусэ цӀыфхэмрэ лъыхъунхэу ащ ыуж ихьагъэх. Ау Даут макъэ рагъэӀугъэти, шъофнэкӀэу МэӀон къымыбгынэу, ащ ит къушъхьэм дэкӀоягъ. Саул ар зызэхехым, Даут шъофнэкӀэу МэӀон къыщиубытынэу лъежьагъ. 26Саул къушъхьэм иадырабгъукӀэ щыӀагъ, Даутрэ игъусэхэмрэ мыдрэ бгъумкӀэ зыщагъэбылъщтыгъэ. Саул ӀэкӀэкӀхэмэ ашӀоигъоу, Даутрэ игъусэхэмрэ гузэжъогъу хэтхэу, елъэкӀонщтыгъэх. Даутрэ игъусэхэмрэ къаубытынхэм пае, Саулрэ кӀыгъухэмрэ ахэм абгъукӀэ къадаухьэщтыгъэ. 27Ащ тефэу Саул дэжь мэкъэгъэӀу горэ къакӀуи къыриӀуагъ: «ПсынкӀэу къэс нахь, фылистхэр тичӀыгу къибэнагъэх». 28Арти Саул Даут ыуж икӀыжьи, фылистхэм апэгъокӀыгъ. Джары а чӀыпӀэм Сэлэ-Гъамэхълэкъоф, ЗыщзэбгъодэкӀыжьыгъэхэ къушъхьэр, зыфиӀорэр цӀэу зыкӀыфаусыгъэр.

Currently Selected:

Апэрэ Самуел 23: АдыТГ

Highlight

Copy