Апэрэ Самуел 22

ЯтӀокӀэнэрэ тӀурэ шъхьэр

КъурмэнышӀхэр зэраукӀыгъэхэр

1Ащ ыуж Даут Гъат къыбгыни Ӏэдулам гъочӀэгъым зыщигъэбылъыгъ. А къэбарыр ышхэмрэ ятэ иунэ исхэмрэ алъыӀэсыгъэти, зэрагъэлъэгъунэу ыдэжь къэкӀуагъэх. 2Къинихьагъу зиӀэхэр зэкӀэ, чӀыфэм зэлъиштагъэхэр, зыгу кӀодыгъэхэр ащ ыдэжь къакӀохи, ахэм яӀэшъхьэтет хъугъэ. Нэбгырэ шъиплӀ фэдиз зэкӀэмкӀи гъусэ ащ къыфэхъугъ.

3ЕтӀанэ Даут а чӀыпӀэр къыбгыни, Мэуаб ит къалэу Мыцпэ кӀуи, мэуаб пачъыхьэм елъэӀугъ: «Тхьэм къысипэсыгъэр зэсэгъэшӀэфэ, сятэрэ сянэрэ уадэжь сфыщыгъаӀэхэгоба». 4Ащ ыуж ахэр мэуаб пачъыхьэм дэжь къыщэхи, Даут пытапӀэм зыщегъэбылъыфэ щыӀагъэх. 5ТхьэлӀыкӀоу Гъад Даут къыриӀуагъ: «Мы пытапӀэм ащ нахьыбэрэ удэмысыжьэу, ежьи Ехъуд хэгъэгум кӀо». Арти Даут ежьи, Хъэрэт мэзым нэсыгъ.

6Даутрэ игъусэхэмрэ къызэрэсыгъэхэм икъэбар Саул зэхихыгъ. А уахътэм Саул ГъыбӀэ щыӀагъ, пчыпыджыныр ыӀэдакъэу, изэолӀхэр къегъэуцокӀыгъэхэу чъыгэе чӀэгъым ар чӀэсыгъ. 7Арти изэолӀэу игъусагъэхэм Саул ариӀуагъ: «Бынямин кӀэлэжъхэр, шъукъэдаӀолъ зэ: лэжьыгъэшӀапӀэхэри сэнэшъхьэлэжьыпӀэхэри Ищай ыкъо къышъуитынхэшъ, дзэкӀолӀ мин ыкӀи шъэ зырызхэр шъуӀэ къырилъхьащтха? 8Джащ пая зэкӀэми шъукъыспекӀонэу шъузкӀызэгохьагъэр? Ищай ыкъорэ сикӀалэрэ гъусэ зэрэзэфэхъугъэхэмкӀэ Ӏуагъэ зэрэзэдашӀыгъэм икъэбар шъуащыщ горэми сигъэшӀагъэп. Джы къызэрэнафэрэмкӀэ, шъуащыщ горэми ыгу къысэгъугъэп, сикӀалэ сиунэӀут къысигъэбэныжьынэу зэрэфежьагъэм икъэбар шъуащыщ горэми сыхигъэгъозагъэп». 9Едом лъэпкъым щыщэу, Саул иӀумэтхэм яӀэшъхьэтетмэ ащыщэу Дэукъ къыӀуагъ: «Нэу дэс Ахъытыу ыкъо Ахъымэлэх дэжь Даут къызэрыкӀогъагъэр сэ слъэгъугъэ. 10Арти ащ иӀоф къырыкӀощтымкӀэ Зиусхьаным еупчӀи, гъомлапхъэхэмрэ фылистэу Голиат ичатэрэ къыритыгъэх».

11Ащ ыуж пачъыхьэм ыгъакӀохи, Ахъытыу ыкъо къурмэнышӀэу Ахъымэлэх, ащ иунагъо зэрэщытэу, Нэу дэс къурмэнышӀхэр зэкӀэ къэкӀонхэу унашъо афишӀыгъэти, ахэр зэкӀэ пачъыхьэм дэжь къэкӀуагъэх. 12Саул къыӀуагъ: «Ахъытыу ыкъу, мо къэдаӀу». Арти адрэм къыриӀожьыгъ: «СыкъэдаӀо, сизиусхьан». 13Саул ащ риӀуагъ: «Сыд пае оррэ Ищай ыкъорэ шъукъыспекӀоу шъузэрэгъэӀушыжьыгъэха, хьалыгъухэмрэ чатэмрэ ептыгъэха, иӀоф къырыкӀощтымкӀэ Тхьэм уеупчӀыгъа? Непэ къызэрэнафэрэмкӀэ, къысэбэнынэу, сэ къыспэшӀуекӀоу зыкъиӀэтынэу арба?»

14Ахъымэлэх пачъыхьэм джэуап къыритыжьыгъ: «УиӀумэтмэ ащыщэу Даут фэдэу хэта о нахь къыпфэшъыпкъэр? Ар пачъыхьэм имахълъэба, къыпфэсакъырэ цӀыфхэм яӀэшъхьэтетба, уиуни лъытэныгъэшхо щыфашӀыба? 15Джыра ащ иӀоф къырыкӀощтымкӀэ Тхьэм сызеупчӀыгъэр? Хьау, пачъыхьэр, уиӀумэти тибынхэри зэкӀэ умыгъэмысэх, сыда пӀомэ уиӀумэт зыпарми щыгъуазэп». 16Ау пачъыхьэм къыриӀуагъ: «Ахъымэлэх, ори уибынхэми зэкӀэми хьадэгъур джы къышъуфэкӀуагъ». 17ЕтӀанэ пачъыхьэм ухъумакӀоу иӀагъэхэм унашъо афишӀыгъ: «ШъукӀуи, Зиусхьаным икъурмэнышӀхэр шъуукӀых, сыда пӀомэ ахэр Даут готых, ар зэрэхэхьажьыгъэр ашӀэзэ, къэбар къыслъагъэӀасыгъэп». Ау пачъыхьэм иӀумэтмэ Зиусхьаным икъурмэнышӀхэр аукӀынхэу, ахэм аӀэ атыращэенэу фэягъэхэп. 18Арти пачъыхьэм Дэукъ риӀуагъ: «КӀуи, къурмэнышӀхэр укӀых». Едом лъэпкъым къыхэкӀыгъэ Дэукъ кӀуи, къурмэнышӀхэм атебэнагъ, чэтэнӀабгъур зыбг пыпхэгъэ хъулъфыгъэ тӀокӀиплӀрэ тфырэ а мафэм ыукӀыгъ; 19КъурмэнышӀхэм якъалэу Нэу чатэр щигъэхъушӀагъ; хъулъфыгъэхэри, бзылъфыгъэхэри, кӀэлакӀэхэри, сабый быдзашъохэри, цухэри, щыдхэри, мэлхэри чатэкӀэ зэтыриукӀагъэх.

20Псэоу къэнэжьыгъэ закъор Ахъытыу ыкъо Ахъымэлэх икӀалэу Абыетарти, Даут дэжь ар чъэжьыгъэ. 21Зиусхьаным икъурмэнышӀхэр Саул зэраригъэукӀыгъэхэм икъэбар Абыетар Даут риӀотэжьыгъ. 22Арти Даут Абыетар риӀуагъ: «Едом лъэпкъым къыхэкӀыгъэ Дэукъ а мафэм ащ зыщэсэлъэгъум къэбарыр Саул зэрэнигъэсыжьыщтыр сшӀагъэ. Шъуибынхэм апсэ зэрагъэгъугъэр сэ силажь. 23О садэжь къанэ, умыщын, сэ спсэ къылъыхъущтыр ары ныӀэп о упси къылъыхъущтыр; мыщ ущыӀэмэ, оркӀэ щынагъо щыӀэщтэп».

Currently Selected:

Апэрэ Самуел 22: АдыТГ

Highlight

Copy