Апэрэ Самуел 24

ЯтӀокӀэнэрэ плӀырэ шъхьэр

Даут Саул ищыӀэныгъэ къызэригъэнэжьыгъэр

1ЕтӀанэ Даут а чӀыпӀэр къыбгыни, зэкӀолӀэгъуаеу щыт къушъхьэлъэ чӀыпӀэу Ӏэнгъэдый щыӀагъ#24:1 Мы стихыр ижъырэ джуртыбзэмкӀэ атхыгъэ Ӏэпэрытхым ия 23-рэ шъхьэ ия 29-рэ стихэу щыт. АдыгабзэмкӀэ зэдзэкӀыгъэр урыс синодальнэ Библием техыгъэу ижъырэ урымыбзэмкӀэ зэрадзэкӀыжьыгъэ Ӏэпэрытхым зэритым фэд..

2Саул фылистхэм язауи къызегъэзэжьым, «Даут зэкӀолӀэгъуаеу щыт къушъхьэлъэ чӀыпӀэу Ӏэнгъэдый щыӀ» аӀуи, къэбар къынагъэсыгъ. 3Арти зэрэ-Израилэу ис хъулъфыгъэмэ анахь кӀочӀэшхоу нэбгырэ минищ зэригъэгъуси, Даутрэ ащ кӀыгъухэмрэ къыгъотынхэу Пчэн Ӏэлхэм якъушъхьэ пцӀанэкӀэ заджэхэрэм Саул кӀуагъэ. 4КӀохэзэ, гъогунапцэм Ӏутыгъэ чэтым дэжь къызыщэуцухэм, Саул щагу щикӀынэу гъочӀэгъым чӀэхьагъ. Даутрэ игъусэхэмрэ а гъочӀэгъым ыпхачӀэ зыщагъэбылъщтыгъэ. 5Арти игъусэхэр Даут къеӀушъэшъагъэх: «„Уипый Сэ пӀэ къислъхьанышъ, узфаер ащ епшӀэщт“ къызэрэуиӀогъагъэм фэдэу, уиӀоф Зиусхьаным къыригъэкӀыгъ». Даут къэтэджи, цӀыкӀу-цӀыкӀоу Саул ищыгъын кӀыӀутелъ ыӀэпакӀэ къыпигъэчъыгъ. 6Саул ищыгъын ӀэпакӀэ къызэрэпигъэчъыгъэм Даут ыгу къыгъэлъэпэрэпагъ. 7Арти игъусэхэм ариӀуагъ: «ТилӀышъхьэпащэ, Зиусхьаным пачъыхьэнэу къахихыгъэм, сӀэ тесщаемэ, Зиусхьаным къысфигъэгъунэп, сыда пӀомэ ар Зиусхьаным пачъыхьэнэу къахихыгъ». 8Даут игущыӀэхэмкӀэ игъусэхэр ыгъэӀасэхи, ахэр Саул тыригъэбэнагъэхэп. Саул къэтэджыжьи, гъочӀэгъым къычӀэкӀыжьи гъогум къытехьажьыгъ.

9Ащ ыуж Даути къэтэджи, гъочӀэгъым къычӀэкӀи, Саул къыкӀэлъыджагъ: «Сизиусхьанэу пачъыхьэр!» Саул къызызэплъэкӀым, Даут ынэӀу егъэзыхыгъэу чӀыгум зытыридзи, шъхьащэ фишӀыгъ. 10Даут Саул риӀуагъ: «„Даут гухьагужъ къыфыриӀ“ къыозыӀорэмэ сыда узкӀядэӀурэр? 11Мары непэ плъэгъугъэ гъочӀэгъым укъызчӀэхьэм Зиусхьаным сӀэ укъызэрэрилъхьэгъагъэр; усыукӀынэуи къысаӀогъагъ, ау псэоу укъэзгъэнэжьыгъ. Сэр-сэрэу зэсӀожьыгъ: „ТилӀышъхьэпащэ сӀэ тесщэенэп, сыда пӀомэ Зиусхьаным ар пачъыхьэнэу къахихыгъ“. 12Тят! Уищыгъын ӀэпакӀэу къыпысыупкӀыгъэр зэрэсӀыгъыр олъэгъуба, ау усыукӀыгъэп: сыгу бзэджагъэ зэримылъри мыхъун зэрэсымышӀагъэри зэгъашӀэ, пшӀошъи гъэхъу. О зэрар пфэхъунэу зыпари сшӀагъэп, ау о спсэ хэпхынэу гухэлъ зыфэпшӀыжьыгъэу сауж уит. 13Арышъ, сэрми орми зафэр Зиусхьаным зэхифын, къинэу о сэбгъэлъэгъугъэр Зиусхьаным уигъэпщыныжьын; ау сӀэ къыптесщэещтэп. 14Ижъырэ къэбарыжъым зэрэхэлъэу, „Хабзэ зыхэмылъхэр ары хэбзэнчъагъэр къызпыкӀрэр“. Ау сэ сӀэ къыптесщэещтэп. 15Хэта Израилым ипачъыхьэ зэзэощтыр? Хэта зыуж уитыр? Сэ сауж уитынри хьэ лӀагъэм, бжыдзэ закъом ауж уитынри зэфэдэ. 16Зиусхьаныр хьыкум орэхъу, орми сэрми зафэр Ащ зэхифын. СиӀоф Ар хэплъэнышъ, къызэхифыщт, ори сыпщиухъумэщт».

17Саул фэгъэзагъэу Даут къыӀощтыр къызеухым, Саул къыӀуагъ: «О умакъа зэхэсхырэр, сикӀалэу Даут?» Саул ымакъэ нахь лъэш къэхъуи, къэгъыгъ. 18ЕтӀанэ ащ Даут риӀуагъ: «Сэщ нахьи о унахь заф, сыда пӀомэ шӀукӀэ укъыспэгъокӀыгъ, сэ къыппэзгъохыгъэр бзэджагъ; 19Зиусхьаным пӀэ сыкъызырелъхьэм, сэщ пае гукӀэгъушхоу къызхэбгъэфагъэмкӀэ непэ ар о къэуушыхьатыгъ – сыуукӀыгъэп. 20Хэта зипый къызӀэкӀэхьэгъахэу шӀукӀэ ар зытӀупщыжьщтыгъэр? Непэ о сэ къысфэпшӀагъэм ипэгъокӀэу Зиусхьаным шӀу къыпферэшӀэжь. 21Арышъ, узэрэпачъыхьащтыр джы къызгурыӀуагъ, Израилым ипачъыхьагъуи пытэу о къэбгъэгъунэщт. 22Джы къыспыкӀыгъэхэу саужкӀэ псэущтхэр зэрэмыгъэкӀодыщтхэмкӀэ, сятэ иунэ сцӀэ зэрэщымыгъэкӀосэщтымкӀэ Зиусхьаным ыцӀэкӀэ тхьэлъанэ къысфэшӀ». 23Ащ дэжьым Даут Зиусхьаным ыцӀэкӀэ тхьэлъанэ Саул фишӀыгъ. ЕтӀанэ Саул ядэжь ыгъэзэжьыгъ, Даутрэ игъусэхэмрэ зэкӀолӀэгъуаеу щыт къушъхьэ чӀыпӀэу Ӏэнгъэдый агъэзэжьыгъ.

Currently Selected:

Апэрэ Самуел 24: АдыТГ

Highlight

Copy