Апэрэ Самуел 17

ЯпшӀыкӀублэнэрэ шъхьэр

Даут Голиат зэрэтекӀуагъэр

1Фылистхэм заом зыкъыфагъэхьазыри, ядзэхэр Ехъудэм ит псэупӀэу Сэхэу къыщызэӀуагъакӀэхи, Сэхэурэ Ӏазэкърэ азыфагу къыдафэу Афэсдамым дэжь пщыпӀэ щашӀыгъ. 2Саулрэ израил цӀыфхэмрэ загъэхьазыри чъыгэе кӀэир уцупӀэу къыхахыгъ, фылистхэм апэшӀуекӀорэ заом зыфагъэхьазырыгъ. 3Фылистхэр зы бгъумкӀэ Ӏуашъхьэм къытеуцуагъэх, израил цӀыфхэри ащ пэчӀынэтӀэ Ӏуашъхьэм, кӀэир азыфагоу, къыщыуцугъэх. 4ЕтӀанэ Голиат ыцӀэу, Гъат щыщ бэнакӀоу, метри 3 ехъу зилъэгагъэр фылистхэм къахэкӀотыгъ. 5Джэрз танджыр, пцэжъыепӀон теплъэ зиӀэу зэхэдэгъэ джэрз ашъоджанэу килограмм 60 фэдиз горэ зионтэгъугъэр ащ щыгъыгъэх; 6ылъашъхьэмэ къащегъэжьагъэу ылъэгуанджэхэм хьазырэу къанэсэу джэрз тедэхэр яӀагъэх, джэрзым хэшӀыкӀыгъэ пчыпыджын кӀэкӀыр ыкӀыб къыкъощыщтыгъ. 7ИпчыпыджыныкӀ лӀы къызэрыкӀом ыӀапшъэкӀэ умыубытышъунэу гъумыгъэ, гъучӀ пчыпыджынышъхьэм ионтэгъугъэ килограмми 7 хъущтыгъэ. Голиат имэӀузехьэ ыпэ итэу къакӀощтыгъ. 8Голиат къэуцуи израил цӀыфхэм ядзэ къекууагъ: «Сыд пае шъукъэзэонэу шъукъэуцугъа? Сэ сыфылистба, шъо Саул шъузэриунэӀутыр шъушӀэрэба? Зы нэбгырэ къызхэжъугъэкӀи къысэжъугъэзау. 9Джар къысэзэошъоу, сыкъызиукӀкӀэ, тэ тышъуипщылӀыщт. Ау сэ ежь сытекӀоу, зысыукӀкӀэ, шъо шъутипщылӀыщт, шъукъытфэлэжьэщт». 10ЕтӀани фылистым къариӀуагъ: «Сэ непэ израил дзэхэр хьайнапэ сшӀыщтых! ТитӀо тызэзэонэу цӀыф къызхэжъугъэкӀ!» 11Фылистым къыӀуагъэхэр зызэхахым, Саули зэкӀэ израил цӀыфхэри лъэшэу къыгъащтэхи, щынэгъошхом зыӀэкӀиубытагъэх.

Даут Саул иуцупӀэ зэрэкӀуагъэр

12Даут ятэщтыгъэр ефрат лъэпкъым къыхэкӀыгъэ Ищай. Ар Ехъудэм ит къалэу Бэтлэхъэм щыпсэущтыгъ. Ащ кӀэлий иӀагъ. Саул ипачъыхьэгъум ар лӀыжъы хъугъэу анахь алъытэрэ нахьыжъхэм ащыщыгъ. 13Ищай икӀэлэ нахьыжъищ Саул заом дежьагъэх. Анахьыжъыр Елыаб, къыкӀэлъыкӀорэр – Абинэдау, ящэнэрэр – Щам. 14Даут зэшхэм анахьыкӀагъ. Зэш нахьыжъищыр Саул дежьагъэх. 15Даут Саул дэжь къикӀыжьзэ, чэзыу-чэзыукӀэ Бэтлэхъэм дэс ятэ имэлхэр ыгъэхъунхэм пае къакӀощтыгъ. 16Фылистыр къахэкӀзэ мэфэ тӀокӀитӀум ипчэдыжьи ипчыхьи къахэкӀотти, израил цӀыфхэм апашъхьэ къиуцоти, езэонхэу къяджэщтыгъ. 17Зы мафэ горэм Ищай ыкъо Даут риӀуагъ: «Килограмм 15 фэдиз горэ хъунэу лэжьыгъэ гъэгъугъэрэ хьалыгъуипшӀрэ зыдаштэхи, дзэр зыдэщытым дэжь кӀуи, пшыхэм афэхь. 18Ахэм ягъэгъусэжьых къое хьалипшӀыр, пшыхэр зыхэт дзэм идзэпащэхэм ахэр ятых. Пшымэ япсэуныгъэ изытети, яфэныкъуагъэхэми, яӀоф зыфэдэми ишъыпкъапӀэ сшӀэным пае сыд щыщми зыгорэ къысфыздахь».

19Саули, ахэри, израилыдзэри зэгъусэхэу чъыгэе кӀэим щыӀэхэу фылистхэм язэонхэу загъэхьазырщтыгъэ. 20Даут пчэдыжьым жьэу къэтэджи, имэлхэм нэмыкӀ мэлахъо къапигъэуцуи, ыгъэхьазырыгъэр къыздишти Ищай къыриӀогъэ чӀыпӀэм кӀуагъэ. Дзэр зыдэщыт чӀыпӀэм зынэсым, зэрэгъэкуохэзэ етӀупщыгъэу зэоным зыфагъэхьазырщтыгъэ. 21Израил цӀыфхэмрэ фылистхэмрэ ясатырэхэр зэпэӀууцуагъэх. 22Даут къыхьыгъэхэр ӀапӀэхэм апэтыгъэ къэрэгъулым къыфыщинэхи, дзэкӀолӀхэр зыдэщыт лъэныкъомкӀэ ечъэжьагъ. Зынэсым ышхэм япсэуныгъэ изытет кӀэупчӀагъ. 23Ар ахэм адэгущыӀэзэ, Гъат щыщ фылист бэнакӀоу Голиат фылистхэм къахэкӀоти, джа къыӀощтыгъэхэр джыри къыӀохэу зырегъажьэм, Даут къызэхихыгъ. 24Израил цӀыфхэм а лӀыр къызэралъэгъоу, лъэшэу къыгъэщынагъэхэти, къыкӀатхъужьыгъ. 25Мыщ дэжьым израил цӀыфхэм зэраӀожьыщтыгъэ: «Шъолъэгъуа мо лӀэу къахэкӀотыгъэр? Джар къызкӀахэкӀотыгъэр Израилым Ӏэягъэхэр къыриӀолӀэнхэм пае. Ар зыгорэм ыукӀмэ, пачъыхьэм мылъкушхо ащ ритыщт, ипшъашъи ригъэщэщт, ятэ иунагъо хьакъулахьхэр римыгъэтхэу, шъхьафитэу Израилым щигъэпсэущт». 26Арти Даут къыкӀэрыт цӀыфхэм яупчӀыгъ: «Мы фылистыр зыукӀэу, Израилым ынапэ зыукъэбзыжьыщтым сыд шъуӀуи фашӀэщтыр? Сыда зыщыщыр сунэт амышӀыгъэ мо фылистэу Тхьэу щыӀэм идзэ шӀоигъэхэр къезыӀуалӀэрэр?» 27Ар зыукӀрэм фашӀэщтыр зыфэдэр цӀыфхэм Даут къыфаӀотагъ.

28Даут ышнахьыжъэу Елыаб ышнахьыкӀэ цӀыфхэм зэрадэгущыӀэрэр къыззэхехым къэгубжи, Даут къыриӀуагъ: «Сыда мыщ укъызкӀэкӀуагъэр, хэта мэл тӀэкӀур шъофнэкӀым къызфыщыунагъэри? О зыкъызэрэпшӀошӀыжьрэми угу зэрэшӀойми дэгъоу сащыгъуаз, зэрэзэзэощтхэм уеплъынэу укъэкӀуагъ». 29Даут къыриӀожьыгъ: «СызэряупчӀыгъэм нэмыкӀэу мыхъун горэ сшӀагъа?» 30Ар къыӀуи, зыдыригъэзэкӀи, къакӀэрытыгъэ горэм а упчӀэ дэдэр зыретым, къызэхэзыхыгъэхэм апэ къыраӀогъагъэр къаӀожьыгъ.

31Даут къыӀуагъэхэр Саул зыраӀожьхэм, адрэм къылъигъакӀохи аригъэщагъ. 32Даут Саул риӀуагъ: «Ащ пае хэти орэмыгумэкӀ, уиӀумэт кӀонышъ фылистым езэощт». 33Арти Саул Даут риӀуагъ: «А фылистым о уезэон пфэлъэкӀыщтэп, сыда пӀомэ джыри укӀэлащ, адрэр икӀэлэгъум къыщегъэжьагъэу зэолӀ». 34Даут Саул риӀожьыгъ: «УиӀумэт ятэ имэлхэр ыгъэхъущтыгъэхэти, аслъан е мышъэ горэ къахахьэу Ӏэхъогъум хэт мэлхэм ащыщ зырихьыжьэкӀэ, 35ащ сылъежьэти сыкӀахьэщтыгъэ, сытебанэти, ыжэ дэлъэу ыхьырэр къытесхыжьыщтыгъ. КъызыстебэнэжькӀэ ытхыцӀашъо зыхэзгъанэти исыутщтыгъэ, стхьалэщтыгъэ; 36Арышъ, уиӀумэт аслъанми мышъэми затекӀуагъэкӀэ, сунэт амышӀыгъэ мо фылистми джар дэдэр есшӀэн, сыда пӀомэ Тхьэу щыӀэм идзэ ынапэ ащ тырехы#17:36 Мы чӀыпӀэм мыщ фэдэ къэӀуакӀи иӀ: [СэрэкӀуи ар хэсэрэгъафа Израилым ынапэу тырахыгъэр къытехьажьыным пае? Армырмэ хэт щыща а сунэт амышӀыгъэр?] Мы къэӀуакӀэр ижъырэ урымыбзэмкӀэ зэрадзэкӀыжьыгъэ Ӏэпэрытх горэхэм ахэт, ау ижъырэ джуртыбзэмкӀэ атхыгъэ Ӏэпэрытхым хэтэп.». 37ЕтӀани Даут къыӀуагъ: «Аслъанми мышъэми сащызыухъумэгъэ Зиусхьаным а фылистми сыщиухъумэщт». Арти Саул Даут риӀуагъ: «КӀо, Зиусхьаныр гъусэ къыпфэхъу».

38Арти Саул идзэ шъуашэ Даут зыщыригъэлъагъ, джэрз танджыр шъхьащилъагъ, ашъоджанэри зыщыригъэлъагъ. 39Даут чатэр щыгъынхэм акӀыӀу къышӀыжьи, тезэкӀухьагъ, сыда пӀомэ ащ фэдэ Ӏэшэ-шъуашэхэр зыщилъэхэу есэгъагъэп. ЕтӀанэ «Мыхэр сщыгъхэу сесагъэпышъ, зызгъэзэшъурэп», – Даут Саул риӀуи, зыщырагъэлъагъэхэр зэкӀэ къызщихыжьыгъэх. 40ЕтӀанэ ибэщ къыштэжьи, псы игъукӀыгъэм ылъэгу мыжъо джэшъуитф къыхихи, имэлэхъо Ӏалъмэкъ рилъхьагъэх. Мыжъодзыр ыӀэдакъэу фылистым езэонэу ежьагъ.

41Фылистри Даут дэжькӀэ къежьагъ, имэӀузехьэ ащ ыпэ итыгъ. 42Фылистыр къаплъи Даут къызелъэгъум, пхъатэ зыпимыхьэу къеплъыгъ, сыда пӀомэ ар ныбжьыкӀэу, къуапцӀэу, бжьышӀоу щытыгъ. 43Фылистым Даут къыриӀуагъ: «Бэщыжъ цӀыкӀухэр уиӀэдакъэу укъыспэгъокӀынэу сыхьа сэ?» Ащ тетэу фылистыр ежь итхьэмэ ацӀэкӀэ Даут къебгыгъ. 44ЕтӀанэ фылистым Даут къыриӀуагъ: «КъысэкӀуалӀ уихьадэ ошъогу бзыухэмрэ шъофым ис хьэкӀэ-къуакӀэхэмрэ ястыжьыщтышъ». 45Даут фылистым риӀожьыгъ: «О чатэр, пчыпыджынышхор, пчыпыджын кӀэкӀыр уиӀэдакъэхэу укъыспэгъокӀыгъэмэ, сэ Зиусхьанэу ошъогу дзэхэр зиӀэрылъхьэм, Израилым идзэмэ я Тхьэу, Ӏаягъэхэр къызэпӀолӀагъэм ыцӀэкӀэ сыкъыппэгъокӀыгъ. 46Джы Зиусхьаным сӀэ укъырилъхьащтышъ, усыукӀыщт, пшъхьэ шӀосхынышъ, фылистхэм ядзэкӀолӀхэми яхьадэхэр ошъогу бзыухэмрэ чӀым тет хьэкӀэ-къуакӀэхэмрэ ястыжьынхэшъ, Израилым Тхьэ зэриӀэр зэрэдунаеу щызэлъашӀэщт. 47ЕтӀанэ мы цӀыф жъугъэмэ къашӀэщт Зиусхьаным чатэмрэ пчыпыджынымрэкӀэ укъызэримыухъумэрэр, сыда пӀомэ мыр Зиусхьаным изаошъ, Ащ шъо тӀэ шъукъырилъхьащт». 48Ащ ыуж фылистыр къезэонэу Даут ыдэжькӀэ къызежьэм, Даут фылистым ылъэныкъокӀэ псынкӀэу ечъэжьагъ. 49Даут иӀалъмэкъ иӀэбэжьи мыжъор къырихыгъ, мыжъодзым дилъхьи, ыгъэчэрэгъу-ыгъэчэрэгъуи, зы къуапэр къытӀупщи, фылистым ынатӀэ тыригъэпсыхьи еуагъ. Арти ащ ынатӀэ мыжъом пхыриути, ыӀу егъэзыхыгъэу чӀым къытыригъэфагъ.

50Джащ тетэу Даут мыжъомрэ мыжъодзымкӀэрэ фылистым текӀуи ыукӀыгъ; ау Даут чатэ ыӀыгъыгъэп. 51Ар дэдэм Даут фылистым ечъалӀи, теуцуи, ащ ичатэ чэталъэм къырихи, еуи ышъхьэ шӀуиупкӀыгъ. ЯбэнакӀо къызэраукӀыгъэр къызалъэгъум, фылистхэм кӀатхъужьыгъ. 52Арти израил ыкӀи ехъудэ дзэкӀолӀхэм зыкъаӀати, зэрэгъэкуохэзэ фылистхэр рафыжьэхи, кӀэим икъыдэхьапӀэ, Ӏэкърэн икъэлапчъэмэ анэс, афыжьыгъэх. ЗыкӀэхьэгъэхэ фылистхэр Гъатрэ Ӏэкърэнрэ азыфагу илъ ЩэӀараим гъогум тыраукӀыхьагъэх. 53ЕтӀанэ израил цӀыфхэу фылистхэр езыфыжьагъэхэм къагъэзэжьи, ахэм яуцупӀэщтыгъэр зэрапхъуагъэ. 54Даут ыукӀыгъэ фылистым ышъхьэ къыздишти, Ерыусэлэм къыхьыгъ. Ащ иашъоджанэ ежь ичэтэнгъэӀагъэ щигъэтӀылъыгъ.

Даут Саул къызэрэфащагъэр

55Даут фылистым езэонэу зэрежьагъэр Саул зелъэгъум, дзэм ипащэу Абинэр еупчӀыгъ: «Абинэр, мо кӀалэр хэта зыкъор?» Абинэр къыриӀожьыгъ: «Упсэ бэ егъашӀ, пачъыхь, ар сшӀэрэп». 56Арти пачъыхьэм ыӀуагъ: «Ащыгъум къызэгъашӀ а кӀалэр зыкъор». 57Даут фылистым текӀуагъэу къыгъэзэжьыгъэу къэкӀожьзэ, Абинэр ащ екӀуалӀи Саул дэжь къыщагъ; фылистым ышъхьэ ащ ыӀыгъыгъ. 58Саул ащ къеупчӀыгъ: «Хэта узыкъор, кӀалэ?» Даут къыриӀожьыгъ: «Бэтлэхъэм щыщ уиӀумэтэу Ищай сырикӀал».

Currently Selected:

Апэрэ Самуел 17: АдыТГ

Highlight

Copy