Апэрэ Самуел 16

ЯпшӀыкӀухэнэрэ шъхьэр

Даут пачъыхьэнэу ышъхьэ дагъэ зэрэщафагъэр

1Зиусхьаным Самуел къыриӀуагъ: «Саул пае джыри бэрэ угумэкӀыщта? Сыфэмыежьэу Израилым ипачъыхьагъу ӀэнатӀэ ащ Ӏысхыжьыгъ. Дагъэр бжъэм игъахъуи осэӀофтэшъ Бэтлэхъэм дэс Ищай дэжь кӀо, ащ икӀалэмэ ащыщ пачъыхьэ хъунэу Сэ къахэсхыгъ». 2Арти Самуел ыӀуагъ: «Сыдэущтэу сыкӀощта? Саул къэбарыр зызэхихкӀэ сиукӀыщт». Зиусхьаным къыӀуагъ: «ШкӀэ горэ зыдещажьи, Зиусхьаным къурмэн фэпшӀ пшӀоигъоу узэрэкӀуагъэр яӀу. 3Ищай къурмэным къегъэблагъ. Ащ ыуж о пшӀэщтыр Сэ къыозгъэлъэгъунышъ, къахэсхыщтым ышъхьэ дагъэ щыпфэщт». 4Зиусхьаным къызэрэриӀуагъэм тетэу Самуел зекӀуагъэ. Ар Бэтлэхъэм къызэсым, къалэм дэс нахьыжъ упчӀэжьэгъухэр гумэкӀым зэлъиштагъэхэу зыкъыӀуагъакӀи къеупчӀыгъэх: «ГухэлъышӀу уиӀэу укъэкӀуагъа?» 5Самуел къариӀожьыгъ: «Ары, гухэлъышӀу сиӀэу, Зиусхьаным къурмэн фэсшӀынэу сыкъэкӀуагъ. Хабзэм тетэу зышъуукъэбзи, къурмэным тызэдекӀолӀэщт». ЕтӀанэ Самуел Ищайрэ икӀалэхэмрэ апае Зиусхьаным шӀукӀэ афелъэӀуи, къурмэным къыригъэблэгъагъэх.

6Ахэр къурмэншӀыпӀэм къызекӀуалӀэхэм, Елыаб ыкъо Ищай зелъэгъум Самуел ыгукӀэ зэриӀожьыгъ: «Мырын фае Зиусхьаным къахихыгъэр». 7Ау Зиусхьаным Самуел къыриӀуагъ: «Елыаб илъэгагъэрэ итеплъэрэ зыдямыгъэхьых. Сэ ар зыпыздзыгъ. Зиусхьаныр зэреплъырэр цӀыфыр зэреплъырэм фэдэп. ЦӀыфхэр теплъэм дехьыххэмэ, Зиусхьаныр гум еплъэ». 8Ащ ыуж Ищай Абинэдау къеджи Самуел зырещалӀэм, Самуел къыриӀуагъ: «Хьау, мыри Зиусхьаным къыхихыгъэп». 9ЕтӀанэ Ищай Щам Самуел зырещалӀэм, «Хьау, мыри Зиусхьаным къахихыгъэп» къыриӀуагъ. 10Джаузэ Ищай икӀэлибл зырызэу Самуел зырещалӀэхэм, «Мыхэм ащыщ зыпари Зиусхьаным къыхихыгъэп» ыӀуи, Самуел къыриӀуагъ. 11ЕтӀанэ Самуел Ищай еупчӀыгъ: «УикӀалэхэр зэкӀэ мыщ щыӀэха?» Ищай къыриӀуагъ: «АнахьыкӀэ дэдэр къэнагъ, ар мэлахъо щыӀ». Арти Самуел ащ риӀуагъ: «ЛъыгъакӀохи къягъэщэжь, ар мыщ къэмысыжьэу тытӀысэу къурмэнылым тыхэӀэщтэп». 12Ищай кӀэлэ нахьыкӀэм лъигъакӀохи къаригъэщэжьыгъ. Ар бжьышӀоу, къуапцӀэу, ынитӀуи дахэу къэгъэтхъыхьагъэу къычӀэкӀыгъ. Джащ дэжьым Зиусхьаным Самуел къыриӀуагъ: «Джарышъ къахэсхыгъэр, тэджи дагъэр ышъхьэ щыф». 13Самуел дагъэр зэрыт бжъэр къышти, ышхэр зэрэщытхэу ащ ышъхьэ дагъэр щифагъ. Джащ къыщегъэжьагъэуи, ащ ыужи Зиусхьаным и-Псэ Даут къылъыӀэс зэпытыгъ. Самуел Рамэ, ядэжь, къыгъэзэжьыгъ.

Даут Саул зэрэфэлэжьагъэр

14Зиусхьаным и-Псэ Саул къыбгынагъэти, Зиусхьаным фэӀорышӀэрэ джынапцӀэр ыгу къыщышхэщтыгъ. 15ИӀумэтхэм Саул къыраӀуагъ: «Тхьэм фэӀорышӀэрэ джынапцӀэр угу къыщэшхэшъ, 16тизиусхьан ыпашъхьэ ит иӀумэтхэм унашъо къытферэшӀи, пхъонтэпщынэм дэгъоу къеорэр къыфэдгъэсынышъ, Тхьэм фэӀорышӀэрэ джынапцӀэр угу къыщышхэ зыхъукӀэ, ӀапэхэмкӀэ къыпфеозэ, уигъэрэхьатыжьыщт». 17Арти Саул иӀумэтхэм ариӀуагъ: «Пхъонтэпщынэм дэгъоу ео горэ къэжъугъоти къысфашъущ». 18Мыщ дэжьым иӀумэтхэм ащыщ горэм къыӀуагъ: «Пхъонтэпщынэм еошъоуи, лӀэхъупхъэуи, зэолӀ пхъашэуи, жэбзэ дахи Ӏулъэу, лъэгъупхъэуи, Зиусхьаныр игъусэу Бэтлэхъэм щыщ Ищай зы кӀалэ горэ иӀэу сэшӀэ». 19Арти Саул мэкъэгъэӀухэр Ищай дэжь ыгъакӀохи раригъэӀуагъ: «Мэлхэр зыгъэхъурэ уикӀалэу Даут садэжь къэгъакӀу». 20Арти Ищай хьалыгъу, санэр зэрыз шъонтыр щыдым тырилъхьэхи, зы чыцӀ кӀигъэгъужьи, икӀалэу Даут Саул ыдэжь ыгъэкӀуагъ. 21Даут Саул дэжь къакӀуи фэлэжьагъ. Саул Даут лъэшэу ыгу рихьыгъэти, иашъоджэнэзехьэу ыгъэнэфагъ. 22Арти Саул Ищай дэжь ыгъакӀохи раригъэӀуагъ: «Даут садэжь къэрэни къулыкъур щерэхь, сыда пӀомэ нэшӀукӀэ сэ ащ сеплъыгъ». 23Тхьэм фэӀорышӀэрэ джынапцӀэм Саул щыхьагъу къызишӀкӀэ, Даут пхъонтэпщынэр къыштэти, къыфеощтыгъэ, Саул ыгу къыдищаети, изытет нахьышӀу хъущтыгъэ, джынапцӀэри ащ шъхьащыкӀщтыгъэ.

Currently Selected:

Апэрэ Самуел 16: АдыТГ

Highlight

Copy