Апэрэ Самуел 18
18
ЯпшӀыкӀуенэрэ шъхьэр
Ионэтанрэ Даутрэ Ӏуагъэ зэрэзэдашӀыгъэр
1Даутрэ Саулрэ язэдэгущыӀэн заухым, Ионэтан ыпсэ Даут ыпсэ хэтӀагъэ хъугъэ, ежь ыпсэ фэдэу Ионэтан ар шӀу ылъэгъугъ. 2Саул а мафэм Даут ятэ дэжь кӀожьынэу фидагъэп. 3Ионэтан Даут гъусэ зэрэфэхъурэмкӀэ Ӏуагъэ дишӀыгъ, сыда пӀомэ ежь ыпсэ фэдэу ар шӀу ылъэгъугъ. 4Арти Ионэтан ищыгъын кӀыӀутелъ къызщихи Даут ритыгъ, джащ фэдэу иашъоджани, ичати, ищабзи, ибгырыпхи ритыгъэх. 5Ащ ыуж Саул Даут тыдэ ыгъэкӀуагъэми, акъылыгъэ хэлъэу зекӀощтыгъэ. Саул ар дзэкӀолӀхэм Ӏэшъхьэтет зафешӀым, цӀыф пстэуми Саул иунэӀутхэми агу рихьыгъ. 6Даут фылист бэнакӀом текӀуагъэу къагъэзэжьыгъэу къэкӀожьхэ зэхъум, бзылъфыгъэхэр орэдхэр къаӀохэзэ, къашъохэзэ, пачъыхьэу Саул Израилым икъэлэ пстэумэ къыщапэгъокӀыгъэх, ищытхъу аӀозэ, гушӀогъошхо хэлъэу шъонтырыпхэмрэ нэмыкӀ пщынэ Ӏэмэ-псымэ зэфэшъхьафхэмрэ къяощтыгъэх. 7Орэдхэр къэзыӀозэ къашъощтыгъэ бзылъфыгъэхэр къыхэкуукӀыщтыгъэх: «Саул нэбгырэ минхэм атекӀуагъэмэ, Даут нэбгырэ минипшӀхэм атекӀуагъ!» 8Саул ащ лъэшэу къыгъэгубжыгъ, зэхихыгъэхэр имыгуапэу ыгукӀэ зэриӀожьыгъ: «Даут минипшӀхэр ратхи, сэ минхэр къысапэсыгъэмэ, пачъыхьагъур ары ныӀэп джы ар зыщыкӀэжьрэр». 9А мафэм къыщегъэжьагъэу Саул цыхьэ ымышӀэу Даут лъыплъэщтыгъ.
Саул Даут ыукӀынэу зэрэфэягъэр
10КъыкӀэлъыкӀогъэ мафэм Тхьэм фэӀорышӀэрэ джынапцӀэм Саул къыригъэзыгъэти, иунэ исэу зишхыхьажьщтыгъэ. Адрэ мафэхэм зэришӀщтыгъэ хабзэу, Даут пхъонтэпщынэм къеощтыгъэ. Саул пчыпыджыныр ыӀыгъыгъэти, 11«Даут дэпкъым хезгъэӀулӀэн», – ыӀуи ыгукӀэ зэриӀожьи, пчыпыджыныр ыдзыгъ. ГъогогъуитӀо зеом Даут зиуфэзэ, ар зытыригъэфагъэп.
12Арти Саул Даут щыщынэу ригъэжьагъ, сыда пӀомэ Зиусхьаныр Даут игъусагъ, ау Зиусхьаным Саул къыбгынэгъагъ. 13Саул Даут ынэӀу ригъэкӀи, нэбгырэ мин хъурэ дзэкӀолӀ купым пащэу фишӀыгъэти, Даут дзэкӀолӀхэр къэзэонхэу ыщэщтыгъэх. 14Даут сыд фэдэрэ Ӏоф фежьагъэми, акъылым рыгъуазэщтыгъэ, Зиусхьаныр ренэу ащ игъусагъ. 15Даут акъылым зэрэрыгъуазэрэр Саули ылъэгъущтыгъэ, джащ къыхэкӀэуи щыщынэщтыгъэ. 16Ау зэрэ Израилэуи Ехъуди Даут шӀу ащалъэгъущтыгъэ, сыда пӀомэ апэ итэу зэонхэу ыщэщтыгъэх.
Даут Саул ыпхъу къызэрищагъэр
17Ащ ыуж Саул Даут риӀуагъ: «Мары спхъу нахьыжъэу Мэраб, уишъхьагъусэнэу къыостыщт, ау укъысфэшъыпкъэу лӀыхъужъэу къулыкъур сфэпхьыщт, Зиусхьаным ыцӀэкӀэ зао». Ау ежь егупшысыгъ: «Сэ сымыукӀэу фылистхэм ар къарэукӀ». 18Ары шъхьае Даут Саул къыриӀуагъ: «Сыд гущ сэ, цӀыф лъэрыхьэмэ сащымыщэуи, тиунагъокӀи Израилым тыщызэлъамышӀэуи пачъыхьэм махълъэ сыфэхъун слъэкӀына?» 19Ау Саул ыпхъу Мэраб Даут зыригъэщэнэу щытыгъэ пӀалъэр къызэсым Мыхъолат щыщ Ӏадриел ар дагъэкӀуагъ. 20Саул иадырэпхъоу Михэл Даут шӀу къылъэгъугъ. А къэбарыр Саул зырагъэӀум, гуапэ щыхъугъ. 21Саул егупшысыгъ: «Ар ащ зыдэзгъакӀокӀэ, тӀэсхъапӀэ фэхъунышъ, фылистхэм аӀэкӀэкӀодэпэн». ЕтӀанэ Саул Даут риӀуагъ: «Махълъэ укъысфэхъунэу уфаемэ, ятӀонэрэу джыри амал уиӀ». 22Ащ ыуж Саул иӀумэтхэм унашъо афишӀыгъ: «Даут шъэфэу шъудэгущыӀи ешъуӀу: „Пачъыхьэм ыгу узэрэрихьрэми, ащ иӀумэтхэм зэкӀэми шӀу узэралъэгъугъэми еплъ. Пачъыхьэм махълъэ фэхъу“». 23Саул иӀумэтхэм Даут ар зыраӀом, Даут къариӀожьыгъ: «Пачъыхьэм уримэхълъэныр псынкӀагъокӀэ шъогугъа? Сэ сыбаеп, сыцӀэрыӀоп». 24Даут ыӀуагъэр иӀумэтхэм Саул зынагъэсыжьым, 25Саул ахэм ариӀуагъ: «Даут сфешъуӀожь пачъыхьэм ипыйхэм яфэшъуашэр ягъэгъотыжьыгъэным пае фылист нэбгыришъэм яукӀытапӀэхэу къыпыуипкӀыгъэхэм анэмыкӀ пшъэшъэ уасэу пачъыхьэр зэрэфэмыер». Фылистхэм аӀэкӀэ Даут зэригъэкӀодыщтыр ары Саул зэгупшысщтыгъэр. 26Саул иӀумэтхэм ариӀуагъэр Даут зынагъэсым, пачъыхьэм имахълъэ хъун зэрилъэкӀыщтыр ащ лъэшэу игуапэ хъугъэ. ПӀалъэу агъэнэфагъэр къэмысзэ, 27Даут ицӀыфхэр игъусэхэу кӀуи, фылист нэбгырэ шъитӀу къыукӀыгъ. Ахэм яукӀытапӀэхэр къапиупкӀхи, имахълъэ хъуным тегъэпсыхьагъэу пачъыхьэм къыфихьыгъэх. Арти Саул ыпхъу Михэл ащ дигъэкӀуагъ. 28Джащ тетэу Зиусхьаныр Даут зэригъусэри, ыпхъу Михэл ар шӀу зэрилъэгъури инэрылъэгъузэ Саул къырыкӀуагъ. 29Джащ къыхэкӀэуи Саул Даут нахьи нахь лъэшэу щыщынэу хъугъэ, ежь опсэуфэ ар ыгъэпыигъ.
30Фылист дзэпащэхэр зэонэу къежьэхэ къэси, Саул идзэ къулыкъушӀэ пстэумэ анахь акъылышӀоу Даут ренэу зекӀощтыгъэти, ищытхъу дахэ чыжьэу Ӏугъэ.
Currently Selected:
Апэрэ Самуел 18: АдыТГ
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2002-2023
