Rooma 15

Masiix misaal

1Nanu sirii imaan-le marak, imaan tanto le mara xatno kinni nolle tanem kibah, ninne xedenishno maki. 2Nottaako ummanti ni zoobatti caro ciloh, mecaani akah abneh kaa xedenishno. 3#Zaabur 69:9Tamaa: “Kottah waatima marahi waato yottalle obte” yarhxiinim akah tunkuttubeh taneekah, Yeesus ishe mixedenisho. 4Tamaa Kutuubko geytima curtayyo kee aydukumusnan araxah cag abinno ciloh kinni, kalxa tunkuttubem inkoh ni santoh yunkuttubem. 5Curtayyo kee aydukumusnan Yalli, Yeesus Masiix arax kataytan, sinne-sinneh inkidde akah martan samara sinah yaxaw. 6Tayim lel Maddara kin Yeesus Masiix Yalla kee Abba inkidde inki xangalah kee inki dhawah taynaboona ciloh kinni. 7Tamaa Masiix Yallih nabneh akah sin kabbaateekah, sittiya kabbata.

Masiix Yahuud kee Aki-marahi cag

8Masiix tamaa abbubuh yomxoye cag yaysabato, ciloh Yalli lel umun kinam yayballaw ciloh askok-kalum abe marahi khaddaam yekkem sinah warisha. 9#2 Saamiyeel 22:50; Zaabur 18:49Amayim lel Aki-mari kaa raxmah Yalla yaynaboona ciloh kinni.

“Aki-marahi addadde ku faylisho,

kee ku migacalle fayla qannisho kiyo”

yarhxiinim tunkuttubeh tane. 10#Gabbaacime Sercat 32:43Gabbaaceh lel:

“Ko Aki-maraw,

kaa xiyawlih tekkiinih xedena”

yarhxe. 11#Zaabur 117:1Kataysheh lel:

“Inkoh Aki-marak, Maddara faylisha,

umbuka xiyaw lel kaa yassakaatoona”

yarhxe. 12#Isayas 11:1,10Malammih lel Isayas: “Yishxayko radati yamaato kinni,

usuk uguteyaako Aki-marahi bukalle reezo kinni,

Aki-mari lel kayyadde cag abitoona kinon”

yarhxe. 13Quddus kin Ufayehi xaylah sin cag meceetih yanabo ciloh, amaa cagti Yalli umbuka kayyah teemeniinimih xeden kee salaamah sin yamagoo.

Bawlos Aki-maralle yemeete fartotta

14Yi saculo, mecaaniiko temmeegiinih, umbuka irhgah sittiya asuuso dhiica mara kitiinim anu inneh meceetih eemeneh aniyo. 15Wuliilim sin xunsuuso, Yallaako yoh tomxoye nicmah sabbatah cadimbililih sinalle uktubeh aniyom, 16Aki-maralle Masiix kin Yeesus khaddaam akko ciloh kinni. Amayim lel, Aki-marahi muttuxuwa Yallah kabbaatimto kee Quddus kin Ufayeh tinqiddisem takko ciloh, shekh ekkeh Yallih mece ware akhdume. 17Amaydo, Yallih khaddaam kiyomuh Masiix kin Yeesusuh cafado inni gar liyo. 18Aki-mari Yalla akah yaabbiiniikah akko abo, Masiix yi waani kee abittohi araxah abayshemko bextih anu akimidde waanisho mirhiica. 19Tayim lel, ishaarar kee bexsishshamhi xaylah, Yallih Ufayehi xaylah tekkem kinni. Amaymih, Yerusaalemko erherhisheh, aykee Illirikon fanah Masiix mece ware kaamilik warroysheh aniyo. 20Aketti masarratalle ginamko ciloh lel tamaa Masiix migac alle miggacoyinnixelle mece ware warroysho naba farhi liyo. 21#Isayas 52:15Taginah lel tunkuttubem tane:

“Tamaa kaa zacabah ware hin mari yabloona kinon,

tamaa kaa zacabah aabbinnixe mari lel yafhamoona kinon.”

Bawlos Rooma yadaw yixiggire

22 # Rooma 1:13 Tayimhi sababah kinni sin fanah amiitemko mango-le gedda deesimem. 23Kado laakin, kamboh ta zoobaballe alle akhdume makaano mitane, sinalle amaato lel mango iggidit hambereerak sugemhi sabbatah, 24Ispaaniya adiye gedda tillaabak sinadde boodo kiyo. Dago gedda sinlih sugeh xedenek sarrah lel, atin meceetih yi sukuukuytoona cag liyo. 25#1 Korintos 16:1-4Kado laakin, Yerusaalemille yane yinqiddise marah solaadi beyeyaako aduuk aniyo. 26Makedooniya kee Akhaaya, Yerusaalemille yinqiddise marahi addadde yane hin-marah xato yaxaynim yikxiniinih yanin. 27#1 Korintos 9:11Eedo kinamhi sabbatah lel rummah yikxiniinih yanin. Aki-mari Ufayi barakä tenlih yengeliinik sarrah, usun lel maroona ten farhshishshamah tena yakhdumiinim akah eedda. 28Amaydo, anu tayim abayshah, tekettem tena gudduusa gedda, sinalle emeeteh Ispaaniya adaw kiyo. 29Sinalle amiite gedda lel, Masiix barakäh emmeegeh amaato kiyom aarhige. 30Yi saculo, ni Maddara kin Yeesus Masiix kee Ufayi kaxanoh, yottaalih tekkiinih Yallalle yottah dhaacoh yottaalih tandafaloona sin amaanatishak aniyo.

31Yahuudiyalle yane aamininnixe maraako dhawrhumo kee Yerusaalemille aba khidma amalle yane yinqiddise mari kabbaatoona dhaaco yoh aba. 32Amayim lel, Yallih farhih xedenlih sinalle emeeteyaako sina goruh abiteh acrafo ciloh kinni. 33Salaam Yalli umbuka sinlih yakkoo. Amin.

Currently Selected:

Rooma 15: SCC

Highlight

Compare

Copy