Rooma 14

Sittiyalle mafradina

1 # Kolossay 2:16 Imaanalle tanto le tiya kaa kabbata kibah kaa mablolle alle mankaaxadina. 2Wuliti ummannim beeto dhiicamah yaamine tiya yakke gedda, imaan dagoti xalma bisa beeta. 3Tamaa beetati beetinnixe tiya ilaace wayo, tamaa beetinnixeti lel, Yalli kaa kabbaateh yanemhi sabbatah, beeta tiya afride wayo. 4Aketti khaddaamalle tafrado, atu miyatto kito? Usuk rade kee ugute yakkem ishi manabottih nifille kinni. Maddari kaa soolisho dhiicamhi sabbatah lel soolo kinni.

5Wuliti wuli lellec aki lellecko yashshem balih yable, wuliti lel umman lellec lemih yable. Ummanti kaa inkoh xangal akah yeemenem aba. 6Tamaa inki lellec xishmatati Maddarah arhxuk kinni abak yanem. Tamaa beetati lel Yallah xamde yaddabbemhi sabbatah Maddarah arhxuk kinni beetak yanem; tamaa beetinnixeti gantah, Maddarah arhxuk xabayaako, Yallah xamde yaddabbe. 7Nottaako isheh arhxuk marati, isheh arhxuk lel raba tiyah nodde tanem male. 8Marnemko Maddarah arhxuk marna, rabnemko lel Maddarah arhxuk rabna. Amaydo, rabneh rabe wayneh, Maddarim kino. 9Masiix lel rabeh aniinalle akah gaxem, rabe mara kee yane marahi Maddara yakko ciloh kinni.

10 # 2 Korintos 5:10 Aymihi ishi sacalalle tafridem? Hido atu, aymihi ishi sacal ilactam? Nanu firdi makaano Yallihiyahi nifille inkoh daw-narhxo kino. 11#Isayas 45:23Amaymih:

“Anu aniyomuh, yarhxe Maddari,

umman gulub yoh gululluubo kinni,

umman anrab lel Yallah yaalamo kinni”

yarhxiinim tunkuttubeh tane. 12Amaydo, nottaako ummanti isheh abem Yallah warisho kinni.

Aketto mandafishin

13Amaydo, kamboh ninne-ninneh sittiya afride waynoo, laakin sacal araxadde andafo hido deeso takkem haynamko lel selinnoo. 14Akkinnannim xaraame takkem tamaa xaraame kinni yarhxeh yaxeesebe tiyalle kinni kibah, isheeko xaraame kinam mitanem Yeesus Masiix araxah eerhegeh eemeneh aniyo. 15Atu bettam ku sacalalle aziya bahtam yekkemko, kaxano aybulluuk mitanito. Tamaa Masiix akah rabe tiya, atu bettamah kaa maylayin. 16Amaydo, atin mecemih tabliinim aki mari akah ayrishaanaakah akko maabina. 17Yallih nigsinna xaqqe, maaxiyo kee cafad Quddus kin Ufayedde yaneyah kibah, beetaanam kee yaacubiinimih maki. 18Taginah Masiix yakhdume tiya Yalli kaa kixina, xiyaw lel kaa xishmatta. 19Amaydo, maaxiyo bahtam kee ninne-ninneh alle carnam kataynoo.

20Foloh arhxitin, Yallih ciyyo midumusina. Rummah ummannim xalaale kinni, akkinnan tiya beetamah kaa andafishaanam eeddam maki. 21Xazo beete wayaanam, hido wayni aacube wayaanam, hido farhinnannim ku sacal andafishshaya abe wayaanam, mecem kinni. 22Atu lito imaan kotta kee Yallahi fanadde yakkoo. Rumma kinni yerhxeh abemih isheh ishe afridinnixeti barakä-le tiya kinni. 23Yakko kibah, lammaa-garbitak beetemko, tamaa betto imaanah maabinnamhi sabbatah yanqitstsice. Amayim lel imaanah akke waytem zambe kinamhi sabbatah kinni.

Currently Selected:

Rooma 14: SCC

Highlight

Compare

Copy