Rooma 16

Salaamta

1Feeben ni sacla, Kenkhereyaati kaniisadde takhdumeya sinalle amaanatisha. 2Tamaa yinqiddise mari akah kabbaatimoona missil araxah Maddari migacalle tee kabbattoona kee sinko farhinnannim tee xattoona sinak farha. Amayim lel, anu adde gaxak, mango marah naba xato kuuk sugtemhi sabbatah kinni.

3 # Fartottit hi Abittot 18:2 Tamaa Masiix kin Yeesus khidma yottaalih tangale Biriskilla kee Akiilak salaamat akko yoh erhexa. 4Usun yottah sinni fillit tillaabishe mara kinonyaako, anu bisa maki ten cawwatoyshitamki, umbuka Aki-marahi kanaayis gantah ten cawwatoyshitan. 5Ten caredde takatte kaniisak yakkeedo salaamat akko yoh erhexa. Aasiyaati zoobälle umman maraako basolle Masiixih yeemene kixiniyo Ebaynetosuk salaamat akko yoh erhexa. 6Sirii ginah mangum sinah tukhdume Maryamak lel salaamat akko yoh erhexa. 7Yottaalih xabshedde yine Andaronikos kee Yuniya, yi zamad kinyak salaamat akko yoh erhexa. Usun fartottit meceetih ten yaarhigiinih, yottaako basolle lel Masiixih teemenem kinon. 8Yi Maddarih araxah kixiniyo Ambaliyatosuk, salaamat akko yoh erhexa. 9Masiix khidma nottaalih tangale Urbanos kee kixiniyo Istakhusuk salaamat akko yoh erhexa. 10Masiixih arhxuk cakanaako tillaabe Abeelleesik salaamat akko yoh erhexa. Aristobulosti dikik salaamat akko yoh erhexa. 11Yi zamad kin Herodiyonuk salaamat akko yoh erhexa. Maddarah taamine Narkissos dikko kin marak salaamat akko yoh erhexa. 12Sirii ginah Maddarah tukhdume Turifayna kee Turifoosak salaamat akko yoh erhexa. Sirii ginah mangum Maddarah tukhdume kixiniyo Bersisik salaamat akko yoh erhexa. 13#Markos 15:21Tamaa Maddari doore Ruufosuk, tee ina, yottah gantah ina balih kuuk tineyak yakkeedo salaamat akko yoh erhexa. 14Asunkiritos, Filegoon, Hermees, Batrobas, Hermas kee tenlih tane saculuk salaamat akko yoh erhexa. 15Filologos, Yuuliya, Neereyus kee kaa sacla, amayim balih Olumbas kee inkoh tenlih tane yinqiddise marak salaamat akko yoh erhexa. 16Atin lel tinqiddise fugtoh sittiyak salaam-erhexa. Masiix kanaayis lel inkoh salaamat sinak yarhxe.

Abayshimat fawo kee salaamta

17Yi saculo, atin tudrusin darsehi diddeh babbarhishnan kee andafof aba maraako mirix akko tarhxoona sinalle amaanatishak aniyo. Akko zeelita! 18Amayim lel ta gina-le mari, sinni farhi kibah ni Maddara kin Yeesus miyakhdumiinih kinni. Usun mece anrab kee zirabti faylah gar-hite marahi afcaadod doolaban. 19Sin thaaca ummanti yeerhegemhi sabbatah sinak xedeneh aniyo. Mecem kinamalle kas-le mara, umamko lel barii takkoona sinak farha. 20Maaxiyot Yalli, Sheethan sin ibahi geridde hayeyaako dafaco kinni. Ni Maddara kin Yeesus Masiix nicma sinlih takkoo.

21 # Fartottit hi Abittot 16:1 Khidma yottaalih yangale Timoteyos, salaamat sinak arhxuk yane; amayim balih yi zamad kin Luukiyos, Yasoon kee Soosibatros salaamat sinak yarhxin.

22Ta jawaab yuktube Tertiyosuk, Maddara kataa maraako inketta akah kiyookah, salaamat sinak arhxuk aniyo.

23 # Fartottit hi Abittot 19:29; 1 Korintos 1:14; 2 Timoteyos 4:20 Yotta kee umbuka ta kaniisa arxibishe Gaayos salaamat sinak yarhxe. Daafot solaadi yabbirhe Erastos kee Kowartos ni sacal salaamat sinak yarhxin. [24Ni Maddara kin Yeesus Masiix nicma sinlih takkoo! Amin.]

Faylat dhaaco

25Tamaa dherh mudda sucuteh suge, kado lel yumbulluwe mashthir balih, tamaa anu warroyshe mece ware kee Yeesus Masiix warroysham balih abeh sin yaysaraw dhiica Yallah nabne takkoo. 26Kado laakin caddoweh yane. Amaa nobowat kutuubhi araxah, umman geedit Yallahi amre balih, yeemeniinih yathaacoona, umbuka diikalle yimidhdhigeh yane. 27Ulah xikma-le Yallah, Yeesus Masiix araxah, umman gedda nabne takkoo! Amin.

Currently Selected:

Rooma 16: SCC

Highlight

Compare

Copy