Rooma 13

Reeza-le mara yaabbiinim

1Ummanti reeza-le marah yam-azzazoo. Yallih farhih akke wayemko, reeza mitane. Tamaa reeza-le mari yaneya lel Yallih araxah kinni reeza geyeenim. 2Amaydo, reeza-le marahi didde yakketi, Yalli baahemih didde akkuk yane, tayim aba mari lel sinnelle qitscat ullusak yanin. 3Manabottit umaani aba tiyaako kibah, mecaani aba tiyaako mimashshiitaana. Reezalle yane tiyaakohi mashshiiko barii takko fadhdha? Amaydo, mecem ab, usuk lel ku cawwatoyshito kinni. 4Amayim lel usuk ku nafaacah Yallih khaddaam kinamhi sabbatah kinni. Usuk foyyah sef miyakkitiyemhi sabbatah, umaani abtemko mashshit. Usuk Yallih khaddaam kinamhi sabbatah, umaani aba tiya yaqhtsaco Yallih kura yaaqhuce tiya kinni. 5Amaydo, akkinnanti Yallih kuraako raaco bisa akkekkah, kaa afcaadohi dhaw akko yarhxemih yam-azzazo kaalle tane. 6#Maatiyos 22:21; Markos 12:17; Luukas 20:24,25Tayimhi sababah kinni wirko taxaynim, ta reezon ta ciyyodde gaba hayenim lel Yallih khaddamte kinoonih kinni. 7Ummanti alle-alle tanem aboo: wirko akah missil marah wirko uxuwa, gibri akah missil marah gibre uxuwa, mashshitimo missil mara mashshita, xishma akah missil mara xishmata.

Kaxani araxah sercat yaskimiliinim

8Sittiyahi kaxanooko bextih, akettoolih cida maallina, aketto yakxineti lel sercat yiskimileh yane. 9#Muuca 20:13-15,17; Gabbaacime Sercat 5:17-19,21; Leewiiti Sheekhino 19:18 Amri: “Maznayin, magdafin, migaracin, garinam miduumutin” akah yarhxeya kee aki amre: “Ishi zoobatto ishe balih ikxin” yarhxe amredde yeketteh yane. 10Kaxani zoobatto miyaaziye. Amaydo kaxani sercat yaskimiliinim kinni.

11Waqhte taarhigiinimhi sabbatah, tayim abanta. Atin dhinko adde uguttan saaca gufteh tane. Tamaa adde neemene geddaako ziyaada, garger kado kab noh yerhxeh yane. 12Bar bakiteh maaxi kab-yerhxeh yane. Amaydo, ditet ciyyo xabneyaako, ifi aslaxa sarita. 13Cibdaan kee sakarah, uma-xibar kee bacaalaginoh, zagaxa kee ashshiinoh akkekkah, itre balih araxalle nadawo. 14Maddara kin Yeesus Masiix sarita kibah, sinni xazottahi farhi abtoona maaxaasabina.

Currently Selected:

Rooma 13: SCC

Highlight

Compare

Copy