Waxye 22
22
Aniinat nahaar
1 #
Yexetsqeel 47:1; Zakariyya 14:8 Sarrah amaa malaykatti Yalla kee amaa Leemahi nugus-kurseeko yawce cadoo-dallucta balih lilic-yarhxe aniinat layehi nahaar yi yuybulluwe. 2#Erhedhdhö 2:9; Yexetsqeel 47:12Amaa daafohi shaaric fantaako lel weecishak yine. Amaa nahaar lamma carhaako lel alsa alsah daro baahak iggidalle lamman kee taman waqhtiya daro bahta aniinat xarha tine. Amaa xarhahi dharhaa lel wathun urusak yine. 3#Zakariyya 14:11 Kamboh abaaro tannaw makiiki, Yalla kee amaa Leemahi nugus-kurse amalle yannawna kinon. Kaa khaddamte lel akah yacbadoona kinon. 4Usun kaa nif yabloona kinon, kaa migac lel ten dambaralle yannaw kinni. 5#Isayas 60:19; Daaniyeel 7:18Kamboh bar yannaw maki. Maddara kin Yalli ten ifo yakko kinamhi sabbatah, faanus ifo hido ayro ten farhshiisho maki, usun lel umman gedda kee umman gedih yangasoona kinon.
Yeesus amiituk yane
6Amaa malaykatti lel tahe yok yerhxe: “Ta waani yaaminiinim kee rumma kinni. Nobowat ufayehi Maddara kin Yalli, ta dhaye geddadde ayim takko lem ishi khaddamte yayballaw ishi malaykatto dhirhiyeh yane.”
7“Taykiyo, dheh amiitiyuk aniyo. Ta kitaabadde nobowa waanisheenih yanin waani dhawrheti lel barakä-le kinni” yok yerhxe.
8Anu, Yohannis kiyoyak, tayim yoobbeh yuble tiya kiyo. Tayim oobbeh uble gedda lel, tayim yi yuybulluwe malaykattoh akah acbado erhxeh kaa gerille kume. 9Laakin: “Atu amayim abto kolle mitane! Anu kotta kee ku sacul kin nobowa, amayim balih ta kitaabhi waani dhawrha marahi zoobatto kin khaddaam kinni kiyom. Atu Yallah ucbud” yok yerhxe.
10Yok yerhxe lel: “Amaa waqhti kab-yerhxeh yanemhi sabbatah, amaa nobowat waani ta kitaabhiya maxtamah abteyaako maalifin. 11#Daaniyeel 12:10Amaa umati umam aboo, abaxeti abaxtem aboo, xaqqi-wanna xaqqe aboo, amaa yinqiddiseti lel yinqiddise tiya yakkoo.”
12 #
Isayas 40:10; 62:11; Zaabur 28:4; Ermiyaas 17:10 “Taykiyo, anu dheh amiitiyuk aniyo, umman tiyah kaa-kaa abittot hi casbe inneelih baaheh akah axawo kiyo. 13#Waxye 1:8,17; 2:8; Isayas 44:6; 48:12Anu Alfa kee Oomeega, erhedhdho kee sarroorimto, erherha kee abayshima kiyo.”
14 #
Erhedhdhö 2:9; 3:22 Amaa aniinat xarhadde xaqqe yaalloona kee amaa daafodde carufko oroboona ciloh sinni sara cakalisha mari barakä-lem kinon. 15Irolle yane mari lel kaara, shirxe aba mara, uma-xibarlit, nabsi-wannun, asnaamah tacbudem kee zirab kixinah aba mara kinon.
16 #
Isayas 11:1,10 “Anu, Yeesus, tayim amaa kanaayisidde sinalle warroyisho inni malaykatto dhirhiyeh aniyo. Anu Dawud rimidda kee kaa zaraako kiyo, amaa ifisha maaxi xutukta lel kiyo.”
17 #
Isayas 55:1
Ufaye kee cibna lel: “Amo” yarhxin. Amaa yaabbeti lel: “Amo” yarhxoo. Bakhaarati lel yamaatoo; farhati amaa aniinat layeko amaa ginah bishshiitoo.
18 #
Gabbaacime Sercat 4:2; 12:32 Ta kitaabhi nobowat waani taabbemik lel umman tiya asuusak aniyo: akkinnanti adde osemko, Yalli ta kitaabadde xussumteh tane bala akah oso kinni. 19Akkinnanti ta nobowat waanih kitaabko inkim akko yuynuqhusemko, ta kitaabadde xussumteh tane aniinat xarha kee amaa tinqiddise daafodde leya gideeko akko yaynaqhaso kinni.
20Tamaa taymih yashhideti: “Thummutuh anu dhaye geddadde amiitiyuk aniyo” yarhxe. Amin. Amo, Maddara kin Yeesuso!
21Maddara kin Yeesus hi nicma umman tiyaalih takkoo. Amin.
Currently Selected:
Waxye 22: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
