Waxye 20

Shiix iggidiya

1Sarrah wuli malaykatti carsheeko oobak uble, ishi gabadde lel adda dherh boozohi maftix kee naba katiina luuk yine. 2#Erhedhdhö 3:1Amaa malaykatti lel amaa kalxit caroora, ibliis kee Sheethan kinya gaabbaa yibbirheyaako shiix iggidiya yurhuwe. 3Tayek sarrah amaa shiix iggidiya abayshimandah amaa wathun doolabamko ciloh lel amaa adda dherh boozodde tee cideyaako adde alifeh amadde tee yuxtume. Amaymik sarrah lel dago gedih yawco alle tane.

4 # Daaniyeel 7:9,22 Amaymik sarrah, nugus-kuraasi uble, alle defeyeh yine marah lel yafradoona reeza akah tomxoyeh tine. Yeesus kee Yallih waanittahi shahaadah tumruxxudemhi wafa lel uble. Usun amaa alluulatto hido kaa misleh macbadinnooni, kaa maxtam sinni dambarak hido sinni gabubuk mikabbaatinnooni. Tenalle wafa alle gaxteyaako Masiixlih shiix iggidiya reezen. 5Amaa ractem rabteya lel aykee shiix iggidiya abayshimandah wafa alle migaxinna. Tayim erherh rabaakohi ugut kinni. 6Erherh rabaakohi ugutudde yangaleti barakä-le tiya kee yinqiddise tiya kinni. Malammit rabi ta gina-le marahi bukalle xayla maleya, laakin usun Yalla kee Masiix sheekha yakkoona kinon, kaalih lel shiix iggidiya reezoona kinon.

Sheethan yimsiccire

7Amaa shiix iggidiya abayshima gedda, Sheethan ishi xabsheeko yawco kinni. 8#Yexetsqeel 7:2; 38:2,9,15Tamaa baarhot affara nukurulle yane Goog kee Maagoog akko yarhxin wathun doolabo kee dhibah ten yaskataw lel yawco kinni. Ten manga lel badti xootsah hidhdha kinni. 9Usun baarhot fidin dudubulle yomfoororiinih lel amaa yinqiddise marahi macaskar kee tinkixxine daafo makaren. Laakin gira caranko obteh ten bakte. 10#Daaniyeel 7:9-10 Amaa ten doolabe ibliis lel amaa alluulatto kee zirabti nabii adde yine girat igil kee kirbitidde ciddite. Umman gedda kee umman gedih lel bar kee lellecih cazaab yabloona kinon.

Abayshimat firde

11Sarrah naba cado nugus-kurse kee kayyalle defeye tiya uble. Baarho kee caran lel kaako kudaanah yadiin, tenah takke cara lel migeytiminna. 12Rabtem, nabam kee cindham lel amaa nugus-kursehi nifille daw-yerhxiinih uble, kitob lel fakkiteh yine. Sarrah aki kitaab fakkite, usuk lel aniinat kitaab kuuk yine. Amaa rabe mari lel amaa kitobulle akah tunkuttubeh tineekah, sinni-sinni abittot balih amfirriduk yinin. 13Bad lel kaa addadde tinem rabteya yoxoye, Raba kee Hadees lel ten addadde tinem rabteya yoxoyin, usun lel sinni-sinni abittot balih yimfirridin. 14Sarrah Raba kee Hadees girat igilidde cidditen. Ta girat igil lel malammit raba kinni. 15Akkinnanti amaa aniinat kitaabadde migac akko geytime wayemko, amaa girat igilidde cidditak yine.

Currently Selected:

Waxye 20: SCC

Highlight

Copy

Compare