Waxye 14

Leema kee bool kee marootom kee afar shixtiya

1 # Yexetsqeel 9:4; Waxye 7:3 Sarrah kulux-erhxeh, taykinna, amaa Leemi Tsiyoon koomak daw-yerhxeh yine, kaalih lel kaa kee kaa Abbahi migac dambaralle akko yunkuttube bool kee marootom kee afar shixtiya yinin. 2Carshelle lel mango laye hi goroxnan kee dhacuma angud hi dhaw oobbe. Tamaa anu oobbe dhaw lel xiyaw yaatukin kiraar hi dhaw luuk yine. 3Usun amaa nugus-kurse, affara ufayletta kee naba marahi nifille nazme abak yinin. Amaa baarhooko gargeerime bool kee marootom kee afar shixtiya bextih lel amaa nazme walaa inketti labcaado taane. 4Dhaggitinnixe mara kinoonimhi sabbatah lel ta mara kinni sayyoolih sinne caynishinnixe mari. Ta mara kinni alle adiinnanille Leema kataytam. Usun Yalla kee amaa Leemah afti daro yakkoona xiyawko gargeerime mara kinon. 5#Tsefanya 3:13Abar hin mara kinoonimhi sabbatah lel ten afadde zirab adde misuginna.

Adooxa malaykattohi farto

6Sarrah, aki malaykatti akkanih caranalle firiirixitak uble, usuk tamaa baarholle martamah, umman wathun, kishosh, waani kee xiyawah warroysho umman geedit mece ware luuk yine. 7Usuk lel wac-yerhxeh: “Yalla mashshitteenih kaa eyneba, amayim lel kaa firdehi saaca temeeteh tanek lel caran, baarho, bad kee layet raxeena yukhluqhe kayyah akah ucbuda” arhxuk yine.

8 # Isayas 21:9; Ermiyaas 51:8; Waxye 18:2 Aki malammit malaykatti, lel kataysheh: “Tamaa ishi uma-xibar hi farhih waynih umbuka wathun tiysikire naba Baabiloon radde, radde” arhxuk yine.

9Aki maddaxit malaykatti lel, wac-yerhxeyaako tahe yerhxeh adde kataye: “Ta alluulatto kee kaa misleh acbudinnanti, ishi dambarak hido lel ishi gabak maxtam kabbaatinnanti, 10#Isayas 51:17; Erhedhdhö 19:24; Yexetsqeel 38:22 usuk Yallih kurahi wayniiko gantah yaacabo kinni. Ta wayni lel walaa inkim adde angalekkah kaa kurahi kobbaayadde culeenim kinni. Tayim aba mari lel, quddus kin malaykut kee amaa Leemih nifille gira kee kirbitih bixna-yabloona kinon. 11#Isayas 34:10Amaa bixna ten taybulluwe girahi tiki lel umman gedda kee umman gedille aganalle yawce. Amaa alluulatto kee kaa misleh yacbude mara kee kaa migac hi maxtam kabbaatinnan mari, bar kee lellecih curfen malooni.”

12Tayim lel Yallih amre kee Yeesus imaan dhawudhdhe tinqiddisem, curtayyo abitoona takke deeco kinni.

13Carsheeko lel wuli dhaw: “Tayim uktub: kadok sarrah Maddari araxalle rabtam barakä-lem kinon” arhxuk oobbe. Yallih Ufayi lel: “Rummah barakä-lem kinon. Ten abittot tenlih yadiyemhi sabbatah sinni xawalko yacrafoona kinon” yerhxe.

Baarhot orba

14 # Daaniyeel 7:13 Sarrah kulux-erhxeh, taykinna, cado darur kee darurudde defeye xiyawti barhah iggidin tiya uble. Amok dahab bor, gabadde lel lillig maczit luuk yine. 15#Yoo-eel 3:13Aki malaykatti lel macbadko yewceh, amaa darurtalle defeyeh yine tiyak wac-yerhxeyaako: “Ciyyot waqhti gufeh, baarhot orba lel meceetih gufteh tanemhi sabbatah, ishi maczit beyteh iciyyii” yerhxe. 16Amaymih, amaa darurtalle defeyeh yineti ishi maczit baarholle dhirhiye, baarho lel timciyyiye.

17Aki malaykatti lel carshelle yine macbadko yewce, usuk gantah lillig maczit luuk yine. 18Amaa mazbaxko lel gira yagziye aki malaykatti yewce. Amaa lillig maczit le tiyak lel wac-yerhxeyaako: “Amaa cinab dhage alayteh tanek, ishi maczit beyaaki amaa baarholle yane cinab tigriceh nacreh eskettaa” yerhxeh akah deecime. 19Amaymih, amaa malaykatti amaa maczit baarholle dhirhiyeh, amaa baarholle yine cinab yesketteyaako, naba Yallih kurahi naba cinab matsmaqhadde cide. 20#Isayas 63:3; Xazan 1:15; Waxye 19:15Amaa cinab lel amaa daafok irolle yuntsummuqhe, amaa biili faras lugam gufandah amaa cinab adde yatsmuqhin caraako xarhiteh, adooxa bool kiilometer takkem yedee.

Currently Selected:

Waxye 14: SCC

Highlight

Copy

Compare