Waxye 13

Afti alluulatto

1 # Daaniyeel 7:3; Waxye 17:3,7-12 Wuli alluulatti badko awcuk uble, usuk tamana gashsha kee malxina amo luuk yine, amaa gashshushuk lel tamana cindhadhdhaa erherharh le bor, amomuk lel Yallahi waatohi migoc luuk yine. 2#Daaniyeel 7:4-6Tamaa anu uble alluulatti lel qabictah higgiduk yine; kaa iboobi dibbiitimih higgiduk yine, kaa af lel lubak tiyah higgiduk yine. Ayyih gaabbaa lel kayyah ishi xayla, ishi nugus-kurse kee naba reeza akah yoxoye. 3Kaa amomko tiyä lel rabi guddussa biyaake luuk tine, amaa rabi guddussa biyaake laakin akah urteh tine. Umbuka caalam lel cibrah rabak sarradde akko katayen. 4Usun lel amaa alluulattoh reeza toxoyemhi sabbatah amaa gaabbaah akah yucbudin. Usun amaa alluulattoh akah yucbudiinih: “Ta alluulattoh iggidin tiyah miyatti yane? Miyatti lel aalih yassarhaabarho dhiica?” arhxuk yinin.

5 # Daaniyeel 7:8,25; 11:36 Amaa alluulattoh amnonobbaati waani akah waanishah, Yallah akah waatima af akah yomxoyeh yine, ishi reeza marootom kee lamma alsiya yatnaafaco lel izni akah yomxoyeh yine. 6Yallah waatimo, kaa migac kee kaa sigimah, amayim balih amaa carshelle martamah waatimo ishi af faake. 7#Daaniyeel 7:21Amaa yinqiddise maraalih dhibbaw kee ten yascaro izne geyeh yine. Umbuka kishosh, xiyaw, waani kee wathunhi bukalle lel reeza akah tomxoyeh tine. 8#Zaabur 69:28Baarho ankhulluqhekkahko taahe tamaa yumruxxude Leemahi aniinat kitaabadde ten migoc akko ankuttubinnixe mari inkoh baarholle martaya akah yacbadoona kinon. 9Cokka aallinnanti yaabboo:

10 # Ermiyaas 15:2; 43:11 Akkinnanti yamxabbasho yekkemko,

xabshedde yadaw kinni;

akkinnanti sefih rabo yekkemko,

sefih rabo alle tane.

Tayim lel yinqiddise marahi curtayyo kee imaanhi deecoh takkem kinni.

Malammit alluulatto

11Aki alluulatti lel baarhooko awcuk uble. Usuk maruu balih lamma gashsha luuk yine, gaabbaa balih lel waanishak yine. 12Usuk tamaa afti alluulattohi reeza inkoh kaa idhdhadde atneefecuk yine. Baarho kee teyalle martam lel tamaa raba guddussa biyaake akah urte afti alluulattoh akah yacbudiiniikah aba. 13Usuk naba ishaarar aba tiya kinni, caranko gantah gira baarholle tane xiyawhi nifille akah obtaakah abak yine. 14Amaa baarholle martamah lel amaa sefih rabeh ure tiyahi misle siraaxoona akah warishe. Amaa afti alluulattohi hidhdhadde abo izni akko akah yoxoye ishaarar abak ten doolabak yine. 15Inkinnah amaa afti alluulattohi misli waanisho kee inkoh amaa misleh acbudinnixe mara yagdafoona ciloh, amaa malammit alluulatti afti alluulattohi misleh wafa akah yaxaw izne geye. 16Amayim gantah inkoh cindha tiya naba tiyah, inkoh gaddaale kee baaxenta, inkoh finja-le kee garuzzo, mizgi gaballe hido dambaralle maxtam alle akah gaxaakah abe. 17Amayim lel tamaa alluulatti migac hido kaa migac hi nibro aalle wayemko, walaa inketti dhaamo hido yaabaxo akah wayaakah kinni. 18Tayim kas farhshishsham kinni: amaa alluulattohi nibro xiyaw nibro kinnik, dhiicati yaxaasaboo. Amaa nibro lel 666 kinni.

Currently Selected:

Waxye 13: SCC

Highlight

Copy

Compare