Cibraan 7

Malkitsedeqhti Sheekhino

1 # Erhedhdhö 14:17-20 Malkitsedeq Saalem nugus kee Nabamko Naba Yallih shekh kuuk yine. Abraahim amaa nuguusa dhacumaatih yiscireh gaxak, akah garayeh dhaaco akah abe. 2Abraahim lel ummanimko taman-ya af akah yoxoye. Erherhih, kaa migac hi macna: “Xaqqi nugus” yarhxiinim kinni, malammih lel Saalem nugus kinni, tee macna lel: “Salaam nugus” yarhxiinim kinni. 3Usuk abba male, ina male, waalido male, waqhti erhedhdhö yakko aniinat abayshima male, laakin Yallih Barhah yimmingideh umman geedit shekh yekkeh mara.

4Abbubti naba tiya kin Abraahim gantah tamaa boylah beye limo nabamko taman-ya af akko akah yoxoyeya, ta xiyawti ayidhdha naba tiya kuuk yinem ubula! 5#Cadad 18:21Tamaa Leewiiko rada mari sheekhino kabbattaya, amaa ten sacul kin xiyawko, taman-ya af bishshiitoona sercatadde amre lon. Yakko kibah, ta mari gantah Abraahimko raddam kinon. 6Malkitsedeq laakin, Leewiiko ooba tiya maki hanuk, Abraahimko taman-ya af kabbaate, amaa wacde luuk yine kayyah lel dhaaco akah abe. 7Dhaaco akah abanti lel cindha tiya kibah naba tiya makinam wagro fadhdham maki. 8Wuli ginah tamaa taman-ya af beytam rabi ilaala mara kinon, wuli gabooko laakin, umman geddah mara tiya kinam akah yishhidinti gantah beya. 9Tamaa isheh taman-ya af kabbaata Leewi gantah Abraahim araxah taman-ya af yoxoye gantah narhxo dhicna. 10Amayim lel, Malkitsedeq Abraahim geye gedda, Leewi yoobokeh miyinemhi sabbatah kinni.

Yeesus kee Malkitsedeqhti sheekhino

11Tamaa xiyaw kabbaaten sercat Leewiiti sheekhinohi araxah kuuk yineya, naqhuse hin tiya kuuk yineh yakkeedo, Haaruun balih akkekkah, Malkitsedeq balih kin aki shekh yamiitem aymih fadhdhishimte? 12Sheekhinodde badali yakke gedda, sercatadde gantah badali yakkem fadhdhishimta. 13Tayim kaa zacabah akko waanishenti aki kishooko kinni, ta kishooko walaa inketti mazbaxalle akko yukhdumeh miyaarhige. 14Ni Maddari Yahuudaati kishooko radam mudhdhug kinni, ta kishohi zacabah lel Moosa walaa inkim marhxinna.

15Malkitsedeqhih iggidin aki shekh yamiite gedda lel tayim meceetih tamadhdhago kinni. 16Usuk shekh akah yekkem, tamaa sugte xiyaw dhintohi araxah akkekkah, alayinnixe aniinat xaylah kinni. 17Amayim lel:

# Zaabur 110:4 “Malkitsedeq balih,

atu umman geedit shekh kito” yerhxeh yishhidemhi sabbatah kinni.

18Wuli ginah lel, tamaa basoohit amri rukut tiya kee amficinnixe tiya kuuk yinemhi sabbatah raaceh yane. 19Amayim lel, sercat walaa inkimik naqhuse hinam akko abo mirhiicamhi sabbatah kinni. Wuli gabooko laakin, nanu Yallalle akah nandhawwo dhicna, yashshe cag geytimemhi sabbatah kinni.

20Dhiiwa hinnim laakin kuuk miyine. Tamaa basoh sheekha yakke mari dhiiwa hinnim akkuk yinin. 21Tati laakin tamaa tahe akko yerhxe tiyahi araxah dhiiwaalih kinni shekh yekkem:

# Zaabur 110:4 “Maddari dhiiwiteh yane

yaththaacaso lel maki,

atu umman geddah shekh kito.”

22Taymih lel Yeesus yashshe cahdi dhish yekke.

23Umman gedih sheekha yekkiinih maraanamko rabi ten deesak tinemhi sabbatah, basoohit sheekha mango mara kuuk yinin. 24Usuk laakin umman geddah yanemhi sabbatah, umman geddah shekh yekkeh maro kinni. 25Amayimhi idhdhah, usuk akah tillaabo umman geddah yanemhi sabbatah, tamaa kaa araxah Yallalle yemeete mara, kaamilik gargeero dhiica.

26Nanu lel ta gina-le, quddus kin, cagab-male, dhaggitinnixe, zambeeko mirix-yerhxe, agana carshelle lel xaf-yerhxe naba shekh ni farhshiisha. 27#Leewiiti Sheekhino 9:7Usuk inki geddalle umman gedih umman tiyah ishe yisiddiqhemhi sabbatah, tamaa naba sheekha balih, erherhih ishi zambeh, sarrah lel xiyaw zambeh arhxuk maaxi yamaato sadaqhat yaxaynim kaa mifarhshishsha. 28Sercat tamaa rukut marak naba sheekha aba, tamaa sercatko sarrah temeete dhiiwat canqara laakin, kaamil kin tiya umman geddah yekke Barhak naba shekh abta.

Currently Selected:

Cibraan 7: SCC

Highlight

Copy

Compare