Cibraan 11

Imaanah

1Kado lel imaan tamaa cag adde linom takko kinamah thummut nok aba, ambulluyinnixem tanem lel ni yashshimine. 2Kalxit mari lel kaa araxah kinni Yallih shahaada geyeenim. 3#Erhedhdhö 1:1; Zaabur 33:6,9; Yohannis 1:3Umbuka caalam Yallih waanittah tunkhulluqhem akah naarhigem imaan araxah kinni, ta kado nablem lel tambulluwemko siraaximtem maki.

4 # Erhedhdhö 4:3-10 Abeel imaanah kinni Qaayinko ziyaada tashshe sadaqha Yallah yoxoyem, kaa araxah lel xaqqi-wanna kinamah Yallaako shahaada geye, Yalli lel akah yishhideyaako kaa muttuxuwa kabbaate. Ishi imaanhi araxah lel, rabeh yane hanuk, kaddih waanisha. 5#Erhedhdhö 5:21-24Xanookh lel rabekkah imaanah aganalle kaa beyen, Yalli kaa beyemhi sabbatah lel migeytiminna. Kaa beyekkah lel Yalla xedenisheh yinemih shahaada akah tomxowweh tine. 6Imaan hinnim lel kayya xedenishaanam takkem maki, amayim lel Yallalle kab-arhxinnanti usuk yane tiya kinam kee kaa wagiya marah ten casbe akah yaxayem yaamano kaalle tanemhi sabbatah kinni. 7#Erhedhdhö 6:13-22Nuux lel, Yalli tamaa kaddih tumbulluweh sodhdhamhi zacabah kaa asuuseyaako, dhacuma Yallih mashshiilih ishi xawaz akah gargeera naba doonik imaanah siraaxe. Taymih caalam cadaleyaako tamaa imaanah yamiite xaqqe yiwrishe.

8 # Erhedhdhö 12:1-5 Abraahimih deeco akah tekke gedda, imaanah yim-izzizeyaako, tamaa miiraasah kabbaatole baarho fanah yedee. Yewce gedda lel awlalle aduuk yinem aarhuguk miyine. 9#Erhedhdhö 35:27Imaanah lel tamaa wacdi baarholle sigo yedeeyaako, godobotta yekkeh, kayya balih tamaa wacdi worosa kuuk yine Isxaaq kee Yacqooblih tenududde marak yine. 10Amayim lel, tamaa Yalli yisiileyaako siraaxe daafo masarrat leya ilaalak yinemhi sabbatah kinni. 11#Erhedhdhö 18:11-14; 21:2Saara lel tee waqhti tillaabeh yine hanuk, tamaa wacde akah yoxoyeti umun kinam teerhegemhi sabbatah soonoyitto imaanah xayla kabbatte. 12#Erhedhdhö 15:5; 22:17; 32:12Amaydo, tamaa qabri gimam gufeh yine tiyaako, mangah caranti xutuk kee badti gimamalle tane xootsa balih loyyiiminnixe dhaylo akko yoobokin.

13 # Erhedhdhö 23:4; 1 Warit 29:15; Zaabur 39:12 Ta mari inkoh imaanadde raben, tamaa wacde akah sayeenim lel mikabbaatinnooni, laakin amayim waacinaako yubliinih kabbaatenyaako, ta baarholle gerha kee duleenit kinoonim lel yeerhegin. 14Tayim tarhxe xiyaw tenah yakke dik wagiyak yiniinim mudhdhug kinni. 15Tamaa akko yewcin dikih hambereerak yiniinih yakkeedo, alle gaxoona caashir geye dhaarhen. 16Laakin, tamaa jannat tiya kin aki dik yashsheyah kinni hambereerak yaniinim. Amaydo, Yalli daafo akah yisqirribeh yanemhi sabbatah, ten Yalla yekkeh decsiimo mixoolashshiita.

17 # Erhedhdhö 22:1-14; 21:12 Abraahim cakanadde saye gedda, Isxaaq imaanah kinni sadaqhah yoxoyem, wacde kabbaateh yine hanuk lel, inkettak le ishi barha sadaqhah yoxoye. 18Amaa wacdi lel: “Isxaaq zaraako kinni ku migac xussuumo leyam” yarhxiinim kuuk yine. 19Usuk Yalli rabaako kaa uguso dhiicam yeerhegeh, rabaako ugutem balih yubleyaako malammih kaa kabbaate. 20#Erhedhdhö 27:27-29,39-40Isxaaq lel Yacqoob kee Ceesawuh tamaa niiroh takko lemih imaanah barakä geyoona dhaaco akah abe. 21#Erhedhdhö 47:31; 48:1-20Yacqoob lel rabo farhe gedda, ishi ilolle addiiduk cibaadah cunuuneyaako, Yoosuf cindham barakä geyoona inkeekettah imaanah dhaaco akah abe. 22#Erhedhdhö 50:24-25; Muuca 13:19Yoosuf rabo kab-yerhxe gedda, imaanah Israa-eel cindham Masriiko yawcoona kinoonim warisheh, ishi lafufhi zacabah lel masxassa yoxoye.

23 # Muuca 2:2; 1:22 Moosa yooboke gedda, carha mece zabalo kinam yubliinih, amaa nugus amreeko mashshiitekkah, kaa dhaltoyya imaanah adooxa alsa kaa sucusen. 24#Muuca 2:10-12Moosa yenebe gedda, amaa Fircawun barhahi barhah decsiimam imaanah xine. 25Amayimhi idhdhah, zambeelih dago geddahi raaxadde raaxassiitamko, Yallih xiyawlih bixna-yabliinim imaanah doorite. 26Usuk niiroohit casbe waacensiitak yinemhi sabbatah, Masriiti gaddaako, Masiix idhdhadde wattiimam naba gaddah yuble. 27Tamaa ambulluyinnixe tiya yublemhi sabbatah cursuusute, amaa nugus kuraako mashshiitekkah lel imaanah Masri xabe. 28#Muuca 12:21-30Tamaa riish yaylayti ten dhagamkohi ciloh, imaanah Faasigi cid kee biili anasnas abaanam erherhishe.

29 # Muuca 14:21-31 Israa-eel xiyaw Casa Badko kafin baarho balih imaanah akko taben, Masriiti xiyaw laakin amah aboona yicikkinin gedda yumundhucin. 30#Yehooshuca 6:12-21Yerikhooti qaana malxina max akko maklaliteenik sarrah imaanah radde. 31#Yehooshuca 2:1-21; 6:22-25Sharmuutha kin Rahab tamaa giba meceetih arxibishshemhi sabbatah, tamaa Yalla xine maraalih maalayinna.

32 # Yaxkume mara 6:11—8:32; 4:6—5:31; 13:2—16:31; 11:1—12:7; 1 Saamiyeel 16:1—1 Nuguusa 2:11; 1 Saamiyeel 1:1—25:1 Ayim arhxo kinni haye? Gidcoon, Baraak, Shimshoon, Yiftax, Dawud, Saamiyeel kee nobowat sabbatah sinah warisho waqhte akah maliyo. 33#Daaniyeel 6:1-27Usun imaanah nigsinnanko yimlikin, cadleh yuxkumin, tenah wacde akah sayeenim geyen, lubokti afuf alifen, 34#Daaniyeel 3:1-30girat xayla badishen, sefti afko yisillimin, sinni ruktadde yisriin, dhibadde lel xayla geyen, godobot maxaarho lel hadanen. 35#1 Nuguusa 17:17-24; 2 Nuguusa 4:25-37Saymari rabaako ugute sinni mara geyen. Gari laakin rabaako ugutak tashshe aniina geyoona ciloh, finja geyoona xineenih cazaab yublin. 36#1 Nuguusa 22:26-27; 2 Warit 18:25-26; Ermiyaas 20:2; 37:15; 38:6Gari lel ilaacimak kee sabciimak waaxelsiiten, katiinah yumudhdhuwiinih gantah yimxibbishin. 37#2 Warit 24:21Gari dhayitih yumuttukiinih raben, gari magaazah lammalle xazziimen, sefih lel rabak yinin. Ciido kee alat anud sariteenih hel-arhxuk yinin, carrazen, bixna-yublin, uma-bar yublin. 38Ta caalam tenah takke tiyä kuuk mitinemhi sabbatah, saxra kee koomamalle, baarhot gonnaani kee galubudde hel-arhxuk yinin.

39Tayim lel inkoh, ten imaanah shahaada akah tomxoye mara walaa yakkoona kibah, tenah wacde akah sayeenih yiniinim mikabbaatinnooni. 40Amayim lel Yalli nottah tashshem yisqirribeh yinemhi sabbatah, usun notta hinnim naqhuse hin mara yakkiinimko ciloh kinni.

Currently Selected:

Cibraan 11: SCC

Highlight

Copy

Compare