Cibraan 10
10
Masiix sadaqha inki gedda umman tiyah
1 Sercat tamaa tamaato le mecemhi silal kibah, isheh rummah tamaa yane maki. Tayimhi sababah lel tamaa sercat iggida-iggidah laklakalle tamxaye sadaqhah tamaa Yallalle kab-yarhxe marak naqhuse hinam caduruh akko abo mirhiica. 2Akke wayemko, tamaa yacbude mari umman gedih yimsiffiinih yakkeedo, tamaa aban zambeh ten niya ten cadale mirhaarhinna, sadaqha yaxaynim lel xabe dhaarhen. 3Laakin ta iggida-iggidah aban sadaqhadde zambi xunsus adde yane. 4Amayim lel awura kee dabelti biili zambe yascarhaw akkinnixem kinamhi sabbatah kinni.
5 #
Zaabur 40:6-8 Amayimhi idhdhah, Masiix ta caalamalle yemeete gedda, tahe yerhxe:
“Sadaqha kee muttuxuwa mifarhinnito,
laakin asiddiqhe nabse yoh tisqirribe.
6Xararishen muttuxuwa kee zambeh aban muttuxuwa
ku mixedenishinna.
7Amaa gedda anu: ‘Taykiyo, yi Rabbiyo, tamaa kitaab maqhaddamatalle yi sabbatah akah tunkuttubeh taneekah,
ku farhi abo emeeteh aniyo’” erhxe.
8Ta aganim yerhxe gedda: “Sadaqha kee muttuxuwa, xararishen muttuxuwa kee zambeh aban muttuxuwa mifarhinnito, ku gantah mixedenishinna” yerhxe, (tayim tamaa sercatalle akah tomxoyeh taneekah kinni). 9Malammih lel tahe yerhxe: “Taykiyo, ku farhi abo emeeteh aniyo.” Malammit tiya abittodde ashisho ciloh, afti tiya asac-ishe. 10Ta Yallih farhih lel inki gedda umman gedih, Yeesus Masiix nabsehi sadaqhahi araxah yinqiddise mara nekkeh nane.
11 #
Muuca 29:38
Shekh akkinnanti lel, maaxi yamaato ishi khidmah daw-arhxuk, tamaa caduruh zambe asac-ishinnixe muttuxuwa gabbabbaacah yaxaye. 12#Zaabur 110:1Masiix laakin, inki muttuxuwa umman gedih takkeya, zambeh arhxuk yoxoye gedda, Yallih mizgi gabooko defeyeh, 13aykee kaa nacabtoolitik kaa ibih dokka yakkiinindah ilaalak yane. 14Tamaa yinqiddiseh yane marak lel inki muttuxuwah abeh umman gedih naqhuse hin mara akko abeh yane.
15Quddus kin Ufayi gantah ni shaahid kinni; tahe lel yarhxe:
16 #
Ermiyaas 31:33
“To maxak sarrah, ta cahde kinni tenlih abo liyom,
yarhxe Maddari:
inni sercat ten afcaadodde hayo kiyo,
ten xangaladde lel aktabo kiyo”.
17Osah lel:
#
Ermiyaas 31:34
“Ten zambe kee ten sercat-maliini ciyyo lel kamboh azzakkaro makiyo.”
18Tayimhi cafuuka alle tanelle, ta zambeh arhxuk aban muttuxuwa kamboh mitane.
Imaan araxah kaamil kin thummut geyaanam
19Amaydo, yi saculo, Yeesus biilohi araxah tamaa ummanimko quddus kin makaanodde orobnamhi fidbe neellek sarrah, 20tamaa usuk ishi nabsehi araxah noh faake golodde cusub aniinahi arax geynek sarrah, 21Yallih carehi bukalle lel naba shekh neellek sarrah, 22#Leewiiti Sheekhino 8:30; Yexetsqeel 36:25 ninni afcaado uma niyaako anasnasah qarcoyishneh, ninni nabse tsitstsii layeh cakalishnemhi sabbatah, mece niya kee imaanah yamiite thummutuh kab-narhxoo. 23Tamaa wacde noh sayeti umun kinamhi sabbatah, xumuu-arhxekkah ninni caghi shahaadalle nasbatoo. 24Ninne-ninneh lel kaxano kee mece ciyyolle sittiya akah uguugusnaakah abnoo. 25Tamaa xiyawko gari labcad akko abeenih yaniinim balih akkekkah, inkidde yakattiinim mixabinantaaki, tamaa max kab-arhxuk yanem ziyaada inkoh ablitin, sittiya aydukumusanta.
26Rummaahit irhga kabbatnek sarrah macal kee magoh zambe abaanam katattayishnemko, kamboh zambeh takke sadaqha mitaneeki, 27#Isayas 26:11xiyaa mashshiisha firde kee tamaa Yallih cangit bakto le dhacuma gira kinni ilalnam. 28Moosat sercat yarhxem xininnanti, naxrurta hinnim lamma hido adooxa shaahid alle yakkiinih raba. 29#Muuca 24:8Yallih Barhadde yeeceteti, tamaa usuk akah yinqiddise cahdi biilo lel masxisheti, tamaa nicmat Ufayeh lel waatimeti, ayidhdha amayimko uma maqhtsacti akah eeddah sinalle iggida? 30#Gabbaacime Sercat 32:35-36Amayim lel: “Xane yafdiinim yim kinni, anu afdaw kiyo” yerhxe tiya naarhigemhi sabbatah kinni. Kataysheh lel: “Maddari ishi xiyaw yafrado kinni” yerhxe. 31Yane Yallahi gabadde radaanam xiyaa mashshishsha.
32Laakin ifo geyteenik sarrah, tamaa waaxeltaalih dhacuma dhiba adde curten basoohit lelleeca xunsusa. 33Wuliili gedda xiyaw nifille wattimteenih sareena sinak raddeyaako biyaakitten, wuli gedda lel ta gina lem geye marahi zooba tekkin. 34Tashshem kee umman gedih marta iraaro litiinim teerhegiinimhi sabbatah, tamaa tumudhdhuwemih akah tessexekkin, sin iraaro sinak bayshaanam lel xedenlih kabbatten. 35Amaydo, tamaa naba casbe alle geytan sinni fidbe mixabinanta. 36Yallih farhi abtan gedda tamaa wacde akah sayeenim kabbattoona ciloh, curtayyi sin farhshiisha. 37#Xabaqquq 2:3-4Amayim lel:
“Dago waqhtek sarrah,
tamaa yamiiteti yamaato kinni, caawito lel maki;
38yi xaqqi-wanna laakin imaanah maro kinni,
caazalle gaxemko laakin,
yi rooxi kaalih xedeneena maki” yarhxemhi sabbatah kinni.
39Nanu laakin tamaa caazalle gaxah yalaye maraako akkekkah, tamaa imaan leh gargeerime maraako kino.
Currently Selected:
Cibraan 10: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
