Fartottit hi Abittot 25

Bawlos Roomaati naba nugusulle yigbaa-yarhxe

1Kado, Feestos amaa zoobälle yemeetemko adooxa max sugek sarrah, Qayseeriyaako Yerusaalem fanah yewce. 2Amaymih, sheekhat manabottit kee Yahuud makaabun, Bawlos diddeh kisse alle baahen. 3Bawlos diddeh macruuf akah abo kaa essereenih lel, araxadde yikittiriinih kaa yagdafoona yixiggirinyaako, Feestos Bawlos Yerusaalem fanah akah baaho kaa dhaacimen. 4Feestos lel Bawlos Qayseeriyalle yindhibbirheh yanem kee usuk isheh dhaye maxadde amakke yadaw yixiggireh yanem akah warishe. 5“Amaydo” yerhxe usuk: “Sin manabottit amalle yottaalih oobeenih, amaa xiyawti abe cagab yinniyemko kaa yaksasoonaa” yerhxe.

6Feestos tenlih baxxara lellecko tamana lellec takkem fanah tenlih sugeh, Qayseeriyalle oobe, malammit max lel firdi makaanolle defeyeyaako Bawlos baahoona ten yeemere. 7Usuk yemeete gedda lel, Yerusaalemko obteh tine Yahuud kaa riille daw-yerhxiinih mango kisse dhacumaya, seththe akah aallinnixonya kab alle ishen. 8Bawlos lel: “Anu Yahuud sercat hi diddeh yakko maqhdas care, hido lel Roomaati naba nugus hi diddeh walaa inki cagab maabiyo” yerhxeh yommoogote. 9Feestos lel Yahuud xedenisho ciloh, Bawlosuk: “Yerusaalem fanah tewceyaako, amalle ta kisseh yi nifille tamfarrado fadhdha?” akko yerhxe. 10Bawlos laakin: “Anu Roomaati naba nugus hi firdi makaanoh nifille daw-erhxeh aniyo, amalle lel kinni amfarrado yolle tanem. Anu Yahuuduk abe cagab maliyom atu isheh gantah meceetih taarhige. 11Anu rabo akah missil cagab abeh inniyemko, rabiiko kudo maacikkine. Anu walaa inki cagab abeh anniye wayemko laakin, tenalle yi yasxaw dhiicati miyane. Roomaati naba nugusulle yigbaa-arhxuk aniyo” yerhxe. 12Sarrah ishi faysheenitlih waanishek sarrah, Feestos: “Roomaati naba nugusulle yigbaa-terhxeh tanito; Roomaati naba nugusulle lel tillabto kito” yerhxeh alle yedebbe.

Bawlos Agribba kee Bernisille kab-yarhxe

13Dago maxak sarrah, nugus Agribba kee Bernike Feestosuk salaam-yarhxoona Qayseeriyalle yemeetin. 14Amalle mango max sugeenimko sarrah lel Feestos Bawlos gondo amaa nugusuh taginah akah caddoyshe: “Feeliksi xabshedde xabe wuli xiyawti yane. 15Yerusaalem edeeh ine gedda, sheekhat manabottit kee Yahuud naba mara, kaa zacabah yoh warisheenih, qitscatah kaa afrado lel yi esseren. 16Yinkissiseti ishi qoromaalih nif kee nifih daw-arhxekkah, tamaa akah yinkissiseh yanemih yammaagato lel caashir geyekkah, farhinnan tiya yaqhtsice marih gabadde kaa hayaanam Roomaati xiyawhi labcad makinam akah warishe. 17Sarrah talle yekettiinih yemeetin gedda, caawitekkah malammit max firdi makaanolle defeyeh amaa xiyawto baahoona eemere. 18Amaa kaa qoroma daw-yerhxin gedda, tamaa anu ilaale uma ciyyo usuk abeyahi kisse alle mibaahinnooni. 19Aki ginah laakin, ten diinhi zacabah kee wuli Yeesus akko yarhxin, rabe tiya, Bawlos ‘Yane’ akko yarhxeyahi zacabah ankeexeduk yinin. 20Anu lel isham sorhemhi sabbatah, ta gondoh Yerusaalem yedeeyaako amalle yamfarrado farham kee kaa essere. 21Bawlos laakin Roomaati naba nugus hi firde geyandah yindhibbirheh sugo yigbaa-yerhxe gedda, kaa fanah kaa dhirhiyandah dhawrhumo kaa eemere” yerhxe. 22Sarrah Agribba Feestosuk: “Ta xiyawto anu inneh kaa aabbo farha” akko yerhxe. Usuk lel: “Beera kaa taabbo kito” yerhxeh alle yedebbe.

23Malammit max Agribba kee Bernike, fishaalet saradde nabaatih bilciteenih yemeetinyaako, Roomaati caskar filcohi manabottit kee amaa daafoh makaabunlih addaaraashadde oroben. Sarrah Feestos Bawlos baahoona amre yoxoye. 24Feestos lel: “Nugus Agribba kee inkoh tadde nottaalih yane marak, inkoh Yerusaalem kee talle tane Yahuud, wac-yerhxinyaako: ‘Maro alle mitane’ yerhxiinih yottalle akko yithricin xiyawti tatiya kinni. 25Anu laakin usuk rabo akah missil cagabah walaa inkim adde migeyinniyo. Usuk isheh Roomaati naba nugusulle yigbaa-yerhxeh yanemhi sabbatah, kaa dhirhiyo abaysheh aniyo. 26Yakko kiyah, kaa sabbatah inni maddaralle aktube timidhdhigem maliyo. Amaymih, kaa namirmirek sarrah, aktubem aallo ciloh, inkoh sinalle kaa baaheh aniyo, fertoh lel, Nugus Agribba, kottalle kaa baaheh aniyo. 27Amayim lel yinkissise tiya, kaa kissi ayim kinam warishekkah dhirhiyaanam arax yekkeh yoh mamballayinnah kinni” yerhxe.

Currently Selected:

Fartottit hi Abittot 25: SCC

Highlight

Compare

Copy