Fartottit hi Abittot 26

Bawlos Agribbaati nifille baahe mogte

1Agribba Bawlosuk: “Ishi sabbatah wansitto izni koh yomxoyeh yane” akko yerhxe. Sarrah, Bawlos ishi gaba fak-isheh taginah yammaagato erherhishe:

2“Nugus Agribba, inkoh Yahuud akah yi aksisik yaniinimih kaafa ku nifille ammaagato liyomuh rummah caashir-wanna kiyo. 3Amayim lel fertoh atu inkoh Yahuud cayda kee ten sitta-waa taarhigemhi sabbatah kinni. Amaydo, sabreelih yi taabbo ku dhaacima

4Cindhiyukko erherhisheh, inni xiyawhi fan kee Yerusaalemille kinni carsimem. Yi aniina lel aagina kinam erherhaako Yahuud inkoh yaarhigin. 5#Fartottit hi Abittot 23:6; Filibbi 3:5Usun yashhadoona farheenimko, anu tamaa ni diinhi filcohi araxalle yitrireh aduuk yine Faarisiita kiyom, usun kalxaako yaarhigin. 6Kado lel Yalli ni abbubuh sayeh yine wacdedde cag liyomhi sabbatah kinni ta xukmelle kab-erhxeh aniyom. 7Ni lamman kee taman kishotya tayim tekkeh yabloona caagak kinni bar kee lellecih akah acbuduk yiniinim. Ta caghi sabbatah kinni Yahuuduh ankissisiyuk anem, yi nuguso! 8Yalli rabe mara ugusam aymih kinni cibra sinalle akkuk tanem?

9 # Fartottit hi Abittot 8:3; 22:4-5 Anu inneh Naazret Yeesus hi migac hi didde kinam abo fadhdhishimtam kinamah aaminiyuk ine. 10Anu lel amayim Yerusaalemille abe. Sheekhat manabottitko reeza kabbaateyaako, tinqiddisemko mango mara xabshedde sayshe bisa akkekkah, rabih yamfirridin gedda gantah, rabih yamfarradoona gaba-beetak iniyo. 11Sunagoogitidde lel mango le gedda ten aqhtsiciyuk ine, sinni imaan xaboona ten qasbishah, mangum alle kurrayaako, Yahuudiyaako irolle yine daafof fanah sarradde akko adiyeh ten hadanak iniyo.

12Ta gondoh lel sheekhat manabottitko reeza kee izne bishshiiteh Dimaashqa kallaaxe. 13Yi nuguso, lellecti abrha tekke gedda, ayrooko ifisha ifi, yoo kee yottaalih kallaaxak tinemhi lamma-galelle carsheeko iffoyshe. 14Inkoh baarholle radne gedda lel, Cibriyaati waanih: ‘Shaa-uul, Shaa-uul, aymih yi hadanak tanito? Yi farhih diddeh tedeemko kolle taamo kinni’ yarhxe dhaw oobbe. 15Anu lel: ‘Miyatto kito, Maddara?’ akko erhxe. Maddari lel: ‘Anu tamaa atu hadanta Yeesus kiyo. 16Kado lel ugutaaki ibah daw-erhex. Tublem kee tayek sarrah lel yi tablo litomhi khaddaam kee shaahid takko kinni koh umbulluweh aniyom. 17Ku xiyaw kee Aki-mara, ta alle ku farak aniyoyaako ku ayyaaco kiyo. 18Atu intit akah fakteh, diteeko ifolle ten ayyaacituk, Sheethan xaylaako lel Yallalle ten tadabbo ciloh, ku farak aniyo. Zambi xabbot kee Yottah lon imaanah tinqiddisemhi fanadde cara geyoona kinon’ yok yerhxe.

19Amaydo, Nugus Agribba, anu carshi mablo kataanam mixininniyo. 20#Fartottit hi Abittot 9:20,28-29Yakko kibah, yataaboona kee Yallalle gaxoona, yotoobiinim taybulluwe ciyyo aboona erherhih Dimaashqalle, sarrah lel Yerusaalem, umbuka Yahuudiyaati zoobälle amaye balih Aki-marah mece ware warroyshe. 21Tayimhi sabbatah Yahuud maqhdas caredde yi yibbirhiinih yi yagdafoona farhen. 22Kaafa fanah lel Yallaako yamiite xato liyo. Amaymih cindha mara kee naba marah ashhiduk talle sin nifille daw-erhxeh aniyo. Tamaa nobowa kee Moosa takko kinni akko yerhxiinimko bextih erhxem maliyo. 23#Isayas 42:6; 49:6; 1 Korintos 15:20Usun: ‘Masiix waaxelsiito kinam kee rabaako uguttamadde afti tiya yekkeh, inkoh ni xiyaw kee Aki-marah ifo warroysho kinam’ yerhxiinih yinin” yerhxe.

24Ishi mogteh tayim arhxuk, Feestos wac-yerhxeyaako: “Bawlos, ticbideh tanito! Ku mango madrasa ku tiscibideh tane” akko yerhxe. 25Bawlos laakin: “Anu icbideh maaniyo, naba xishma-le Feestos, laakin waanishak aniyom rumma kee cado waani kinni 26Tayim taarhigem nugus kinamhi sabbatah, kaalih fidbeelih waanishak aniyo. Tayim suctodde tekkem makinamhi sabbatah, tayimko inkim akko misucutinnam aarhige. 27Nugus Agribba, nobowah taamine? Atu taaminem aarhige” akko yerhxe. 28Agribba lel Bawlosuk: “Urhurh waqhtelle masiixto yok abto fadhdhe?” akko yerhxe. 29Bawlos lel: “Yerheerheh yendhewweh, kotta bisa akkekkah, inkoh kaafa yi aabbuk yane mari gantah, ta kataayinko bextih, yotta balih yakkoona Yalla dhaacimak aniyo” akko yerhxe.

30Sarrah amaa nugus, masxadaadara, Bernike kee tenlih defeyak yine mara uguten. 31Usun amakkeeko yedeyin gedda: “Ta xiyawti rabi hido xabshi akah eedamah inkim abak miyane” sittiyak yerhxin. 32Agribba lel Feestosuk: “Ta xiyawti Roomaati naba nugusulle yigbaa-yerhxeh anniye wayaado, yawco dhiice dhaarhe” akko yerhxe.

Currently Selected:

Fartottit hi Abittot 26: SCC

Highlight

Compare

Copy