Fartottit hi Abittot 24

Bawlos Qayseeriyalle masxadaadara kin Feeliksiiti nifille kab-yarhxe

1Koona lellecik sarrah, naba shekh kin Xananiya naba maraako garoolih kee Tertullos akko yarhxin muxaamiilih oobe. Amaa masxadaadari nifille lel Bawlos kisse kab-ishen. 2Bawlos akah deecimeenih yemeete gedda lel, Tertullos tahe arhxuk kaa yaksaso erherhishe: “Xishma-le Feeliksi, ku sabbatah mango salaam geyneh nane, ku xikmah sabbatah lel ta ummatah mango badali yekkeh yane, 3umman ginah ummanille lel tayim mango cawatlih kabbatneh nane. 4Kolle nayrheerhemko laakin, kok arhxem ishi mecaanille urhurhik ni taabbo ku dhaacimak aniyo. 5Ta xiyawti umman caalamalle tane Yahuud fanadde cigirgir kee zagaxa ugusak, laxuu kin tiya kinam nubleh nane. Tamaa Naazret mara akko yarhxin diin filcih manabotta lel kinni. 6Maqhdas care gantah yaynajaso farhe, nanu laakin kaa nibbirhe. [Nanu lel ninni sercatah kaa nafrado farhne. 7Amaa Roomaati caskar filcohi manabotta kin Lisiyas laakin yemeeteyaako gabaako ishi xaylah nok beye. 8Kaa yiksise mara lel ku nifille yamaatoona ten yeemere.] Nanu kayya akah aksisuk nanem lel inkoh atu isheh kaa timirmireh geyto dhicta.”

9Yahuud lel tayim rumma kinamah sinni mablo adde osen.

10Amaa masxadaadari waanisho akah yiymikniye gedda, Bawlos taginah alle yedebbe: “Atu mango iggidit ta baarhoh xiyawhi daaniya kitom aarhigemhi sabbatah, inni mogte xedenlih koh warrishita. 11Cibaada abito Yerusaalem ewcemko taahe lamman kee taman lellectiyaako mifeeram taarhago dhicta. 12Maqhdas caredde yakko sunagoogedde hido daafolle walaa inkettaalih anzeegexiyuk hido xiyaw ayribbishuk yi migeyinnooni. 13Ta kado yottalle baahak yanin kisseh kotta akah yashshiminin seththe akah malooni. 14Anu laakin, ta usun diin filco akko yarhxin Arax kee yi abbubhi Yallah acbudemih koh aalime. Inkoh Sercatadde tanem kee Nobowadde tunkuttubeh tanemih lel aamine. 15Ta xiyaw gantah sinneh cag akah looniikah, anu gantah xaqqi-wannun kee xaqqi-wannun akkinnixem rabaako ugutoona kinoonimih Yalladde cag liyo. 16Amayimhi sabbatah kinni lel Yalla kee xiyawhi nifille mece afcaado le tiya akko xawalam. 17#Fartottit hi Abittot 21:17-28Kado, mango iggiditik sarrah, inni xiyawah zaka baaho kee sadaqha abo emeete. 18Ta mari lel maqhdas caredde thahaara abitak kinni yi geyeenim kibah, anu eskette xiyaw yakko iyribbishe mara maliyo. Aasiyaati zoobäako kin Yahuudko gari 19amalle yinin. Yottaako loonim tinniyemko lel ku nifille yi yaksasoona kinni eeddam. 20Hido lel anu arabat nifille daw-erhxeh aniyuk yodde geyen cagab yinniyemko, usun sinneh warishoona. 21#Fartottit hi Abittot 23:6Ten fanadde daw-erhxeyaako, wac-erhxeh: ‘Anu kaafa rabaakohi ugut hi zacabah ku nifille amxukkumiyuk ane’ erhxemko bextih walaa inkim yodde migeyinnooni.”

Bawlos xabshedde defeye

22 Feeliksi laakin, Araxhi zacabah mece irhga luuk yinemhi sabbatah: “Roomaati caskar filcohi manabotta kin Lisiyas yamiite gedda, sin gondo abaysho kiyo” yerhxeh ten dhirhiye. 23Bawlos xabshedde sugo alle tanem kee dago finja yaallo, amaye balih kaa farhshishsham akah bahta kaa zoobitko lel walaa inketti deesimo alle mitanemih amaa bool caskartiyahi manabottah amre yoxoye.

24Dago maxak sarrah lel Feeliksi Dirusilla akko yarhxin Yahuuddo kin ishi numaalih yemeete. Bawlosulle alle farriimeh lel akah deecimeyaako Yeesus Masiixih yaaminiinimhi zacabah waanishak kaako yoobbe. 25Xaqqe kee sinni nabse yabbirhiinim, amaye balih yamiite firdehi zacabah waanishe gedda lel, Feeliksi mashshiiteyaako: “Caashir geyinnan gedda kodde farriimo kiyok, kado aduu” akko yerhxe. 26Wuli ginah lel Bawlosko solaadi geyo cag luuk yine. Amaymih ummaan alle farriimah aalih waanishak yine. 27Lamma iggidi bakite gedda, Feeliksiiti caradde Borkiyos Feestos yemeete. Feeliksi lel Yahuududde yankaxxano ciloh Bawlos xabshedde kaa xabe.

Currently Selected:

Fartottit hi Abittot 24: SCC

Highlight

Compare

Copy