2 Bithroos 1
1
Salaamta
1Yeesus Masiix garuzza kee fartotta kin Simcoon Bithroosko, tamaa Yalla kee Gargeereena kin Yeesus Masiix xaqqehi araxah nottaalih lem kin imaan kabbaate mara fanah:
2Yalla kee ni Maddara kin Yeesus araxah litin irhgah nicma kee maaxiyo sinah sasantoo.
Yallih deeco kee dooro
3Yallih xayli, inkoh aniinah kee Yallih mashshih ni farhshishsham noh yoxoyeh yane. Tayim lel kaa zacabah lino irhgahi araxah, ishi nabne kee mecaanille noh deecimeh yane. 4Amayimhi araxah lel, naba limo le naba wacde noh yoxoyeh yane. Tamaa uma farhih sabbatah yamiite caalamalle yane masxeeko kuddeenih, Yallih thabiica kaalih yangale mara tekkiinim lel tayehi araxah kinni. 5Tayimhi sabbatah lel, sinni imaan mecaaniilih, mecaaniilih lel irhga, 6irhgaalih lel sinne-yabbirhiinim, sinne-yabbirhiinimlih lel sabre yaalliinim, sabreelih lel Yallih mashshi yaalliinim, 7Yallih mashshiilih lel sacoolinni mecaani yaalliinim, sacoolinni mecaaniilih lel kaxano yaalliinim ziyaadishshoona ciloh sinnelle tanem abanta. 8Tayim sin asliino tekkeh ziyaadak lel tinniyemko, Maddara kin Yeesus Masiix irhgadde xaraka hin mara hido fire hin mara takkiinimko sin dhawudhdha. 9Ta asliino aallinnixeti lel dherhille ablinnixe inti-male kinni. Tamaa basoohit ishi zambeeko yimtsitstsiyem lel biyashshiite tiya kinni. 10Amaydo, yi saculo, sinni deeco kee dooro taysabatoona xawalanta. Tayim abteenimko lel caduruh andafittoona makitiini. 11Taginah lel tamaa ni Maddara kee Gargeereena kin Yeesus Masiix nigsinna umman geedityadde orobaanam, xindaalih sinah tamxawo kinni.
12Amaydo, atin sinneh taarhigiinih, tamaa kado litin rummadde lel dhishshimteenih tanin hanuk, umman gedda ta asliino sin xunsuuso kiyo. 13Ta nabsi yodde yanem fanah, sin xunsuusak sin uguuguso xaqqeh yolle iggida. 14Tamaa ni Maddara kin Yeesus Masiix akah yoh caddoysheekah, ta nabse xabeh adde adiye waqhti kab-yerhxeh yanem aarhige. 15Anu sin xabeh adiyek sarrah, tayim umman gedda xunsussoona ciloh, yolle tanem inkoh abo kiyo.
Masiix nabne kee Nobowat waanitta
16Ni Maddara kin Yeesus Masiix xayla kee kaa mumut hi zacabah sinah warishne gedda, xiyaw siixoh cijaajen tinem-tine katayneh akkekkah, tamaa ninneh nuble kaa nabintahi shohoda kinomhi sabbatah kinni. 17#Maatiyos 17:1-5; Markos 9:2-7; Luukas 9:28-35Tamaa: “Tati yinkixxine yi Barha kinni. Anu kaalih xedeneena kiyo” yarhxe dhaw tamaa naba nabneeko alle yemeete gedda, Abba kin Yallaako xishma kee nabinta le nabne kabbaate. 18Tamaa tinqiddise koomalle kaalih ninemhi sabbatah, ta dhaw carsheeko yemeete gedda nanu ninneh noobbe. 19#Waxye 22:16Tayim ziyaada meceetih noh taysibite nobowat waanitta lino. Baarho maxtam fanah, maaxi xutukti lel sin afcaadodde yawcendah, ta waanitta tamaa ditedde ifisha ifo balih macalsitteenimko mecem abak tanin. 20Ummanimko basolle, tamaa Kutuubudde tane nobowat waani, ten tarjamaako tamiitem makinam taarhigin. 21Nobowat waani Quddus kin Ufayeh santishimeenih, xiyaw Yallaako waanisheenim kibah, caduruh xiyaw farhih temeetem maki.
Currently Selected:
2 Bithroos 1: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
