2 Korintos 5

Carshi ni sigima

1Ta tenda kin ni cari udduuniyatya nok dumemko, xiyaw gabah siraaximinnixe care, Yallaako kin makaano umman geeditya, carshelle linom naarhige. 2Ta tendadde angaarishak nane, ninni sigima carshiya sarinno lel hambereerak nane. 3Sarinnemko lel rummah casiinih nakko makino. 4Ta tendadde nanem fanah, nolle cilishayaako angaarishna. Tayim lel sarinno kibah casiinih nakko farhnah maki. Tayim lel tamaa rabati aniinah yamandhaco ciloh kinni. 5Usuk, taymih ni yisqirribeti, dhishih lel Ufaye noh yoxoyeti, Yalla kinni.

6Amaydo, nanu umman gedda mece fidbehi wannun kino. Nanu carelle nabsedde aninuk, Maddaraako mirix-nerhxeh nane. 7Amayim lel imaanah kibah mabloh migerhnamhi sabbatah kinni. 8Yoo, nanu mece fidbehi wannun kino, ta nabseeko barhsimneh lel carelle Maddaraalih nakkem noh tashshe. 9Amaydo, farheh carelle hido lel mirixtalle ninniyeh, kayya xedenishno kinni naxiggirem. 10#Rooma 14:10Nabseelih aninuk abne mecaani yakko umaanih, ummanti ishi casbe kabbaato ciloh, firdi kurse Masiixiyahi nifille namaato nolle tane.

Wagari khidma

11Amaydo, Maddari mashshi aymottä kinam naarhigeh aki mara ashshimininuk nane. Laakin nanu Yallah mudhdhugaat kino, sin afcaadoh gantah mudhdhugaat nakko cag lino. 12Nottah falittoona takale sinah axaynuk nanenkah, gaxneh ninne nayshadhdhago ciloh maki. Tayim lel tamaa afcaadodde tanemih akkekkah, irot mabloh falita maralle akah tadabbiiniikah dhictoona ciloh kinni. 13Nicbidemko Yallah kinni, kaslih ninniyemko lel, sinah kinni. 14Nanu Masiix kaxanih gabadde nanemhi sabbatah, inketti umman tiyah rabe, amaydo, inkoh rabeenim naarhige. 15Tamaa aniinaalih yane mari, tenah arhxuk rabe tiya kee ugute tiyah kibah, sinneh arhxuk maraanamko, usuk umman tiyah rabe.

16Amaydo, kadok sarrah, xazottat araxah walaa inketta minaarhige. Masiix xazottat araxah walaa kaa aarhiginuk nineh nekkemih, kamboh laakin kado amaymih kaa minaarhige. 17Amaydo, akkinnanti Masiixidde yinniyemko, cusub makhaaliqho kinni. Tamaa kalxiitim tillabtah cusubam temeeteh tane. 18Tayim lel inkoh Yallaako kinni; usuk isheh Masiix araxah abeh nottaalih wagareh, wagari khidma lel noh yoxoye. 19Tayim lel Yalli Masiix araxah caalamlih wagara gedda, ten zambe alle miloolaysha, nottalle lel wagari farto nolle yoxoye. 20Amaydo, Yalli lel ni araxah deecimak yanem balih, nanu Masiix wokola kino. Nanu lel Yallaalih wagartoona Masiix idhdhadde sin dhaacimak nane. 21Nanu ninneh Masiix araxah Yallih xaqqe nakko ciloh, tamaa zambe aarhige waya tiyak usuk isheh zambe akah yakkeekah akko abe.

Currently Selected:

2 Korintos 5: SCC

Highlight

Copy

Compare