2 Korintos 3

Cusub cahdih khaddamte

1Malammih ni yaysherheerhege mara farhak nane? Hido lel aki xiyaw akah abaanaakah, sinalle hido sinko aysharhaarhagti farto ni farhshishsha? 2Ummanti yaarhago kee yaqhraw ciloh ni afcaadodde tunkuttube ni aysharhaarhagti farto isheh sina kinni. 3#Muuca 24:12; Ermiyaas 31:33; Yexetsqeel 11:19; 36:26Atin Masiixko farritimte, ni araxah lel gufte, midadah akkekkah, yane Yallahi Ufayeh tunkuttube, dhayitti luxulle akkekkah lel, xiyaw afcaadohi luxulle tunkuttube farto kitin.

4Masiix araxah Yalladde lino imaan tatiya kinni. 5Ummannim nottaako akah tamiite dhic linoh akkekkah, ni dhic akko yamiitem Yalla kinni. 6#Ermiyaas 31:31; Rooma 2:29; 7:10; Yohannis 6:63Yunkuttube sercatah akkekkah Ufayeh yunkuttube cusub cahdehi khaddamte nakko ni dhicshishshem Yalla kinni. Amayim lel yunkuttube sercat yagdife, Ufayi laakin aniina yaxayemhi sabbatah kinni.

7 # Muuca 34:29 Tamaa sercat farhshiisha khidma dhayitti luxulle tunkuttubeh tine. Ta khidma walaa nabneelih tamaato kibah, rabi katayishshe. Tamaa ahsisuk tine tee nabnehi sabbatah Israa-eel xiyaw Moosat nifidde kulux-yarhxoona taaneenimko, 8amaydo, Ufayi khidma amayimko naba nabne taallo maki? 9Maqhtsacti katayishsha khidma tayidhdhale nabne teellemko, xaqqi khidma amayimko ferta nabne taallo alle tane. 10Rummah lel, tamaa erherhih nabne luuk tinem, amayimko naba sarraahit tiyaalih nable gedda, rummaahit nabne luuk mitine. 11Tamaa bakittam nabneelih temeetemko, umman geediitim amayimko naba nabne taallo kinni.

12Nanu ta gina le cag linomhi sabbatah kinni nafdibem. 13#Muuca 34:33,35Nanu tamaa Israa-eel xiyaw bakitak tine nabneh abayshimadde kulux adde yarhxiinimko nif abbuzuzuk yine Moosa balih makino. 14Ten xangul laakin yitrireh yine. Kalxit cahde yaqhriin gedda lel, Masiix araxah bisa fakkittamhi sabbatah, amaa goleeni kaafa fanah akah macrhayinna. 15Yoo, kaafa fanah Moosat sercat anqirriinnan gedda, ten afcaado tubbuzuzeh tane. 16#Muuca 34:34; Rooma 11:23Laakin akkinnanti Maddaralle gaxemko, amaa bazuze akah tacrhiye. 17Kado, Maddari Ufaye kinni, Maddari Ufayi alle yanelle lel, finja tane. 18Nanu lel inkoh, abbuzuzinnixe niflih, Maddari nabne magannaxit balih ziffoyshak, kaa mislih xibar akah naalleekah, nabneeko nabnelle nambaddalo kino. Tayim lel Ufaye kin Maddaraako tamiitem kinamhi sabbatah kinni.

Currently Selected:

2 Korintos 3: SCC

Highlight

Copy

Compare