2 Korintos 2

1Amaydo, yi mumut sin xazzanoyshamko malammih sinalle amiitemko abaysheh aniyo. 2Anu sin xazzanoyshemko yi sabbatah xazzanoye tiyaako bextih, miyatto kinni yi xedenishati? 3Tayim sinalle uktubem, amiite gedda tamaa xeden akko geyo missil maraako, xazan geyamko ciloh kinni. Amayim lel yi xeden umbuka sinhi xeden kinam taarhigiinimih thummut-ekkemhi sabbatah kinni. 4Mango tsabaaba kee afcaadot qadablih, amayim balih mango dhiimoolih sinalle uktubem, sinah liyo mango kaxano taarhagoona ciloh kibah, sin xazzanoysho ciloh maki.

Zambi-wannalle alle xabanta

5Akkinnan tiya xazzanoysheti yinniyemko, yotta bisa makiiki, ishi qiyaasalle, aymanguk anniye wayemko, umman sina gantah kinni xazzanoyshem. 6Amah iggidin tiya, mango marahi maqhtsacti kaa dhicta. 7Amaydo kado, usuk sirii xazanadde yamundhucemko, atin alle xabteenih kaa aydukumusanta. 8Amaydo, atin kaa kixintiinim kaa tayshadhdhagoona sinalle amaanatisha. 9Tayim sinalle aktubiyuk anem, sin acakkano kee ummanim sinak arhxeya yaabbe mara kitiinim sinak aarhago ciloh kinni. 10Atin alle xabinnan tiyalle anu gantah alle xaba. Rummah, anu alle xabem, alle xabem tinniyemko, Masiix nifille sinah arhxiyuk kinni. 11Tayim lel, Sheethan siixi ayim kinam naarhigemhi sabbatah, kaa doolab sorhnamko ciloh kinni.

Sariigalla Masiixidde

12 # Fartottit hi Abittot 20:1,6 Masiix mece ware warroysho Tirooyasalle emeete gedda, Maddari ciyyoh caraf fakkiteh walaa yoh sugoo kibah, 13Tiitos yi sacal amalle migeyinniyomhi sabbatah, ufayi curfen migeyinniyo. Amaymih tenak mecaanille erhxeyaako Makedooniya fanah edee.

14Masiix araxah umman gedda kaamil kin sariigallalle ni santishah, ni araxah lel Masiix yamadhdhago kaa irhgahi mece certa ummanille faax-isha Yallah xamde takkoo. 15Nanu tamaa gargeerime mara kee alawuk yane marahi addadde Yallih nifille Masiix mece certa kino. 16Garoh rabaako raballe tillaabisha ure, garoh lel aniinaako aniinalle tillaabisha ure kino. Taymih abto dhictam miya kinni? 17Yallaako farritime mara nekkeyaako, ninni mece niyah, Yallih nifille Masiix araxah waanishak nanenkah, tamaa mango mara balih, Yallih waani sinni nafaacah yaybiddile mara makino.

Currently Selected:

2 Korintos 2: SCC

Highlight

Copy

Compare