2 Korintos 12

Bawlos mablol kee kaa keena

1Falitaanam katattaysho yolle tane. Falo nafaacaako walaa inkim aalle wayto kibah, Maddari mablol kee waxyeh falitaanam katattaysho kiyo. 2Affaran kee taman iggidiyak basoh Masiix tiya kin xiyawti, maddaxit carshe fanah yumuqqucem aarhige. Nabseelih kinam kee makinam laakin maarhige, Yalli yaarhige. 3Ta xiyawti janna fanah yumuqqucem aarhige; nabseelih kinam kee nabse hinnim kinam maarhige, Yalli yaarhige. 4Xiyawti canquruh yashraxo taanam kee xiyawti warisho amsimmixinnixem lel yoobbe. 5Ta xiyawtih zacabah falito kiyo, inni ruktaako beexinamah laakin inneh falito makiyo. 6Falito farhemko gantah, rummah waanisho kiyomhi sabbatah, duuda akke maliyo. Anu laakin tamaa yooko yablem kee yaabbemhi qiyaasko aganalle yi yakkalemko inne abbirhe. 7Ta mango nabne le waxyehi sabbatah yamnanabbe tiya yakkiinimko dhawrhumo ciloh, Sheethan luuktä kin keena yi xazo biyaakishshaya yoh tomxoyeh tane. 8Tayim yottaako mirix-tarhxo alle tanemih, Maddara adooxa gedda dhaacime. 9Usuk laakin: “Yi xayli ruktadde yakmilemhi sabbatah yi nicma ku dhicta” yok yerhxe. Amaydo, Masiix xayli yolle yacrafo ciloh, inni ruktah sabbatah ziyaada xedenlih falito kiyo. 10Masiixih arhxiyuk lel, amaydo, rukta, waato, uma nabra, hadaano kee balaalih xedeneena kiyo. Amayim lel arkute gedda birthic tiya kiyomhi sabbatah kinni.

Korintosti kaniisah shaqhla

11Anu duuda kuuk ine! Yi duudussem lel sina kinni. Atin yi taysharhaarhagoona sinalle tine. Anu walaa inkim makiyo hanuk, ta naba fartottitko migaxa. 12Anu rummaahit fartotta kiyom yaybulluwe ishaarar, bexsishsham kee xayla-le abittot mango sabreelih sin fanadde tekkeh kinni. 13Anu inneh sinalle iscilisheh akke wayaado, atin aki kanaayisko aymih gaxtaana? Tayim cagab yekkemko, yolle mabbarhina!

14Talle maddaxit gedda sinalle amaato inqirribeh aniyo. Anu sina kibah sinim mifarhamhi sabbatah, cuuka sinalle akko makiyo. Cindham maki sinni dhaltoyyah solaadi taxfazo tanqissibemki, dhaltoyya kinni sinni cindhamah solaadi taxfazo tanqissibem. 15Anu mangum kixinuk inkoh liyom sinah tillaabisho kee sinah arhxiyuk inne tillaabisho kiyo. Anu mangum sin ikxinemko, dagum ankaxxano kiyo? 16Anu laakin inneh, sinalle mascalashiyom aarhigiyuk, anu xeelah sin ibbirhem kee doolabah sinak eshshem kinni takkaliinim. 17Tamaa sinalle fare marah abeh sinadde imbillitseho? 18Tiitos sin fanah yadaw kaa dhaacimeh ine, kaalih lel wuli sacal dhirhiyeh iniyo. Tiitos sinadde yimbillitseho kela? Inki ufayeh makiho nukhdumem? Inki daribille makiho gerhnem?

19Sin nifille kado fanah ninneh deesak sugnem akkaluk sugteeni? Ko yi kaxantoolito, nanu Yallih nifille Masiixidde yane mara nekkeh kinni waanishak ninem; nanu abinnannim lel sin carsah kinni. 20Anu amiite gedda, tamaa anu akah farhaakah yoh suge waytaanamko, atin lel akah fadhdhaanaakah yi geye waytaanamko mashshiita. Masalan lel gica, ashshiino, kura, cangitnan, dattosnan, xami, amnonobba kee cigirgir yanniyemko mashshiita. 21Anu malammih amiite gedda, yi Yalli sin nifille yi xoolayshamko, anu lel tamaa basoh zambe abenyaako najaasa, uma-xibar kee cibdaan abak yininyaako atoobinnixe mango marah xazzanowamko mashshiitak aniyo.

Currently Selected:

2 Korintos 12: SCC

Highlight

Copy

Compare