2 Korintos 11

Zirabti katattaynit

1Dagum duudiinot waanih sinlih waanisho yolle curtaanam farhe dhaarhe. Yolle curanta! 2Anu Yallih ashshiinoh sinah ashshiinamhi sabbatah, thaahira kin dhaggitinnixe barhä balih Masiixih sin axawo inki xiyawtoh sin iliisheh aniyo. 3#Erhedhdhö 3:1-5,13Tamaa caroora ishi siixoh Xaawa akah doolabteekah, atin gantah sin xisaab, tamaa Masiixih litin cado-qalbe kee lillaako sin yashshixitemko sinah mashshiita. 4Akkinnanti yemeeteh tamaa nanu warroyishne Yeesusko beexin tiya warroyshemko, hido lel tamaa atin kabbatten ufayeko beexin ufaye kabbatteenimko, hido lel tamaa kabbatten mece wareeko beexin mece ware kabbatteenimko, sik-terhxiinih kabbaatak tanin macna kinni. 5Rummah, anu tamaa naba fartottitko gaxam inne makkale. 6Waanit dhic aalle wayemih, irhgat wayto maliyo; rummah, tayim ummanimidde umman ginah sinah caddoyishneh nane.

7Hido, atin xaf-tarhxoona ciloh, inne uscundhuweh, Yallih mece ware amaa ginah sinah warroyshemhi sabbatah, zambe abeh aniyo? 8Sina akhdamo ciloh, aki kanaayisko masaariif kabbaateyaako ten baysheh aniyo. 9#Filibbi 4:15-18Sinlih iniyoh, yi farhshishsham luuk iniyo gedda gantah, tamaa Makedooniyaako temeete sacul yi farhshishsham yoh yoxoynimhi sabbatah, walaa inkettalle cuuka makkiyo. Amaymih, farhinnan ginah cuuka sinalle akkemko inne ibbirhe, tayek sarrah lel amayim abo kiyo. 10Ta yottadde yane Masiix rummah yok takkoo, yi falo Akhaayaati zoobälle daw-tarhxo makinam. 11Aymih? Sin mikixiniyomhi sabbataha? Sin kixiniyom Yalli yaarhige!

12Tamaa akah falitaanamah, nottaalih lem yakkoona wagiya mari caashir wayoona ciloh, ta abak aniyom abaanam katattaysho kiyo. 13Ta gina-le mari, Masiix fartottit kinoonimih sinne yaymingidiinih, doolab shaqqaala, zirabti fartottit kinon. 14Sheethan gantah ifi malaykattoh ishe yaymingidenkah, tayim cibra maki. 15Amaydo, kaa khaddamte gantah xaqqi khaddamteh sinne yiymingidiinimko, tayim cibra maki. Ten abayshima lel ten abittot balih takko kinni.

Fartotta kin Bawlos waaxelta

16Gabbaacak aniyo, walaa inketti duuda yi yakkalo kaalle mitane. Atin gantah duuda yi tekkeliinimko, anu lel dagum falito ciloh, duuda balih yi ubula. 17Anu taginah faloolih afdibeh waanisham, duuda balih kibah, Yalli akah waanishe dhaarheekah maki. 18Mango mari xazottat araxah faliteenik sarrah, anu gantah falito kiyo. 19Atin sinneh kas-le mara sinne takkaliinimhi sabbatah, tamaa duudit kin mara xedenlih curteenih tanin! 20Rummah lel, wuliti garuuza sinak aba, hido sin caggaboysha, hido sinadde yambillitse, hido sinalle yamnanabbe, hido dhaban sinak tsafuca hanuk, kaa curtan. 21Tayim yi xoolayishsham kinni hanuk, nanu ta gina lemille daraaga kuuk ninem balih sinah warisho yolle tane!

Akkinnanti falito dhiicaya yinniyemko laakin, — duuda balih waanisho kiyo — anu gantah falito kiyo. 22Usun Cibriyaati xiyaw kinooni? Anu gantah kiyo. Usun Israa-eel xiyaw kinooni? Anu gantah kiyo. Usun Abraahim zara kinooni? Anu gantah kiyo. 23#Fartottit hi Abittot 16:23; 1 Korintos 15:10,30-32Usun Masiix khaddamte kinooni? Jabda balih waanishak aniyoh kibah, anu tenko ziyaada kiyo. Tenko ziyaada xawaleh, mangole gedda umudhdhuweh, mangole gedda sirii ginah umuttukeh, mangole gedda lel rabit af gufe tiya kiyo. 24#Gabbaacime Sercat 25:3Koona gedda, Yahuuduh marootomko inketta hinam khormaajah sabciime. 25#Fartottit hi Abittot 16:22; 14:19Adooxa gedda iloh umuttuke. Inki gedda dhayitih umuttuke. Anu adde aniyo doonik adooxa gedda tiggidile; bar kee lellec badti bukalle selel-erhxe. 26#Fartottit hi Abittot 9:23; 14:5Mangole gedda kallaaxelle iniyo, weecaako, garaacenko, yi xiyawko, Aki-maraako, daafolle, zibolle, badalle, zirabti saculko gidcatadde iniyo. 27Ciyyo kee xawalah, bar dhinta hinnim, safra kee bakharah, cululudde, gallaco kee casiinih iniyo. 28Akimko ziyaadah lel, maaxi yamaato inkoh amaa kanaayisih shaqhlat cuuka luuk iniyo. 29Rukutti miyatto kinni, kaa rukta yodde assaabbe waytemko? Miyatto kinni zambedde radeh, anu akah axurtume wayeti?

30Falito ekkemko, rukut tiya alle kiyomuh falito kiyo. 31Maddara kin Yeesus Yalla kee Abba, umman gedda barakä-le, anu zirabbitak maaniyom lel usuk yaarhige. 32#Fartottit hi Abittot 9:23-25Dimaashqalle, tamaa nugus Aretasti geridde masxadaadara kuuk yine reezanti, yi yabbarho Dimaashqaati daafo dhawrhak yine. 33Anu laakin amaa qaanadde tine sinistiraako naba jambiilidde yi ulluseenih kaa gabaako assaaco dhiice.

Currently Selected:

2 Korintos 11: SCC

Highlight

Copy

Compare