1 Bithroos 1
1
Salaamta
1Yeesus Masiix fartotta kin Bithroosko, tamaa dulayyolle faax-yerhxiinih Bontos, Galaatiya, Kabbadokiya, Aasiya kee Bitiiniyalle geytima doorime mara fanah. 2Abba kin Yalli yookomeh akah abaysheeka balih lel Yeesus Masiix taabboona kee kaa biilohi anasnasah lel tanqaddasoona: nicma kee maaxiyo sinah sasantoo.
Yane cagah malammih yaabukiinim
3Ni Maddara kin Yeesus Masiix Yalla kee Abbah fayla takkoo! Ishi naba raxmah balih, Yeesus Masiix rabaakohi ugutti araxah yane cagadde malammih akah naabukeekah nok abe. 4Tamaa alayinnixe, masxitinnixeh, ahsisinnixe miiraas carshelle sinah obsimeh yaneya ni yiywirishe. 5Sin imaanhi araxah, tamaa abayshimat waqhtedde yamadhdhago le garger fanah, Yalli ishi xaylah sin dhawrheh yane. 6Dago geddah mango caynah tattacakkanoona, raacinnixem kinni haaki, taymih mangum xedentan. 7Tayim sin imaan rumma kinam taybulluwem kinni. Tamaa dahab walaa girah yamcakkanoo kibah, sin imaan tamaa yalaye dahabko naba limo leya. Ta sin imaan Yeesus Masiix yambulluwe gedda fayla, nabne kee xishma sinah baaho kinni. 8Walaa kaa tubliinih mitaniini hanuk, kaa kixinitin. Walaa kado kaa abluk mitaniini hanuk, akah taaminiinih, wansittoona tantan naba xedenih xedenak tanin. 9Sinni imaanhi mawcoh lel sinni rooxih garger kabbaatak tanin.
10Tamaa sinah tamxawo le nicmahi zacabah takko-lem tuble nobowa, ta gargerti zacabah, goronishenyaako xeelaatih yimirmiriinih kinon. 11Tamaa tenadde yine Masiix Ufayi awlih xiyawto kee awlih waqhtehi zacabah arhxuk yinem yimirmirin. Tayim tekkem lel tamaa Ufayi, Masiix waaxelta kee katayta kaa nabnehi zacabah yookomeh yishhide gedda kinni. 12Ten khidma lel sinah kibah tenah kuuk mitinem akah timidhdhige. Tayim lel tamaa carsheeko farritime Quddus kin Ufayehi araxah, mece ware sinalle warroyshe mari sinah warisheenih yanin. Tayim malaykut gantah kulux adde yarhxoona duumutak yiniinim kinni.
Tinqiddise aniinah maranta
13Amaydo, sinni niya abittoh inqirribanta. Himma-abitteenih, tamaa Yeesus Masiix yamidhdhige gedda sinah baahoona lon nicmadde umbuka sinni cag abitanta. 14Akko yarhxiinim yaabbe cindham akah kitiiniikah lel, tamaa basoh sorheenit kuuk tinin gedda balih, sinni uma farhih maadayna. 15Laakin tamaa sinah deecimeti quddus akah kinniika balih, atin gantah abinnannimidde inkoh yinqiddise mara tika. 16#Leewiiti Sheekhino 11:44-45; 19:2 Amayim lel: “Anu quddus akah kiyookah, yinqiddise mara takkoona kitin” yarhxiinim tunkuttubeh tanemhi sabbatah kinni. 17Tamaa babbarhishekkah, umman tiya kaa-kaa abitto balih yafride tiyak “Abba” terhxiinih akah deecimtoona tekkiinimko, gerha tekkiinih dago waqhteh taniinim fanah kayya mashshiitak suganta. 18-19Tamaa sinni abbubko tiwrishin foyya kin gerh-gerhko sin yeyyeece Yalli, tamaa talaye cale kin fidda kee dahabah akkekkah, tamaa abar hido baro hin naba limo le leema balih kin Masiix biiloh abeh sin yeyyeecem taarhigin. 20Usuk caalam dhishshimtemko basolle yimidhdhige tiya kuuk yine hanuk, abayshimat waqhtedde sinah arhxuk yumbulluwe. 21Sin imaan kee cag Yalladde yakko ciloh, Yeesus araxah, tamaa kayya rabaako uguseh nabne akah yoxoye Yallah teemenin.
22Rummi yarhxem toobbinyaako, rummaahit sacoolinni kaxanoh sinni rooxe tiythihiriinih, rummaahit afcaadooko cilleh sittiya ikxinanta. 23Malammih toobokiinih taniinim lel, tamaa taneh umman gedda marta Yallih waanittahi araxah, alayinnixe zarah kibah yalaye zarah maki. 24#Isayas 40:6-8Amayim lel
“ Inkoh xiyaw cashsho balih kinon
ten inkoh nabne lel cashshot combooba balih kinni.
Cashsho kafta,
amaa combooba lel radda,
25Maddari waanitta laakin umman geddah marta.”
Ta waanitta lel tamaa sinalle warroyshen mece ware kinni.
Currently Selected:
1 Bithroos 1: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
