1 Korintos 7

Waasibot gondo

1Tamaa yolle tuktubin gondohi zacabah yekkemko: “Labhatti numaalih dhiine wayam mece.” 2Laakin uma-xibaradde saytaanamko ciloh, labhatti ishi numa, numa lel ishi bacla taalloona sinalle tane. 3Bacli ishi numah tee xaqqe akah abo, numa lel amayim balih ishi baclah kaa xaqqe akah abto alle tane. 4Numa ishi nabsih wanna maki, tee bacli laakin kinni. Amayim balih, bacli ishi nabsih wanna maki, kaa numa laakin kinni. 5Dhaaco abittoona fadhdhan dago waqhteeko bextih sittiyaako mibarhsimina. Sinni nabse tabbarhoona tantenyaako, Sheethan cakanadde sin sayshak, inkidde malammih engela.

6Tayim arhxem laakin fawoh kibah amreh maki. 7Ummanti yotta balih yakkem farhe dhaarhe. Ummanti laakin ishi-ishi muttuxuwa, wuliti wuli cayna, wuliti lel aki cayna Yallaako geyeya le.

8Marcishitinnixe mara kee gubonuk yotta balih cazzaabok defeyaanam akah tashshe arhxe. 9Sinni nabse yabbarhoona taaneenimko laakin, marcishitoona alle tane. Farhih xararaanamko marcishitaanam tashshe.

10 # Maatiyos 5:32; 19:9; Markos 10:11-12; Luukas 16:18 Marcishite marah, (yim akkekkah ta Maddari) amre akah axaye: numa ishi baclaako tamfattaxo teelle mitane. 11Timfittixemko laakin, marcishimekkah marto hido ishi baclaalih wagarto teelle tane. Bacli lel ishi numa yaftaxo kaalle mitane.

12Raace marak lel (Maddara makiiki anu) sinak arhxem, akkinnan sacal aamininnixe numa yeellemko, ishi lel kaalih marto fadhdhemko, tee yaftaxo kaalle mitane. 13Akkinnan numa aamininnixe bacla teellemko, usuk lel teelih maro farhemko, ishi kaa taftaxo teelle mitane. 14Amayim lel aamininnixe bacli ishi numahi sabbatah quddus yakke, aamininnixe numa lel ishi baclahi sabbatah tinqiddise tiyä takkemhi sabbatah kinni. Akke wayemko sin cindham xaraamim yakkin, kado laakin tinqiddisem kinon. 15Aamininnixeti barhsimo farhemko, barhsimoo. Ta gina-le gondodde, sacal yakko sacla ten tarhuwem mitane. Yalli sinah deecimem salaamah martoona kinni. 16Te numa, ku sabbatah ku bacli gargeerimo ayim taarhige? Hido ko bacla ishi numa gargertaado ayim taarhige?

Akah sinah deecimeeniikah mara

17Ummanti Maddari akah yoxoyeekah kee Yalli kaa deece gedda akah yineekah maroo. Tayim umman kaniisalle yi santo kinni. 18Akkinnanti deeco akah tekkemko basolle askok-kalum abeh yineho? Askok-kalum asac-isho farhe wayo. Akkinnanti deeco akah tekke gedda askok-kalum abekkah yineho? Askok-kalum abo farhe wayo. 19Askok-kalum abaanam, hido askok-kalum abe wayaanam walaa inkim maki. Laakin Yallih amre dhawrhaanam kinni fadhdhishimtam. 20Ummanti tamaa deeco akah tekke gedda akah sugeekah defeyo alle tane. 21Deeco koh tekke gedda garuzzo kuuk tine? Amaymidde macalah mirabin. Ishi finja geyto dhictemko, amayim ab. 22Amaa garuzzo kuuk Maddari akah deecimeti, Maddaraako ishi finja geye tiya kinni. Amayim balih, deeco akah tekke gedda ishi finja luuk sugeti, Masiix garuzzo kinni. 23Limoh dhammiime mara kinni kitiinimki, xiyaw garuuza makkina. 24Amaydo, yi saculo, deeco akah tekke gedda farhe xibarah sugeh, ummanti Yallaalih yakkoo.

Marcishitinnixe tiya kee gubna

25Dhaggitinnixe saytoh zacabah yekkemko, yaaminin tiya akko Maddari raxma kabbaate tiya kiyoyaako inni mablo axayik aniyonkah, Maddaraako amre maliyo. 26Ta kado adde nane waqhaaqhac sabbatah, xiyawti kado akah yaneekah sugam mecem kinni. 27Numaalih caqhde turhuweh tanito? Taftaxo miwagiin. Numa hinnimi tanito? Numa miwagiin. 28Marcishittemko laakin zambe malito. Dhaggitinnixe barhä marcishimtemko lel zambe male. Ta gina-le mari laakin, nabrat waqhaaqhac looniyaako, tayimko sin raacisho arhxeh kinni. 29Taymih arhxem kinni yi sacul: yomxoyeh yane waqhti urhurh tiya kinni. Kadok sarrah, tamaa sayyo le mari aalle waya mara balih yakkoonaa; 30tamaa xazzanowa mari lel xazan hin mara balih yakkoonaa; xedena mari lel, xedene waya mara balih yakkoonaa; tamaa dhaama mari lel nuwaa hin mara balih yakkoonaa; 31ta caalamti nabradde hammite mari, macal adde hin mara balih yakkoonaa. Amayim lel ta caalam tillaabak tanemhi sabbatah kinni.

32Atin shaqhla hinnim martaanam sinak farha. Marcishitinnixeti Maddarimidde kee Maddara aaginah xedenishamadde yamsheeqhele. 33Marcishiteti laakin ishi numa aaginah xedenishamadde kee ta caalamtimidde yamsheeqhele. 34Amaymih lel lammaa-garbita. Marcishime wayte, hido dhaggitinnixe barhä lel tee nabse kee ufayi quddus akah yakko ciloh Maddarimih kinni tamxeesebem. Marcishimte numa laakin, ishi bacla aaginah xedenishshamadde kee ta caalamtimidde tamsheeqhele. 35Tayim sinak arhxiyuk anem, meceetih hammitteenih Maddara takhdamoona sin nafaacah erhxek kibah, sinalle ascalasho erhxeh maki.

36Akkinnanti ishi barhäk abak yanem mecim makinam yublemko, ishi lel gufteh tinniyemko, tayim raacinnixem tekkemko, ishi farhi balih aboo; marcishimto tee xaboo, zambi lel alle miyane. 37Laakin akkinnanti ishi afcaadodde akah yeemeneh, farhinnanti kaa qasbishekkah ishi yabbarho dhiicemko, ishi afcaadodde barhäk tee yabbarho abayishemko, mecem abak yane. 38Amaydo, ishi barhä marcishinnanti mecem aba, inkinnah marcaako tee yabbirheti lel amayimko mecem aba.

39Numa tee bacli yanem fanah tumudhdhuwe tiyä kinni. Tee bacli rabemko laakin, Maddarah yaamine tiya bisa yakkoo kibah, isheh fadhdhe tiyadde marcishimto dhicta. 40Yi mablolle laakin, akah taneekah martemko ziyaada xedeneena takke. Anu gantah Yallih Ufaye liyom kinni akkalem.

Currently Selected:

1 Korintos 7: SCC

Highlight

Copy

Compare