1 Korintos 6

Yaamine mari sittiyah aban kisse

1Sinko wuliti akettoolih zagaxa yaalle gedda, ishi gondo yinqiddise maralle beyam hidhdhah, aaginah kinni yifdibeyaako kaa yafradoona xaqqi-wanna akkinnixe maralle yadiyem? 2Hido yinqiddise mari ta caalam yafradoona kinoonim mitaarhigiini? Caalam yafride mara tekkiinik sarrah, ta cindhaahim tafradoona aaginah tantaana? 3Nanu malaykut nafrado kinom mitaarhigiini? Ta udduuniyat gondo amayimko mango! 4Ta udduuniyat gondo akah dhiinishshan dhinto teelliinimko, amaa kaniisadde cara hin marak aaginah dayaanu abtaana? 5Tayim sin xoolayishsho arhxem kinni. Saculti fanadde tane zagaxa dhiinisho dhiica kas-leti sinadde miyane? 6Amayim hidhdhah, sacal sacalko aamininnixe maralle yadiyeh yathrice? 7Sinne-sinneeko abtan tharaaco sin sareenat-rada kinni. Amayimko atin caggaboytaanam mitashshe? Hido atin garcitimtaanam mitashshe? 8Laakin atin sinne caggaboyishsheenih sinne teyleleyin, tayim lel sinni saculuk gantah abten.

9Hido xaqqi-wanna akkinnixe mari Yallih nigsinna yawrashoona makinoonim taarhigiini? Midoolabimina! Uma-xabarlit, asnaamah yacbude mara, yazniye mara, luuthi, 10garaacen, hirfe-lem, sakraaneen, waatimeenit, barheerha Yallih nigsinna yawrashoona makinooni. 11Sinko gari lel ta gina le mara kuuk yinin. Laakin atin Maddara kin Yeesus Masiix migacalle, ni Yallahi Ufayeh cakalteenih, yinqiddise mara tekkiinih, xaqqi-wannun tekkiinih tinin.

Uma-xibarko kudanta

12 # 1 Korintos 10:23 “Yottah ummanim masmuux kinni”, ummannim laakin tamficem maki. “Yottah ummanim masmuux kinni”, laakin farhinnanimih angazzawo makiyo. 13“Folo garbah, garba lel foloh tekke tiyä kinni”, Yalli lel inkoh lammik ten yaylawo kinni. Nabsi Maddarah, Maddari lel nabseh kibah, nabsi uma-xibarah maki. 14Yalli Maddara rabaako uguse, notta lel ishi xaylah rabaako ni uguso kinni. 15Sin nabsi Masiix karim kinam mitaarhigiini? Amaydo, Masiix karim beyeyaako sharmuuthat karim akko abo kiyo? Maale haye! 16#Erhedhdhö 2:24“Lamma inki xazotta yakkoona kinon” yarhxiinim tunkuttubeh akah taneekah, sharmuuthaalih dhiineti, teelih inki nabse yakkem mitaarhigiini? 17Yakko kibah, Maddaraalih yengeleti kaalih inki ufaye yakke. 18Uma-xibarko kudanta. Xiyawti abinnan aki zambi inkoh kaa nabseeko irolle kinni, uma-xibar aba xiyawti laakin ishi nabsek kinni zambe abak yanem. 19#1 Korintos 3:16; 2 Korintos 6:16Hido sin nabsi tamaa Yallaako geyteenih sin addadde yane Quddus kin Ufayehi macbad kinam mitaarhigiini? Atin sinni mara makitiini. 20Amayim lel limoh dhammimteenih kinni. Amaydo, Yalla sinni nabsedde eyneba.

Currently Selected:

1 Korintos 6: SCC

Highlight

Copy

Compare