1 Korintos 4

Fartottitti khidma

1Amaydo, xiyaw notta, Masiix yakhdume mara kee Yallih mashthir kinam yasxedeedere mara balih ni yabloona alle tane. 2Tayimhi osah lel, yasxedeedere mari yaaminin mara yekkiinih sugoona alle tane. 3Anu laakin sin araxah hido aki xiyawhi maxkamah amfirridem yottalle dagum kinni. Rummah, anu inne gantah mafride. 4Anu innedde aarhigemih walaa inkim mitane, taymih laakin barii kiyo macna maki. Yotta yafrideti Maddara kinni. 5Amaydo, waqhti gufekkah walaa inketta mafradina. Maddari yamiitem fanah ilala. Ditedde sucuttem ifolle yeyyeeceyaako, afcaadot macal lel caddoysho kinni. Amaa gedda, ummanti ishi-ishi fayla Yallaako geyo kinni.

6Yi saculo, wuli tiyalle mifalitina, wuli tiya kab-ishsheenih, wuli tiya mirix-miishina. Tamaa: “Tunkuttubeh tanemko foorolle maadayna” akah yarhxeekah, nottaako tadrasoona sin nafaacah erhxeh, inne kee Abolloos misaalah kab sinah isheh aniyo. 7Atu aki maraako akah tashshemih ayim lito? Atu kabbaate waytemih ayim lito? Kabbatteh tinniyemko, kabbaatinnixe tiya balih aymih kinni falittam?

8Mece geddaakoh fadhdhaanam inkoh litin! Mece geddaakoh gaddaalitteenih tanin! Notta hinnim nuguusa tekkiinih tanin! Nanu sinlih nangaso ciloh tingisiinih takkindo amce dhadhdhe! 9Anu laakin Yalli tamaa rabih yimfirride mara balih, nottak fartottittik umman tiyahi sarradde ni hayem kinni akkalem; amayimih lel caalam, malaykut kee xiyaw alle ni tablekkelle ni hayeh yane. 10Nanu Masiixih arhxinuk duudit kino, atin laakin Masiixidde kas-le mara kitin. Nanu rukut mara kino, atin laakin xayla-le mara kitin. Atin xishma-le mara kitin, nanu laakin xishma hin mara kino. 11Ta saaca fanah safriitak, kee bakhaarak, carrazak kee amuttukik nane, dhintima lel malino. 12#Fartottit hi Abittot 18:3Ninni gabubuh akhdumuk lel mangum taanak nane. Wattimna gedda, dhaaco akah abna, haddaanimna gedda, cursuusutna, 13ni yashshaame maralle mece waanih alle nadabbe. Kado fanah lel ta caalamti cuduf kee ummanti xina mara nekkeh nane.

14Tayim sinalle aktubiyuk anem, kixiniyo inni cindham balih sin asuuso kibah, sin xoolaysho maki. 15Masiix araxalle sin santishshamko tamana shiix takkem teelliinimih, mango abbub malitiini. Amaymih, Masiix kin Yeesus mece warehi araxah anu sin abba ekkeh aniyo. 16#1 Korintos 11:1; Filibbi 3:17Amaydo, sin dhaacimak aniyo: atin yi misaal kataa mara tika. 17Taymih kinni lel Timoteyos sinalle farem. Usuk Maddari araxah kixiniyoh umun kin yi barha kinni. Masiixko kin yi aniinah arux umman kanaayisille ayduruseya lel aagina kinam sin xunsuuso kinni. 18Gari lel anu sin fanah amaato maliyom yekkeliinih, amnanabbuk yanin. 19Anu laakin, Yallih farhi tekkemko, dheh sinalle emeeteyaako, tamaa yamnanabbe mari waanishaanam akkekkah, ten xayla ablo kiyo. 20Amayim lel Yallih nigsinna xaylah kibah waanih makinamhi sabbatah kinni. 21Ayim fadhdhaana? Iloolih sinalle amiitemi, woole kaxano kee anoonot ufayelihi?

Currently Selected:

1 Korintos 4: SCC

Highlight

Copy

Compare