1 Korintos 14
14
Nabii balih waanishaanam kee barhsime afofuh waanishaanam
1Kaxano katayteenih, Ufayi muttuxuwa, fertoh lel nabii balih waanishaanam hambereeroolih duumutanta. 2Aki afah waanishati aalih waanisham xiyaw akkekkah Yalla kinamhi sabbatah, kaa yafhimeti miyane, usuk laakin Ufayeh mashthir kinam kinni waanisham. 3Wuli gabooko lel, tamaa nabii balih waanishati xiyaa carishsham, xiyaa aydukumussam kee xiyaa agiirishsham kinni waanisham. 4Tamaa aki afah waanishati ishe carisha, nabii balih waanishati laakin kaniisa carisha. 5Kado, inkoh aki afofuh waanishshoona, fertoh lel nabii balih waanishshoona sinak farha. Kaniisa carto ciloh, amaa aki afofuh waanisham ayfissire wayemko, amaa aki afofuh waanisha tiyaako, nabii balih waanishati naba.
6Kado, yi saculo, wuli waxye, hido irhga, hido nabii balih waanishaanam, hido darse sinah baaho akkekkah aki afofuh waanishak sinalle emeetemko, aaginah sin amfaco kiyo? 7Tamaa ufaye hin, machambara hido kiraar balih yane nuwaa, barhsime muziqqat dhaw aalle wayemko, awlih nuwatta kinam aaginah yamadhdhago kinni? 8Thurumba amidhdhiginnixe dhaw toshshoobbemko, dhibah ugutto lem miya kinni? 9Amayim balih, atin, tamaa waanishshan waani amidhdhiginnixem tekkemko, terhxiinim aaginah tamadhdhago kinni? Xaaxattaalih waanishe mara balih kinni takkiinim. 10Caalamalle shakke hinnim mango caynah waani tane, macna hin waani lel mitane. 11Amaydo, anu tamaa waanih macna sorhemko, tamaa waanisha tiyalle anu godobotta kiyo, usuk lel yottalle godobotta kinni. 12Amayim balih lel atin, Ufayi muttuxuwah hambereera mara tekkiinik sarrah, kaniisa carishsha muttuxuwa wagiyanta.
13Amaydo, aki afah waanishati amayim akah yayfissire dhic yaallo dhaaco aboo. 14Aki afah dhaaco abemko, yi ufayi dhaaco aba, yi xangal laakin fire male. 15Ayim abo yolle tane? Inni ufayeh dhaaco abo kiyo, laakin inni xangalah gantah dhaaco abo kiyo. Inni ufayeh fayla qannisho kiyo, laakin inni xangalah gantah fayla qannisho kiyo. 16Akke wayemko, atu ishi ufayeh cawwatoyshitta gedda, amaa makaanolle yane godobotti, atu cawwatoyshittem aaginah yeerhegeh Amin yarhxo dhiica? 17Atu meceetih cawwatoyshitak tanniye, aketti laakin careh miyane. 18Umbuka sinko ziyaada aki afofuh waanisho dhiicamah Yallah xamde addabbe. 19Yakko kibah, galle aydaraso ciloh, kaniisadde laakin, aki afah cadadamko, inni xangalah koona waanitta waanisham farha.
20Yi saculo, sinni niyah irro makkina. Umaanih zabul tika, sinni niyah laakin hamme-le mara tika. 21#Isayas 28:11-12Sercatadde: “‘Ta xiyawlih aki af kee godobot wagubuh tenlih waanisho kiyo, amayim kinni hanuk yi yaabboona makinooni’ yarhxe Maddari” yarhxiinim tunkuttubeh tane. 22Amaydo, aki afofuh waanishaanam yaamine marah akkekkah, aamininnixe marah ishaara kinni, nabii balih waanishaanam lel aamininnixe marah akkekkah yaamine marah ishaara kinni. 23Amaa kaniisadde inkoh yakattiinih inkoh lel aki afofuh waanishak, godobo hido aamininnixe mari orobeenimko, “Ta mari yicbide mara kinon” yarhxoona makinooni? 24Inkoh nabii balih waanishak, aamininnixeti hido godobotti orobemko laakin, inkoh kaa yashshiminin, umman tenah lel yamfirride. 25Kaa afcaadodde sucutteh tanem tawce: “Rummah sin fanadde Yalli yane” yerhxeh lel kumeyaako Yallah yacbado kinni.
Araxah aban cibaada
26Amaydo, yi saculo ayim abno haye? Takattin gedda, ummanti ishi-ishi faylat mazmuur, darse, waxye, aki af, hido tafsiir leya. Tayim inkoh kaniisat carsah abanta. 27Akkinnanti aki afah waanishemko, lallammaah, yemmengiinimko lel adoddoxuh ibre-ibreh waanishoonaa, inketti lel yayfassaroo. 28Yayfissireti anniye wayemko laakin, kaniisadde sik-yerhxeh ishe kee Yallaalih waanishoo. 29Lamma hido adooxa nabii waanishoonaa, gari lel usun yerhxiinim yamarmaroonaa. 30Tamaa defeyeh yane maraako inkettalle waxyi alle yemeetemko, amaa aftiti sik-yarhxoo. 31Inkoh yadrasoona kee inkoh aydukumusnan geyoona ciloh, inkoh inkeekettah nabii balih waanishshoona dhictan. 32Nobowat ufayit nobowah yam-izzizin. 33Amayim lel Yalli, maaxiyoh Yalla kibah amlolokkaati tiya maki. Umbuka yinqiddise marahi kanaayis balih, 34sayyo kanaayisidde sik-yarhxoonaa. Tenah waanishoona akah mitansimmixemhi sabbatah, tamaa sercat akah yarhxeekah, yam-azzazoonaa. 35Usun yadrasoona farhaanam tinniyemko, carelle sinni baacil esseritoonaa. Amayim lel numa kaniisadde waanishsham xoola kinamhi sabbatah kinni.
36Hido Yallih waanitta sinko kinni temeetem? Hido lel sina bisa kinni guftem? 37Akkinnanti nabii kinam, hido Ufayi adde yanem ishe yakkaleya yinniyemko, ta anu sinalle aktubiyuk anem Maddari amre kinamah yaarhago kaalle tane. 38Tayim aarhige wayemko, kaa taarhigem mitane. 39Amaydo, yi saculo, nabii balih waanishshoona hambereeroolih duumutanta, aki afofuh waanishaanam lel mikalitina. 40Ummannim laakin meceetih farhshiisha araxah takko alle tane.
Currently Selected:
1 Korintos 14: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
