1 Korintos 13
13
Kaxani arax
1Xiyaw kee malaykutti afah waanisha hanuk, kaxano aalle wayemko, karrawraw-yarhxe naxas balih, hido tsallawlaw-yarhxe dawan balih akke. 2#Maatiyos 17:20; 21:21; Markos 11:23Nabii balih waanisho muttuxuwa eellemih, umbuka mashthir kinam kee irhga eerhegemih, koomam yazgeeceze imaan eelleh, kaxano aalle wayemko, anu foyya kiyo. 3Inkoh liyom oxoyemih, inni nabse xararo oxoyemih, kaxano aalle wayemko, walaa inkim yi mitamfice.
4Kaxani sabre kee mecaani kinni, kaxani mashshiina, mifalita; miyamnanabbe 5hido adabe-male maki. Kaxani inneh miyarhxe, dheh mikurra, hido nacabo miraacisha. 6Kaxani xaqqelle xedena kibah umaani mikixina. 7Kaxani ummannim cura, ummannim yaamine, ummanimih niya abita, ummanimille yasbire.
8Kaxani caduruh mibakita. Nabii balih waanishaanam yekkemko inkoh tillabto kinni; barhsime afofuh waanishaanam yakkeedo, daw-tarhxo kinni, irhga yakkeedo, tillabto kinni. 9Tamaa naarhigem kee nabii balih waanishnam abrha kinni, 10tamaa naqhuse hinam tamiite gedda laakin, amaa naqhuse lem tillabto kinni. 11Anu cindhooka kiyuk, cindhooka balih waanishak ine, cindhooka balih axeesebiyuk ine, cindhooka balih esserimak ine. Labhatto ekke gedda, irriinan xabe. 12Kado magannaxitille dibishbishih abluk nane, sarrah laakin nif kee nifih nablo kino. Kado aarhigem abrha kinni, sarrah laakin anu inkoh akah imidhdhigeh aniyookah inkoh aarhago kiyo.
13Amaydo kado, imaan, cag kee kaxano adoxuk raacan, umman tenko nabati laakin kaxano kinni.
Currently Selected:
1 Korintos 13: SCC
Highlight
Copy
Compare
Share
Want to have your highlights saved across all your devices? Sign up or sign in
©2024 Wycliffe Ethiopia
