1. Korintarya 9
9
O Paulo kamell gar, te vell lo playsedo
1Dikenn ap mande, har me hom! Me nay kroms, hoy me kamau, oun me krau les gar. Hom me gar o Yezouseskro bičepaskro? Ava, me hom o Yezouseskro bičepaskro. Me dikom o Yezouses, maro rayes. T'mer djinenna, koon t'men ap o Debleskro drom anas. Kova homs me.
2Vavar penenna, te hom me gar o Yezousestar bičedo. T'mer djinenna, kay man o Yezous Kristo bičras. Oun har me ap t'mende lestar rakrom, van t'mer patslo. 3Kolla, kay kamenn doosh ap mande te anell, kolendar poučau: 4Hi men gar ko čačepen, te rhas oun te piyas pash t'mende? 5Hi men gar ko čačepen, te romedinerah nay i patsli djouvyat, oun te las lat mentsa, yaake har krenna kol vavar Yezouseskre bičepangre oun leskre phrala oun o Petro? 6Me poučau t'mendar: Hounte boudrap me oun o Barnabas maro rhapaske kokres? 7Kek tserdella an o kourepen oun playsrell pes kokres. Kek čivell i drakengre rouka an i phoub, oun rhal gar i drake. Kek dell peskre bakren zenlepen te rhal, oun piyell gar lengro thoud. 8Hoy me penau, vell gar i menshendar. Kova penell menge o Debleskro lab. 9An o Moseskre lila hi činlo: I groumni, hoy boudrell, te dell li o djob dran o phouss, ma pande lakro mouy!#9:9 dik: 5. Mose 25:4
Hi o Debleske i groumni ap o dji čiddo? Na-a! 10Ap mende penell o Devel kova. Doleske hi ninna menge činlo: Ko harho, kay boudrell ap peskro kotar phoub, krell kova, te anell lo boud djob dren. Oun kova, kay dell o djob dran o phouss, boudrella, te nay rhal lo kolestar. 11Te anam mer t'menge o Debleskro lab, nay denn t'mer men ninna te rhal. 12Te hi i vavaren ko čačepen ap kova lauter, hi men ko čačepen ninna. Ninna te hi kova yaake, lah kova gar menge. Me kamoms gar, te rakrell yek pral mende, te penah i menshenge o Yezous Kristestar, te vas mer playsedo. 13Djinenn t'mer gar, kay kolla, kay an o Debleskro baro kheer boudrenna, kote lenna, hoy len hounte vell djipaske? Oun kolla, kay anenn marede firhen glan o Debleste, kolla nay rhan ninna i kotar kolestar, hoy o Debleste dino vella. 14Yaake penas maro ray Yezous ninna, te lenn kolla, kay leskro lab i menshenge penenna, kova, hoy len hounte vell djipaske. 15Kava čačepen lom mange gar: Me lom či t'mendar. Me činau kova gar, te vap me kanna t'mendar playsedo. Feteder vals, me meroms, har te penenn i menshe mange palla, te playsrenn t'mer man. Me nay sharau man, te penau i menshenge o lačo lab o Yezousestar čičeske.
16Me sikrau i menshende leskro drom gar, te vap sharedo. Na-a, me hounte rakrap lestar. Har bibarhtelo voms, te kroms kova gar! 17Te kroms me kova mandar, palle nay loms me kova playsedo. Me krau kova gar mandar. O Devel das man koy boudi.
18Hoy lau me koleske? Me lau či. Mange hi shoukeder te penap o lačo lab o Yezous Kristestar čičeske, har te vap me playsedo.
O Paulo krell pes boudepaskro lauterenge
19Kek mensho hi miro ray. Ninna te krau nay, hoy kamau, krom me man boudepaskro lauterenge, te anap nay yaake boud menshen pash o Yezouseste har djala. 20Te hom pash i biboldende, palle djivau har i biboldo, oun rikrau man ap o Moseskre laba, te anap i bibolden pash o Yezouseste, ninna te hom me gar tel o Moseskre laba tardo.
21Te hom me pash i menshende, kay rikrenn pen gar ap o Moseskre laba, palle djivau me har yon, te anap len pash o Yezous Kristeste, ninna te rikrau me man ap o Debleskro čačepen. Oun kova hi o Yezous Kristeskro lab.
22Pash kolende, kay hi gar zoreles an o patsepen, djivau me yaake har yon djivenna. Kova krau me, te vell lengro patsepen ap o Yezouseste zoreles. Me vom lauterenge yaake har yon, te rodap i drom, te anap len pash o Yezous Kristeste.
23Kova lauter krau me, te patsenn boud ap o lačo lab o Yezous Kristestar, te lap ninna kova, hoy mange o Devel an peskro lab penella.
I patsle hi har i naashepangre
24Hayvenn! Kol naashepangre nashenn lauter, oun hakeno kamell o glanstouno te vell. Yek kokres vell o glanstouno. T'mer patsle, hounte nashenn yaake ap t'maro patsepaskro drom, har te kamans o glanstouno te vell! Palle lenn t'mer o shoukar koova, hoy o glanstouno lella! 25Kol naashepangre rikrenn pen lauterestar pale, hoy len khino krella. Ko shoukar koova, hoy kolla lenna, kova ačell gar hako tsiro. Hoy mer patsle lah, kova ačella hako tsireske. 26Me nashau yaake har yek, kay djinella, kay yob nashella. Me kourau man gar har yek, kay dell troul peste. 27Oun me dau yak ap mande, te vap o ray pral miro mass. Me kamau gar te penap i menshenge, hoy yon hounte krenna, oun me kokres krau les gar.
Currently Selected:
1. Korintarya 9: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
