1. Korintarya 8
8
Ma krenn či, hoy anell t'mare phralen o Debleskro dromestar tele!
1T'mer poučan mandar: “Nay rhah mer, kay patslo ham, ko mass, hoy vas glan i figura anlo, hoy mangenn le an, har te vals li i devel?” Hi čačo, mer halauter ham gosevo oun djinah čomone pral kava koova. Koon patsell, te hi les boud gosvepen, kova patsell sik, te hi lo bareder har ko vavar. Koon o djiyestar o vavares kamella, koles krell yob zorelo oun gar tikno.
2Koon patsella, te hi lo gosevo, kova djinell gar, hoy čačo gosvepen hi. 3Koon čačepah gosevo hi, kova kamell o Debles o djiyestar. Oun o Devel prindjrell les.
4Nay rhah mer kanna ko mass, hoy anan le glan i figura, hoy mangenn le an, har te vals li i devel? Mer djinah halauter, kay hi i figura kek čačo devel. Dell yek Devel oun kek vavar. 5Ninna te hi savo koova an o bolepen oun ap i phoub, hoy i menshe an-mangenna, oun ninna te dell boud, ap kolende i menshe penenna “mo devel” oun “mo ray”, 6hi men yek Devel. Kova hi maro dad an o bolepen, oun dran leste vell halauter. Oun mer ham leske koy. Oun men hi yek ray, kova hi o Yezous Kristo. Lestar vas halauter. Oun lestar lam mer o nevo djipen.
7Hakeno hayvas kava gar. Hi patsle, te rhan yon ko mass, hoy glan i figura anlo vas, hi kova lenge, har te mangans le koy figura an, yaake har an ko tsiro, kay his le gar patslo. Oun lengre djia, kay gar zoreles an o Debleste hi, penenn lenge, te anan le doosh ap pende. 8Kolenge penau me: O rhapen krell men gar pale-čiddo glan o Debleste. Te ham dareno, te rhas yek rhapen, ham gar tikneder glan o Debleste. Te ham gar dareno, te rhas kova, ham gar feteder glan leste. 9Kova hi t'maro koova, hoy t'mer krenna. Ninna te hi kova yaake, denn yak ap kolende, kay gomme gar zoreles an o patsepen hi, te perenn yon gar o Debleskro dromestar tele! 10Tou patseh, tou hal gosevo an o patsepen oun hayval, te nay rhah ko mass, hoy glan koy figura anlo vas, oun tou djah an ko kheer, kay mangenn le kolat an, oun rhah ko mass. Djineh tou, hoy nay vella, te dikell tout yek, kay gar zoreles an o patsepen hi? Kova nay vell yaake, te rhal yob ninna ko mass, ninna te penell leskro dji leske: “Ma kre kova!”
11Oun ko phraal, koleske o Yezous Kristo meras, oun kay hi gar zorelo an o patsepen, nashrell peskro patsepen doleske, kay tou patseh, te hal gosevo. 12Me penau t'menge: T'mer te krenn savo čilačo koova ap t'mare phralende oun krenn, te vell len i djoungelo dji, palle krenn t'mer i čilačo koova ap o Yezous Kristeste.
13Doleske, te dikell miro phraal, kay rhau ko mass, oun doleske vell lo o Debleskro dromestar tele, palle kamoms me miro tselo djipen bouder kek mass te rhal.
Currently Selected:
1. Korintarya 8: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
