1. Korintarya 10
10
Ma mangenn vavar koova an har o Debles!
1-2Mire phrala, ma bistrenn, har djas mare phourenge, har djan yon an o moulo them. I folka djas glan lende lauterende oun sikras lende, kay o Devel pash lende his. Oun yon halauter djan o Moseste palla mashkral o baro pani ap i vavar rig. Mer nay penams: Har van yon an i folka oun an o baro pani, van le ap o Moseskro lab taufedo. 3Oun yon halauter rhan ko yek rhapen, hoy vas o Deblestar. 4Oun yon piyan lauter ko yek pipen, kay vas o Deblestar. Yon piyan ko pani, kay vas dran i baro bar vin, kay lentsa djas. Ko bar his o Yezous Kristo. 5Ninna te his yaake, nay dikas o Devel gar lačes ap boud lendar. Oun yon meran an o moulo them.
6Kova, hoy kote djas, kamell menge zoreles te penell, te djal maro dji gar pal o čilačo koova, yaake har kolengro dji pal o čilačepen djas.
7Ma mangenn vavar koova an har o Debles! Mank kolende an o phouro tsiro his save, kay kran kova. An o Debleskro lab hi činlo: Yon beshan tele, te rhan le oun piyan le oun stan pre, te khelenn le glan o sonakaskro firho.
8Mer te loubras vitar gar trouyel. Mank kolende his save, kay kran kova, oun lendar meran biish-te-triin zerya menshe ap yek dives.
9Ma rhoyrenn o Yezous Kristes, har kolla an o phouro tsiro o Debles rhoyran, har kran le, har te vals les kek zoor. Oun i sapa dandran len. Oun yon meran.
10Ma penenn, kay kova gar mishto oun doha hi, hoy o Devel t'men das. Yaake rakran kol vavar pale te pale. Oun yon van moulo dino. 11Kova lauter, hoy ap lende vas, sikrell men, hoy nay vella. Oun mer, kay djivah kava dives oun djinah, te ačell kava tsiro bouder gar rah, menge vas kova činlo an i lila, te das mer yak ap mende.
12Doleske, koon penella, kay yob zoreles an o patsepen hi, dell yak, te perell lo gar.
13Della savo koova, hoy kamell t'men o Debleskro dromestar tele te anell. Dikenn, savo koova vas ninna ap vavar menshende. Te vell pharo koova ap t'mende, dell o Devel t'men koy zoor, te nay hidjrenn kova. Yob hatsell i drom, te venn pale kote vin.
T'mer nay rhan gar o Yezouseskro rhapen oun o bengeskro rhapen
14Doleske, lače mala, denn yak, oun mangenn gar vavar koova an har o Debles! 15Me rakrau t'mentsa har menshentsa, kay goseve hi. Poučenn t'maro dji, te hi kava lauter čačo, hoy me penau! 16Te vah khetne, te piyas dran o Yezouseskro khoro, parkrah men koleske pash o Debleste, oun djinah, o Yezous Kristo ratas oun meras menge oun las mari doosh mendar krik. Te phagah ko maro oun rhah les, rikrell men kova o Yezous Kristeha khetne.
17Mer rhah yek maro. Doleske hi men yek djipen khetne o Yezouseha, ninna te ham boud patsle. 18Kova hi yaake, har pash i menshende an Israel. Yon van khetne oun rhan kol firhendar, kay anan le o Debleske. Lauter kolla, kay rhan, his khetne. Oun o Devel his mank lende. 19Me kamau t'mendar te poučell: Hi i figura i čačo devel? Na-a! Hi ko mass, hoy anan le glan late, vavarčandes har vavar mass? Na-a!
20Kova, hoy i menshe kol deblen dran kasht oun bar denna, anenn yon i bengenge,#10:20 I bibolde patsan, kay his yek pralstouno beng oun ninna boud tikne benga, kay leske koy hi. gar o Debleske. Oun me kamau gar, te venn t'mer i bengentsa khetne. 21T'mer nay piyenn gar dran o Yezouseskro khoro oun dran o bengeskro khoro. T'mer nay rhan gar o Yezouseskro rhapen oun o bengeskro rhapen.
22Ma rhoyrenn o Debles! Mer ham gar zorleder har yob.
Dikenn ap o vavareste, hoy leske mishto hi!
23T'mer penenn: “Lauter nay krah mer.”
Me penau: Gar lauter hi lačo. Lauter nay krah mer. Gar lauter, hoy mer krah, hi mishto menge oun i vavarenge.
24Dikenn gar ap t'mende kokres! Pash halauter, hoy t'mer krenna, dikenn ninna ap o vavareste, hoy leske mishto hi!
25T'mer nay rhana hako mass, hoy bikedo vella. Ma poučenn, konestar ko mass vella, te vell t'menge gar phares an o dji!
26Djinenn, i phoub oun lauter, hoy koy pre hi, hi o Debleskro.
27Te penell t'menge yek, kay gar patslo hi: “Avenn pash mande oun rhan mantsa,” palle djan koy! Oun rhan pash leste lauter, hoy yob t'menge anella! Ma poučenn, kay ginas lo ko rhapen, te vell t'menge gar phares an o dji!
28Kova hi vavarčandes, te penell t'menge yek: “Kava rhapen vas i debleste dran kasht oun bar dino.” Palle ma rhan ko mass, te vell koleskro dji gar djoungeles, kay kova t'menge penas. Yob nay penals: “Hi mishto, te rhap ko rhapen.” 29Me rakrau gar t'mendar, rakrau ko vavarestar, te vals kova gar mishto leske, te rhals yob ko mass. Mange nay penell kek vavar, hoy me nay krap oun hoy gar.
30Te rhau i rhapen oun parkrau man koleske pash o Debleste, nay praasell man kek, te rhau me ko rhapen.
31Hoy t'mer ninna krenna oun rhana oun piyenna, kova krenn lauter yaake, te vell o Devel sharedo.
32Djivenn yaake, te rhoyrell pes kek pral t'mende: kol bibolde gar, oun kolla, kay kek bibolde hi vitar gar, oun vitar gar kol patsle, kay venn t'mentsa khetne.
33Me krau lauter, te djivap yaake, har hakeneske mishto hi oun rodau gar, hoy mange mishto hi. Me kamau kova te krell, hoy boudenge mishto hi, te djan yon gar nashedo.
Currently Selected:
1. Korintarya 10: Sint-Man2024
Highlight
Share
Copy
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.
