Mathiơ 17
17
Yêsu pơlih dr̂ơi-jĕn ñu
(Mak 9:2-13; Lŭk 9:28-36)
1Năm r̂ơi dơdơi mơ̆ng anŭn Yêsu jak Pêtrôih, Yakô̆p, dăp Yôhan dơi Yakô̆p nao hr̂ŏm ñu, nŭn ba nao gơñu pơ kŏ čĭ glong taih mơ̆ng r̂ăng. 2Pah anŭn Yêsu pơlih dr̂ơi-jĕn ñu ti năp gơñu, ƀŏ ñu đaih kơmlă hla ti yang r̂ơi,#An Pơƀôh 1:16. hnă ñu buh, tih hla ti klơi đaih. 3Nŭn, plŭt, gơñu ƀôh Môsê dăp Êliya r̂ai hiăp pơphol hr̂ŏm Yêsu. 4Nŭn Pêtrôih hiăp hr̂ŏm Yêsu, ñu laĭ: «Ơ Khua, hiam yơh ta dŏ ha ane, jơ̆ bŭt ih čiăng, kâo ti ngă nŏm klâo boh ha ane, ha boh br̂ơi ih, ha boh br̂ơi ơi Môsê, ha boh dŏng br̂ơi ơi Êliya.» 5Pah Pêtrôih dŏ nŏng pơhiăp, plŭt, hmâo gơnăm tih kơmlă gom lôi gơñu,#An Biă 24:15-16. nŭn hmĭ ñi mơ̆ng gơnăm nŭn laĭ: «Ne yơh nă đahkơi kâo pơ-eng-leng, kâo bŏ bŭt mơ̆ng ñu jat. Hmĭ ñu wŏ!»#An Juăt 18:15; Doh 2:7; Mat 3:17; 12:18. 6Tơl môt hyĕn tui hmĭ nĭng nŭn, gơñu bon kô̆p kŏ pơ kơnah dăp gơñu huĭ jat. 7Jr̂ŏng nŭn Yêsu nao kr̂eh gơñu, ñu laĭ: «Gŭ wŏ! Anăm huĭ ôh!» 8Tơl gơñu ngak đĭ, gơñu bĭ ƀôh lơi-lơi ôh, ƀôh kăn ha dr̂ơi-jĕn Yêsu đơč.
9Pah gơñu tr̂ŭn mơ̆ng kŏ čĭ, Yêsu khă gơñu: «Anăm r̂ă br̂ơi r̂ăng mơ̆ng buă gô-ih ƀôh ne ôh, khă tơl kâo Nă Mơnuih dĭp glaĭ mơ̆ng môt djai ƀơĭ.» 10Nŭn môt hyĕn tui kơña Yêsu, gơñu laĭ: «Yua yĕt môt gru pơto klơi juăt Môsê laĭ, ơi Êliya djơ̆ r̂ai pơ lŏn kơnah hlâo Yang Krih?» 11Yêsu til glaĭ: «Dơdi yơh, Êliya ñu ti r̂ai čiăng pơkr̂a glaĭ bih-tih buă.#An Mal 4:5-6; Lŭk 1:13, 16-17. 12Kâo r̂ă br̂ơi gô-ih dŏng, Êliya r̂ai boih,#An Mat 11:13-14. plai r̂ăng bĭ thâo kr̂ăn ñu ôh, r̂ăng ngă set ñu tui bŭt gơñu hăt ngă.#An Mat 14:3-10. Gơñu ti ngă br̂ơi kâo Nă Mơnuih hmâo klơi kơnap-tap nĭng nŭn mơ̆n.» 13Pah anŭn môt hyĕn tui Yêsu, gơñu thâo hông laĭ Yêsu pơhiăp mơ̆ng Yôhan Ƀatem.
Yêsu khu yang set pơđơi biă mơ̆ng muai
(Mak 9:14-29; Lŭk 9:37-43)
14Tơl gơñu tr̂uh r̂ai pơ mơnuih bơlô, nŭn hmâo đahkơi ha r̂ăng r̂ai tŏ ŭt ti năp Yêsu, ñu laĭ: 15«Ơ khua! Dueh mơ̆ng ih pap-dr̂ap br̂ơi nă đahkơi kâo he wŏ, yua ñu hơwing kơnap-tap kơtang jat. Ñu lơbuh tăm phui, wŏt lơbuh tăm ia kơtă-kơtă. 16Kâo ba nao ñu pơ môt hyĕn tui ih mơ̆n, plai gơñu bĭ anăm ngă pơhuai ñu le.» 17Yêsu til glaĭ: «Ơ nôk mơnuih bĭ ngư̆ dăp hmâo bŭt wĕ-wŏ! Hiư̆m, kâo ti dŏ hr̂ŏm gô-ih dơ̆ pă dŏng? Hiư̆m, kâo ti ĕñ hr̂ŏm gô-ih dơ̆ pă dŏng? Ba r̂ai nă muai nŭn pơ kâo wŏ.» 18Yêsu hiăp khu yang set, nŭn yang set biă đuĕ mơ̆ng muai nŭn, jr̂ŏng nŭn nă muai ki huai ha anŭn he boih.
19Jr̂ŏng nŭn môt hyĕn tui r̂ai pơ Yêsu har̂oh gơñu, nŭn gơñu kơña laĭ: «Yua yĕt mơi bĭ anăm pơpŏl đuĕ yang set nŭn?» 20Yêsu til glaĭ pơ gơñu: «Yua gô-ih hmâo klơi ngư̆ anĕt đơi. Kâo r̂ă br̂ơi gô-ih dơdi laĭ, jơ̆ gô-ih hmâo klơi ngư̆ đơl săl bơjeh djĕ đơč, nŭn gô-ih ti pơđơi kŏ čĭ ne laĭ, “Đuĕ wŏ mơ̆ng ane, nao dŏ pơ dih!” Nŭn ñu ti đuĕ. Bĭ hmâo nŏ yĕt gô-ih bĭ thâo ngă ôh.#An Mat 21:21-22. 21[Plai yang set neo ne, hmâo ha tô̆ gô-ih iâo-laĭ ĭ ƀŏng huă đơč, gô-ih mơ̆ng anăm pơpŏl đuĕ ñu].»#17:21 Hla hr̂ă Mathiơ hađăp jat mơ̆ng đim a čih mơ̆ng ngan bĭ hmâo ôh jlan 21 ne. Hla hr̂ă dơdơi iă pơanah hmâo, pơanah bĭ hmâo. An Mak 9:29 .
Yêsu laĭ ha wŏt dŏng mơ̆ng klơi ñu ti djai
(Mak 9:30-32; Lŭk 9:43-45)
22Tơl môt gơñu pơtŭm gŏp gơñu mơ̆ng Galilê, nŭn Yêsu pơhiăp hr̂ŏm gơñu, ñu laĭ: «Kâo Nă Mơnuih, r̂ăng ti mop nao pơ ngan mơnuih, 23nŭn gơñu ti pơdjai lôi kâo, jr̂ŏng nŭn kloh klâo r̂ơi Ơi Adai ti bơdĭp glaĭ kâo.»#An Mat 16:21; 20:18-19. Pah anŭn bŭt môt gơñu hyŏk kơtang jat.
Yêsu ƀŏng len br̂ơi sang yang mơ̆n
24Tơl gơñu tr̂uh nao pơ plơi Kapơnơ̆m nŭn môt tĭ puŏn pr̂ăp čr̂oh br̂ơi sang yang,#An Biă 30:13-16. gơñu r̂ai kơña Pêtrôih: «Gru gô-ih ƀŏng len br̂ơi sang yang mơ̆n ah?» 25Ñu til glaĭ: «Ơ, ñu br̂ơi mơ̆n!» Tơl Pêtrôih mŭt tăm sang, Yêsu kơña hlâo laĭ: «Simôn, ih khư̆t hiư̆m pă? Hiư̆m, pơtao mơ̆ng lŏn kơnah, ñu tĭ puŏn mơ̆ng nă čo ñu pô ah? Lơ mơ̆ng r̂ăng pơkŏn?» 26Nŭn Pêtrôih til glaĭ: «Mơ̆ng r̂ăng pơkŏn.» Yêsu hiăp glaĭ pơ ñu: «Jơ̆ nĭng nŭn, nă čo ñu lơngai yơh. 27Plai ta bĭ čiăng r̂ăng hêl yua ta ôh. Nĭng nŭn yơh, br̂ơi ih nao wah pơ ia gơnao, mă tô̆ kan djơ̆ hlâo, jr̂ŏng nŭn hak bah ñu, nŭn ih ti ƀôh kăk ha tô̆. Tô̆ kăk nŭn ba nao ƀŏng br̂ơi kâo wŏt ih he mơ̆n.»
© 2024, Wycliffe Bible Translators, Inc.