Mathiơ 16
16
Môt Pharasi dăp môt Sađusi dueh čiăng ƀôh klơi myang
(Mak 8:11-13; Lŭk 12:54-56)
1Môt Pharasi dăp môt Sađusi r̂ai čiăng long-lăng Yêsu, gơñu dueh čiăng ƀôh Yêsu ngă klơi myang mơ̆ng adai.#An Mat 12:38; 1Kô 1:22. 2Yêsu til glaĭ pơ gơñu: «Tơl jĕ klăm gô-ih laĭ, “R̂ơi gla adai ti khong, yua gơnăm myah.” 3Tơl guah gô-ih laĭ, “R̂ơi ne ti hmâo angĭn lơbŭ, yua gơnăm tăm mĕk dăp adai myah.” Gô-ih thâo hông mơ̆ng kơthŭl gơnăm, plai gô-ih bĭ thâo hông klơi Ơi Adai ngă mơ̆ng nôk nêne ôh. 4Nôk mơnuih ne set dăp bĭ kơpă hr̂ŏm Ơi Adai, gơñu hla ti bơnai ngă kao kŏ kơi. Gơñu sem čiăng ƀôh klơi myang, plai Ơi Adai bĭ pha br̂ơi gơñu ƀôh ôh, gơñu ti ƀôh ha tô̆ klơi myang Ơi Adai ngă mơ̆ng Yônah.»#An Mat 12:39. Jr̂ŏng nŭn Yêsu biă đuĕ mơ̆ng gơñu.
Pơi môt Pharasi dăp môt Sađusi
(Mak 8:14-21)
5Tơl môt hyĕn tui Yêsu găn nao tr̂uh hang gah dih, gơñu wĕč djă ba nŭmpăng. 6Yêsu pơhiăp hr̂ŏm gơñu: «Br̂ơi gô-ih khư̆t iă hŏ, dăp lơwăng mơ̆ng pơi nŭmpăng môt Pharasi dăp môt Sađusi.» 7Nŭn môt hyĕn tui Yêsu bơgĭt gŏp gơñu, gơñu laĭ: «Ñu hiăp ne yua ta bĭ djă ba nŭmpăng thâo?» 8Yêsu thâo mơ̆ng klơi gơñu bơgĭt ne, ñu pơhiăp laĭ: «Ơ mơnuih hmâo klơi ngư̆ anĕt, yĕt gô-ih bơgĭt mơ̆ng klơi bĭ hmâo nŭmpăng hla ne lĕ? 9Hiư̆m, gô-ih ka hông le ah? Hiư̆m, gô-ih bĭ čăm ôh, mơ̆ng nŭmpăng ma tô̆, ngă br̂ơi mơnuih ma bâo r̂ăng ƀŏng tr̂ơi soh-sel, nŭn gô-ih dôñ pơƀô̆ nŭmpăng lơbeh hmâo dơm gơjơ dŏng?#An Mat 14:17-21. 10Hiư̆m, gô-ih bĭ čăm ôh, mơ̆ng nŭmpăng juh tô̆, ngă br̂ơi mơnuih pă bâo r̂ăng ƀŏng tr̂ơi, wŏt gô-ih dôñ pơƀô̆ nŭmpăng lơbeh hmâo dơm gơjơ dŏng?#An Mat 15:34-38. 11Yua yĕt gô-ih bĭ hông lĕ? Kâo bĭ hiăp mơ̆ng nŭmpăng ôh. Kâo čiăng gô-ih lơwăng mơ̆ng pơi môt Pharasi dăp môt Sađusi!» 12Mơ̆ng anŭn gơñu hông glaĭ, Yêsu bĭ r̂ă br̂ơi gơñu lơwăng mơ̆ng pơi nŭmpăng nŭn ôh, Yêsu r̂ă br̂ơi gơñu lơwăng mơ̆ng klơi pơto môt Pharasi dăp môt Sađusi.
Pêtrôih laĭ «Ih yơh Yang Krih»
(Mak 8:27-30; Lŭk 9:18-21)
13Jr̂ŏng nŭn Yêsu nao pơ ƀon dŏ jĕ plơi Sêsara Philip. Tơl pơ anŭn ñu kơña môt hyĕn tui ñu, ñu laĭ: «Kâo Nă Mơnuih, tui r̂ăng laĭ, kâo lơi?» 14Gơñu til glaĭ: «Pơanah laĭ ih Yôhan Ƀatem, pơanah dŏng laĭ ih Êliya, pơanah dŏng laĭ ih Yêrêmie lơ pô ba pơhiăp pơkŏn dŏng.»#An Mat 14:1-2; Lŭk 9:7-8. 15Yêsu kơña gơñu: «Plai gô-ih dŏng laĭ kâo lơi?» 16Simôn Pêtrôih laĭ glaĭ: «Ih Yang Krih, nă Ơi Adai Yang Hơdĭp.»#An Mat 3:17; 4:3; 14:33. 17Yêsu pơhiăp til glaĭ pơ ñu: «Ơ Simôn nă Yônah, ih hmâo klơi nŭk-nua yơh, klơi ih laĭ ne bĭ r̂ai mơ̆ng nă mơnuih ôh, Ma kâo dŏ mơ̆ng adai dih yơh pô br̂ơi ih thâo.#An Mat 13:11. 18Kâo r̂ă br̂ơi ih, ƀŏ ih a iâo “Pêtrôih”» (čiăng laĭ “Bohtâo”). «Ngŏ bohtâo ne kâo ti bơdŏng môt sang jnŭm kâo,#An Êph 2:19-20. wŏt klơi djai#16:18 Klơi djai nŭn Krĭk laĭ «Bah amăng jang plơi tâo djai.» bĭ anăm môt sang jnŭm ne le. 19Kâo ti br̂ơi ih nă kơče#An Pơƀôh 3:7. pih bah amăng br̂ơi r̂ăng mŭt tăm klơi Ơi Adai wai-lăng. Kơđi yĕt ih kă mơ̆ng lŏn kơnah ne, nŭn Ơi Adai kă pơ adai dih boih, wŏt kơđi yĕt ih kleh mơ̆ng lŏn kơnah ne, nŭn Ơi Adai kleh pơ adai dih mơ̆n.»#An Mat 18:18. 20Jr̂ŏng nŭn Yêsu khă bĭ br̂ơi môt hyĕn tui ñu r̂ă thâo r̂ăng laĭ ñu Yang Krih ôh.
Yêsu r̂ă thâo hlâo mơ̆ng klơi ñu ti djai
(Mak 8:31—9:1; Lŭk 9:22-27)
21Tô̆ mơ̆ng r̂ơi nŭn Yêsu r̂ă thâo br̂ơi môt hyĕn tui ñu, ñu khŏm nao pơ plơi Yêrusalĕm, dăp ñu ti tô̆ klơi kơnap-tap lô#An Êsai 53:3; Mat 26:67-68. mơ̆ng môt kŏng-tha, môt tha ngă yang, dăp môt gru pơto klơi juăt Môsê.#An Mat 26:57; 27:1-2. Gơñu ti pơdjai lôi Yêsu, nŭn kloh klâo r̂ơi Ơi Adai ti bơdĭp glaĭ ñu.#An Mat 12:40; 28:1-6. 22Pah anŭn Pêtrôih jak Yêsu nao dŏ phar̂a lôi mơ̆ng gŏp gơñu, nŭn ñu hiăp bơgăn lôi Yêsu: «Bĭ ôh, khua! Kâo dueh mơ̆ng Ơi Adai anăm br̂ơi buă ne tơl r̂ai pơ ih ôh.» 23Nŭn Yêsu wih glaĭ pơ Pêtrôih, pơhiăp laĭ: «Ơ Satan, ŏng đuĕ wŏ mơ̆ng kâo! Yua ŏng bơgăn lôi glan kâo, ŏng khư̆t bĭ djơ̆ tui klơi khư̆t Ơi Adai ôh. Klơi ŏng khư̆t, nŭn klơi khư̆t nă mơnuih đơč.»
Glăm kơyâo pơkăl đuĕ tui Yêsu
24Jr̂ŏng nŭn Yêsu r̂ă br̂ơi môt hyĕn tui ñu, ñu laĭ: «Lơi čiăng bat tui kâo, br̂ơi ñu klaih lôi klơi hơdĭp ñu pô, glăm kơyâo pơkăl, đuĕ tui kâo.#An Mat 10:38. 25Lơi čiăng r̂ăk klơi hơdĭp ñu pô, ñu ti ñă klơi hơdĭp. Lơi pơñă klơi hơdĭp ñu pô yua kâo, ñu ti hmâo glaĭ klơi hơdĭp dŏng.#An Mat 10:39. 26Jơ̆ mơnuih ha r̂ăng hmâo bih dr̂ăm mơ̆ng lŏn kơnah ne, plai klơi hơdĭp ñu ñă, hiư̆m, ñu hmâo kha mơ̆n? Bĭ hmâo kha ôh! Dr̂ăm yĕt ñu ti tô̆, čiăng nao pơlih glaĭ klơi hơdĭp ñu?
27«Yua kâo Nă Mơnuih ti r̂ai hr̂ŏm môt ling-jang kâo, kâo ti ba r̂ai klơi gơdr̂ih-gơdr̂ŏng Ơi Adai Ma kâo.#An Mat 25:31. Jr̂ŏng nŭn kâo ti br̂ơi glaĭ gr̂ư̆ mơnuih tui buă gơñu ngă.#An Doh 62:12; Rôm 2:6; 2Kô 5:10; Pơƀôh 22:12. 28Kâo r̂ă br̂ơi gô-ih dơdi laĭ, hmâo mơnuih pơanah dŏ dŏng tăm ta ne, gơñu bĭ djai ôh, khă tơl gơñu ƀôh kâo Nă Mơnuih r̂ai ngă pơtao wai-lăng.»
Currently Selected:
Mathiơ 16: JKB
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc.