Mathiơ 13
13
Klơi pơyap mơ̆ng pô jai bơjeh
(Mak 4:1-9; Lŭk 8:4-8)
1Mơ̆ng r̂ơi nŭn mơ̆n Yêsu biă đuĕ mơ̆ng sang, nao dŏ ben pơ hang ia gơnao. 2Pah anŭn mơnuih lô kĕt-keng jak gŏp gơñu r̂ai dŏ jŭm dăl Yêsu, nŭn ñu tr̂ŭn nao dŏ tăm duk, bih mơnuih lô nŭn dŏ dŏng ti hang ia. 3Ñu pơhiăp pơyap lô klơi pơkŏn-pơkŏn, ñu laĭ: «Hmĭ ho, hmâo mơnuih jai bơjeh ha r̂ăng biă nao jai. 4Tơl ñu jai, hmâo bơjeh pơanah lĕ r̂ok glan, nŭn čĭm pŏl r̂ai čoh ƀŏng lôi bih hĕ. 5Hmâo bơjeh pơanah lĕ ngŏ bohtâo bĭ gan hmâo kơnah, ñu čă đĭ tăñ yua kơnah nŭn đêl. 6Tơl yang r̂ơi biă, ñu gliw kr̂o hĕ yua akha ñu bĭ khlăm. 7Bơjeh pơanah dŏng lĕ tăm pôm jr̂ơi, nŭn jr̂ơi čă đĭ djañ lôi klĕp dai nŭn. 8Bơjeh pơanah dŏng lĕ ngŏ kơnah hiam, bơboh r̂ai hmâo dong pơanah ha tuh săl, dong pơanah dŏng năm pluh săl, dong pơanah dŏng hmâo klâo pluh săl. 9Lơi hmâo amăng ngai, br̂ơi hmĭ wŏ!»
Bŭt nă plơi lan kơpĭl
(Mak 4:10-12; Lŭk 8:9-10)
10Nŭn môt hyĕn tui nao kơña Yêsu, gơñu laĭ: «Yua yĕt ih yua klơi pơyap pah ih pơhiăp nao pơ môt gơñu?» 11Ñu hiăp til glaĭ: «Yua Ơi Adai bĭ br̂ơi môt gơñu thâo kr̂ăn klơi hơ-et mơ̆ng klơi Ơi Adai wai-lăng ôh, ñu pha br̂ơi gô-ih đơč thâo kr̂ăn.#An Mat 11:25; 16:17; 19:11. 12Yua lơi hmâo boih, Ơi Adai ti br̂ơi thim dŏng, nŭn ñu ti hmâo lơbeh-lơbai. Lơi pô bĭ hmâo, wŏt nŏ yĕt ñu hmâo, nŭn Ơi Adai ti tô̆ glaĭ mơ̆n.#An Mat 25:29; Lŭk 8:18. 13Yua nĭng ne yơh kâo mơ̆ng hiăp nao pơ gơñu yua klơi pơyap, yua gơñu ep boih, gơñu bĭ ƀôh, gơñu kơmŏng boih, gơñu bĭ hmĭ, dăp bĭ hông le.#An Êsê 12:2; 2Kô 4:4. 14Klơi Êsai r̂ă čr̂oh hlâo, nŭn bơjr̂ŏng lôi mơ̆ng gơñu nŭn yơh, ñu laĭ:
“Gô-ih ti hmĭ dơdi, plai bĭ hông ôh
Wŏt gô-ih ti ƀôh jel mơ̆n, plai bĭ thâo le.
15Yua bŭt nă plơi lan ne kơpĭl boih
Amăng ngai gơñu kơpal kơnap hmĭ
Săl ta gơñu djĕp lôi
Huĭ săl ta gơñu ƀôh
Amăng ngai gơñu hmĭ
Bŭt gơñu hông jr̂ŏng nŭn gơñu wŏt glaĭ
Huĭ kâo ngă pơhuai br̂ơi gơñu huai.”#Klơi ne tô̆ mơ̆ng Êsai 6:9-10.
16«Plai gô-ih dŏng, nŭk-nua yơh, yua săl ta gô-ih thâo ƀôh, amăng ngai gô-ih thâo hmĭ. 17Kâo r̂ă br̂ơi gô-ih dơdi laĭ, mơ̆ng đim hmâo mơnuih ba pơhiăp Ơi Adai dăp mơnuih kơpă lô mơ̆n čiăng ƀôh buă gô-ih ƀôh ne,#An 1Pê 1:10-12. plai gơñu bĭ ƀôh ôh, gơñu čiăng hmĭ klơi gô-ih hmĭ ne, plai gơñu bĭ hmĭ le.»
Yêsu bơblang mơ̆ng klơi pơyap pô jai bơjeh
(Mak 4:13-20; Lŭk 8:11-15)
18«Nĭng nŭn yơh, br̂ơi gô-ih hmĭ klơi pơyap mơ̆ng pô jai bơjeh nŭn wŏ. 19Jơ̆ hmâo mơnuih hmĭ klơi pơhiăp mơ̆ng klơi Ơi Adai wai-lăng, ñu bĭ hông, nŭn hla ti bơjeh a jai r̂ok glan, yang set r̂ai mă tô̆ boh pơhiăp a jai tăm bŭt ñu. 20Bơjeh a jai ngŏ bohtâo, nŭn hla ti mơnuih hmĭ klơi pơhiăp Ơi Adai, ñu mă tô̆ tăñ dăp mơ-ak. 21Plai tăm bŭt ñu bĭ hmâo akha ôh, ñu ĕñ ha ƀiă đơč. Tơl hmâo klơi kơnap-tap, r̂ăng bơjăm bơjuă ngă set yua mơ̆ng klơi pơhiăp Ơi Adai, nŭn bŭt ñu ƀlaih tăñ he boih. 22Bơjeh a jai tăm pôm jr̂ơi, ne hla ti mơnuih hmĭ klơi pơhiăp Ơi Adai, nŭn bŭt ñu hyŏk mơ̆ng klơi hơdĭp,#An Mat 6:25. dăp dr̂ăm-gơnăm plui ñu,#An 1Tim 6:9-10. bih klơi ne djañ lôi klơi pơhiăp, ngă br̂ơi ñu bĭ thâo bơboh ôh. 23Bơjeh a jai tăm kơnah hiam, ne hla ti mơnuih hmĭ klơi pơhiăp dăp hông, nŭn ñu bơboh r̂ai,#An Yôh 15:5, 16. dong pơanah hmâo ha tuh săl, dong pơanah dŏng năm pluh săl, dong pơanah dŏng klâo pluh săl.»
Klơi pơyap mơ̆ng dai mr̂ă čă hr̂ŏm dai sali
24Yêsu pơto br̂ơi gơñu mơ̆ng klơi pơyap ha tô̆ dŏng, ñu laĭ: «Klơi Ơi Adai wai-lăng hla ti đahkơi ha r̂ăng nao jai bơjeh hiam tăm hua ñu. 25Tơl môt ngă buă ñu pĕt, nŭn ayăt ñu mŭt r̂ai jai dai mr̂ă tăm hua dai sali nŭn, jr̂ŏng nŭn ñu biă đuĕ. 26Tơl dai sali čă đĭ dăp dr̂oh, nŭn r̂ăng ƀôh dai mr̂ă čă đĭ mơ̆n. 27Nŭn môt hlŭn nao r̂ă thâo pô sang laĭ: “Ơ khua! Hiư̆m, ih jai ha tô̆ dai hiam đơč la, tăm hua ih? Yĕt hmâo dai mr̂ă dŏng?” 28Ñu til glaĭ: “Ayăt yơh ngă nĭng nŭn.” Nŭn môt hlŭn kơña ñu: “Jơ̆ nĭng nŭn, ih br̂ơi mơ̆n, mơi nao bŭč pơƀô̆ lôi dai mr̂ă nŭn?” 29Ñu til glaĭ: “Anăm bŭč ôh! Jơ̆ bŭč pơƀô̆ lôi dai mr̂ă, huĭ djơ̆ hr̂ŏm dai sali mơ̆n. 30Čr̂oh br̂ơi ñu čă đĭ glong hr̂ŏm dai sali ƀơĭ. Tơl yan a yuă, kâo ti r̂ă br̂ơi môt yuă bŭč pơƀô̆ lôi dai mr̂ă hlâo, nŭn kă lôi ha kơnă ha kơnă, čuh lôi. Plai dai sali, ba pơƀô̆ čr̂oh tăm tông kâo.”»#An Mat 3:12.
Klơi pơyap mơ̆ng bơjeh djĕ
(Mak 4:30-32; Lŭk 13:18-19)
31Yêsu pơhiăp nao pơ gơñu klơi pơyap ha r̂oh dŏng, ñu laĭ: «Klơi Ơi Adai wai-lăng hla ti săl bơjeh djĕ, mơnuih ha r̂ăng djă nao jai tăm hua ñu. 32Săl bơjeh ne anĕt hloh mơ̆ng bơjeh pơkŏn-pơkŏn, tơl ñu čă đĭ ñu dŭt hloh mơ̆ng djăm-pơtăm pơkŏn, ñu dŭt đĭ jr̂ŏng phŭn kơyâo, nŭn čĭm pŏl ngŏ adai r̂ai ngă hôh mơ̆ng than ñu.»#An Êsê 17:22-23.
Klơi pơyap mơ̆ng pơi nŭmpăng
(Lŭk 13:20-21)
33Yêsu pơhiăp nao pơ gơñu klơi pơyap ha r̂oh dŏng, ñu laĭ: «Klơi Ơi Adai wai-lăng hla ti pơi a ngă nŭmpăng. Hmâo đahmơi ha r̂ăng mă tô̆ pơi nŭn ha sĕt nao lŭk hr̂ŏm pŭng klâo i,#13:33 Pŭng klâo i hmâo 20 kilô beh, a ngă nŭmpăng klăp tôm mơnuih 100 r̂ăng ƀŏng. ngă br̂ơi bih pŭng nŭn blêh đĭ.»
Yêsu yua klơi pơyap
(Mak 4:33-34)
34Gr̂ư̆ klơi Yêsu pơhiăp hr̂ŏm mơnuih bơlô ne, ñu hiăp mơ̆ng klơi pơyap đơč, ñu bĭ hiăp klơi yĕt hr̂ŏm gơñu ôh, lơñao mơ̆ng klơi hiăp pơyap. 35Buă ne čiăng bơjr̂ŏng lôi klơi pô ba pơhiăp Ơi Adai r̂ă čr̂oh hlâo laĭ:
«Kâo ti ha bah pơhiăp mơ̆ng klơi pơyap
Kâo ti r̂ă r̂oi klơi a bơdŏp lôi tô̆ mơ̆ng phŭn Ơi Adai bơjr̂ŏng lŏn kơnah.»#Klơi ne tô̆ mơ̆ng Doh 78:2.
Yêsu bơblang klơi pơyap dai mr̂ă
36Jr̂ŏng nŭn Yêsu biă mơ̆ng mơnuih bơlô, nŭn ñu mŭt nao tăm sang. Môt hyĕn tui Yêsu r̂ai pơ ñu pơhiăp laĭ: «Bơblang br̂ơi mơi he wŏ klơi hiăp pơyap mơ̆ng dai mr̂ă tăm hua nŭn.» 37Yêsu hiăp til glaĭ: «Pô jai bơjeh hiam nŭn, hiăp mơ̆ng kâo Nă Mơnuih. 38Hua nŭn lŏn kơnah, bơjeh hiam nŭn nă Ơi Adai wai-lăng, dai mr̂ă nŭn nă yang set. 39Ayăt jai dai mr̂ă nŭn khua yang set, yan a yuă nŭn r̂ơi nôk nŭč dơdơi,#An Pơƀôh 14:15. môt yuă nŭn ling-jang Ơi Adai. 40Hla ti r̂ăng pơƀô̆ dai mr̂ă, čuh lôi tăm phui, mơ̆ng r̂ơi nôk nŭč dơdơi a ti ngă ha luaĭ nŭn mơ̆n. 41Kâo Nă Mơnuih ti pơđơi môt ling-jang kâo,#An Mat 24:31. nŭn gơñu ti pơƀô̆ lôi bih mơnuih ba r̂ăng ngă glaĭ, wŏt bih mơnuih bĭ ngă tui klơi juăt Ơi Adai, bơbiă lôi gơñu mơ̆ng klơi kâo wai-lăng. 42Môt ling-jang ti glŏm nao gơñu tăm phui, pơ anŭn ti hmâo klơi čŏk hia dăp kĕ gơi. 43Pah anŭn mơnuih kơpă ti đaih hla ti yang r̂ơi, gơñu ti dŏ mơ̆ng klơi Ơi Adai Ma gơñu wai-lăng.#An Đan 12:3. Lơi hmâo amăng ngai, br̂ơi hmĭ wŏ!»
Klơi pơyap klâo r̂oh
44«Ha tô̆ dŏng klơi Ơi Adai wai-lăng, hla ti dr̂ăm a gĭt a bơdŏp lôi tăm hua. Hmâo mơnuih ha r̂ăng ƀôh jr̂ŏng nŭn ñu bơdŏp glaĭ, nŭn ñu wŏt glaĭ bŭt ñu mơ-ak, ñu mă ƀuo lôi bih dr̂ăm-gơnăm ñu hmâo,#An Phi 3:7-8. nao blơi tô̆ hua nŭn.
45«Ha tô̆ dŏng klơi Ơi Adai wai-lăng hla ti mơnuih ƀuo bơdr̂o ha r̂ăng, ñu yô sem keo hiam-hiam. 46Tơl ñu ƀôh keo ha săl hmâo kha dr̂ă jat, ñu wŏt glaĭ mă ƀuo lôi bih dr̂ăm-gơnăm ñu hmâo, nao blơi tô̆ keo nŭn.
47«Ha tô̆ dŏng klơi Ơi Adai wai-lăng hla ti jal r̂ăng tr̂ah tăm ia gơnao djơ̆ kan gr̂ư̆ neo.#An Mat 22:10. 48Tơl kan bŏ jal boih, nŭn r̂ăng dui đĭ jal ngŏ čĭ, gơñu dŏ ben r̂ih tô̆ kan hiam čr̂oh tăm bŭng, plai kan set gơñu glŏm lôi. 49R̂ơi nôk nŭč dơdơi, hla ti nŭn mơ̆n. Môt ling-jang Ơi Adai ti r̂ai pơklah pơpha mơnuih set đuĕ mơ̆ng mơnuih kơpă,#An Mat 25:32. 50jr̂ŏng nŭn gơñu ti glŏm lôi mơnuih set tăm phui, pơ anŭn ti hmâo klơi čŏk hia dăp kĕ gơi.»
Dr̂ăm phr̂âo hr̂ŏm dr̂ăm hađăp
51«Hiư̆m pă, gô-ih hông mơ̆n klơi ne?» Gơñu til glaĭ: «Ơ, hông mơ̆n!» 52Yêsu hiăp nao pơ gơñu dŏng, ñu laĭ: «Nĭng nŭn yơh, gr̂ư̆ gru pơto klơi juăt Môsê, tơl gơñu hyĕn tui klơi Ơi Adai wai-lăng boih, nŭn gơñu hla ti pô sang mă biă dr̂ăm-gơnăm ñu mơ̆ng sang, dăp phr̂âo dăp hađăp he mơ̆n.» 53Tơl Yêsu pơhiăp klơi pơyap hla ne jr̂ŏng boih, nŭn ñu biă đuĕ mơ̆ng anŭn.
Plơi Nasaret git ngư̆ Yêsu
(Mak 6:1-6; Lŭk 4:16-30)
54Tơl ñu glaĭ pơ plơi mĭ ma ñu,#13:54 Plơi mĭ ma ñu a iâo plơi Nasaret. An Mat 2:23 . nŭn ñu pơto br̂ơi nă plơi lan tăm sang luôm, ngă br̂ơi nă plơi lan hr̂ŭk-hr̂ăk tăm bŭt, gơñu kơña laĭ: «Hiư̆m pă mơnuih ne, ñu tô̆ klơi lơgơi dăp klơi kơtang myang ne r̂ai mơ̆ng pă? 55Hiư̆m, ñu bĭ djơ̆ nă pô čieng kơyâo ôh? Hiư̆m, mĭ ñu bĭ djơ̆ a iâo Mari ôh? Hiư̆m, bĭ djơ̆ ôh, dơi ñu Yakô̆p, Yôsep, Simôn, dăp Yuđah? 56Hiư̆m, bih dơi đahmơi ñu, bĭ djơ̆ dŏ hr̂ŏm ta ôh? Jơ̆ nĭng nŭn, ñu tô̆ klơi ne r̂ai mơ̆ng pă?» 57Nŭn gơñu bĭ ngư̆ Yêsu ôh. Plai Yêsu pơhiăp nao pơ gơñu: «Pô ba pơhiăp Ơi Adai, r̂ăng pơpô̆ bơyom ñu gr̂ư̆ plơi, ha tô̆ plơi ñu pô dăp khŭl-khap ñu pô bĭ pơpô̆ bơyom ñu ôh.» 58Yêsu bĭ ngă lô buă myang mơsêh ha anŭn ôh, yua gơñu bĭ ngư̆.
Currently Selected:
Mathiơ 13: JKB
Highlight
Copy
Compare
Share
Want to have your highlights saved across all your devices? Sign up or sign in
© 2024, Wycliffe Bible Translators, Inc.