Mathiơ 12
12
Yêsu khua r̂ơi Saƀat
(Mak 2:23-28; Lŭk 6:1-5)
1Pah anŭn Yêsu bat găn hua dai mơ̆ng r̂ơi Saƀat (r̂ơi môt sô̆n-sat Israel bơdơi), nŭn môt hyĕn tui Yêsu gơñu lơpa, gơñu mă r̂oč dai#An Juăt 23:25. mơ̆ng dong lơpao ƀŏng. 2Tơl môt Pharasi ƀôh, gơñu laĭ nao pơ Yêsu: «Ep môt hyĕn tui ih wŏ, yua buă gơñu ngă ne, glaĭ mơ̆ng klơi juăt Môsê khă bĭ br̂ơi ngă mơ̆ng r̂ơi Saƀat!»#An Biă 20:9-11. 3Yêsu til glaĭ: «Hiư̆m, gô-ih bĭ čăm ôh? Klơi gô-ih juăt an mơ̆ng buă pơtao Đawit ngă, dăp mơnuih bat hr̂ŏm ñu, pah gơñu lơpa?#An 1Săm 21:1-6. 4Ñu mŭt tăm sang yang Ơi Adai, nŭn gơñu ƀŏng nŭmpăng a pơyŏl Ơi Adai. Tui klơi juăt Môsê, pơtao Đawit bĭ hmâo sĭt ƀŏng nŭmpăng nŭn ôh, wŏt môt bat hr̂ŏm ñu bĭ hmâo sĭt ƀŏng le. Nŭmpăng nŭn môt ngă yang đơč hmâo sĭt ƀŏng.#An Lêwi 24:5-9. 5Hiư̆m, gô-ih bĭ čăm ôh? Klơi gô-ih juăt an mơ̆ng môt ngă yang, gơñu mă buă tăm sang yang mơ̆ng r̂ơi Saƀat,#An Yap 28:9-10; Yôh 7:22-23. plai klơi juăt Môsê bĭ yap gơñu ngă glaĭ ôh, wŏt gơñu ngă buă mơ̆ng r̂ơi Saƀat ơ mơ̆n. 6Kâo r̂ă br̂ơi gô-ih, ha ane hmâo ha r̂ăng gơnĭt hloh mơ̆ng sang yang dŏng. 7Ơi Adai laĭ: “Kâo čiăng gô-ih thâo pap-dr̂ap r̂ăng, kâo bĭ čiăng dr̂ăm ngă yang ôh.”#Klơi ne tô̆ mơ̆ng Hôsê 6:6. An Mat 9:13 mơ̆n. Jơ̆ gô-ih thâo hông klơi nŭn, gô-ih bĭ čr̂âo mơnuih kơpă laĭ ngă glaĭ ôh. 8Kâo laĭ ne, yua kâo Nă Mơnuih, khua mơ̆ng r̂ơi Saƀat yơh.»
Yêsu ngă pơhuai mơnuih jo ngan
(Mak 3:1-6; Lŭk 6:6-11)
9Jr̂ŏng nŭn Yêsu biă đuĕ mơ̆ng anŭn, ñu mŭt nao tăm sang luôm. 10Pah anŭn hmâo đahkơi jo ngan ha gah dŏ ha anŭn, nŭn r̂ăng kơña Yêsu: «Hiư̆m, klơi juăt Môsê br̂ơi mơ̆n, a pơhuai br̂ơi mơnuih mơ̆ng r̂ơi Saƀat?» Gơñu kơña hla nŭn čiăng sem klơi glaĭ Yêsu. 11Yêsu pơhiăp nao pơ gơñu: «Tăm môt gô-ih, pha laĭ ha r̂ăng hmâo triw ha dr̂ơi lĕ tăm luh mơ̆ng r̂ơi Saƀat, hiư̆m, ñu bĭ nao dui đĭ triw ñu mơ̆ng luh ôh? 12Plai mơnuih dŏng hmâo kha jat, dr̂ă hloh mơ̆ng triw ha dr̂ơi!#An Mat 6:26. Jơ̆ nĭng nŭn, klơi juăt Môsê br̂ơi mơ̆n ngă klơi hiam mơ̆ng r̂ơi Saƀat.» 13Jr̂ŏng nŭn Yêsu pơhiăp hr̂ŏm đahkơi jo ngan nŭn, ñu laĭ: «Ngă pôkpă ngan ih wŏ!» Nŭn ñu ngă pôkpă ngan, ngan ñu huai glaĭ hiam hla ti ngan ñu ha gah dŏng.
14Jr̂ŏng nŭn môt Pharasi biă nao bơgĭt gŏp gơñu, sem kơđi čiăng pơdjai lôi Yêsu. 15Tơl Yêsu thâo klơi nŭn, ñu biă đuĕ mơ̆ng anŭn. Hmâo mơnuih lô bat tui ñu, nŭn ñu ngă pơhuai gr̂ư̆ mơnuih wă-nuă br̂ơi huai soh-sel. 16Nŭn Yêsu khă bĭ br̂ơi gơñu r̂ă br̂ơi r̂ăng thâo mơ̆ng ñu ôh. 17Buă ne čiăng bơjr̂ŏng lôi klơi pơhiăp Êsai pô ba pơhiăp Ơi Adai, ñu r̂ă čr̂oh hlâo mơ̆ng Yang Krih hla ne:
18«Ep wŏ, pô ne yơh kâo r̂ih čiăng ñu mă buă br̂ơi kâo
Kâo pơ-eng-leng ñu, kâo bŏ bŭt mơ̆ng ñu jat#An Mat 3:17.
Kâo ti br̂ơi Yang Bơngăt kâo dŏ hr̂ŏm ñu
Nŭn ñu ti r̂ă r̂oi br̂ơi môt sô̆n-sat pơkŏn čiăng gơñu thâo laĭ kâo ti tr̂ĕ kơđi kơpă-hnŏng.
19Ñu bĭ bơjah glaĭ, wŏt bĭ ôl kr̂aih le
Bĭ hmâo lơi hmĭ ñi ñu hiăp r̂ok glan ôh.
20Tr̂ang joh, ñu bĭ wŏk pơtĕ lôi ôh
Phui ti bơdăm, ñu bĭ bluh lôi le
Khă tơl ñu ba r̂ai klơi tr̂ĕ kơđi kơpă-hnŏng br̂ơi jai.
21Mơ̆ng ƀŏ ñu, môt sô̆n-sat pơkŏn ti čang ing.»#Klơi ne tô̆ mơ̆ng Êsai 42:1-4.
Anăm pơmat Yang Bơngăt Hiam ôh
(Mak 3:20-30; Lŭk 11:14-23)
22Jr̂ŏng nŭn hmâo đahkơi ha r̂ăng yang set ngă, ñu bôm ta he kơmlo he, r̂ăng ba r̂ai ñu pơ Yêsu. Nŭn Yêsu ngă pơhuai br̂ơi đahkơi nŭn thâo hiăp dăp thâo ƀôh glaĭ he mơ̆n. 23Bih nă plơi lan hr̂ŭk-hr̂ăk dăp pơhiăp laĭ: «Mơnuih ne nă čo pơtao Đawit#An Mat 9:27. ta dŏ yong, nŭn mă?» 24Tơl môt Pharasi hmĭ klơi nŭn, gơñu laĭ: «Mơnuih ne pơpŏl đuĕ yang set yua mơ̆ng Ƀêlsêƀul, khua yang set đơč.»#An Mat 9:34; 10:25. 25Yêsu thâo kr̂ăn klơi gơñu khư̆t tăm bŭt,#An Mat 9:4. nŭn ñu pơhiăp nao pơ gơñu, ñu laĭ: «Jơ̆ deh čal ha boh gơñu pơklah gŏp gơñu pô, nŭn ti r̂ăm yơh. Wŏt plơi pă sang pă pơklah gŏp gơñu pô, nŭn bĭ dŏ gơjăp le. 26Jơ̆ yang set Satan pơpŏl đuĕ yang set Satan, nŭn ñu pơklah gŏp ñu pô boih. Jơ̆ nĭng nŭn, hiư̆m pă ñu ti ngă, deh čal ñu mơ̆ng dŏ gơjăp? 27Pha laĭ kâo pơpŏl đuĕ yang set yua mơ̆ng Ƀêlsêƀul, ƀôh nă čo gô-ih dŏng, gơñu pơpŏl đuĕ yang set yua mơ̆ng Ƀêlsêƀul mơ̆n ah? Jơ̆ nĭng nŭn, nă čo gô-ih ti laĭ gô-ih hiăp bĭ djơ̆ ôh. 28Pha laĭ kâo pơpŏl đuĕ yang set yua mơ̆ng Yang Bơngăt Ơi Adai, nŭn čiăng laĭ klơi Ơi Adai wai-lăng tơl r̂ai pơ gô-ih boih. 29Ngă hiư̆m pă r̂ăng mơ̆ng anăm mŭt nao tăm sang mơnuih kơtang, čiăng pŭn tô̆ dr̂ăm-gơnăm mơnuih kơtang nŭn? Hmâo ha tô̆ mă čă lôi mơnuih kơtang hlâo ƀơĭ, nŭn ti thâo pŭn tô̆ bih dr̂ăm-gơnăm mơ̆ng sang ñu. 30Lơi bĭ dŏ hr̂ŏm kâo, ñu nŭn bơgăng glaĭ hr̂ŏm kâo.#An Mak 9:40. Lơi bĭ r̂ai pơƀô̆ hr̂ŏm kâo, ñu nŭn yơh ngă čah-čač lôi. 31Nĭng nŭn yơh, kâo r̂ă br̂ơi gô-ih, Ơi Adai ti klaih lôi gr̂ư̆ klơi glaĭ mơnuih ngă, wŏt klơi gơñu hiăp pơmat mơ̆n. Plai mơnuih hiăp pơmat Yang Bơngăt Hiam, nŭn Ơi Adai bĭ klaih lôi ôh. 32Lơi hiăp pơtah mơ̆ng kâo Nă Mơnuih, Ơi Adai ti klaih br̂ơi ñu. Lơi hiăp pơtah mơ̆ng Yang Bơngăt Hiam, nŭn Ơi Adai bĭ klaih lôi ôh, wŏt mơ̆ng nôk ne tr̂uh pơ nôk dơdơi ơ mơ̆n.»
Phŭn kơyâo hr̂ŏm boh ñu
(Lŭk 6:43-45)
33«Jơ̆ phŭn kơyâo hiam, boh ñu hiam mơ̆n, jơ̆ phŭn kơyâo set, boh ñu set mơ̆n. Yua r̂ăng thâo kr̂ăn phŭn kơyâo r̂ai mơ̆ng boh ñu.#An Mat 7:16-20. 34Ơ môt phung alua, gô-ih mơnuih set, ngă hiư̆m pă gô-ih mơ̆ng thâo hiăp hiam? Yua tăm bŭt bŏ blai nŏ yĕt, nŏ nŭn yơh amăng bah pơhiăp biă r̂ai.#An Mat 15:18-19. 35Mơnuih hiam bơbiă r̂ai klơi hiam mơ̆ng nŏ yĕt hiam ñu r̂ăk čr̂oh tăm bŭt, mơnuih set bơbiă r̂ai klơi set mơ̆ng nŏ yĕt set ñu r̂ăk čr̂oh tăm bŭt mơ̆n. 36Kâo r̂ă br̂ơi gô-ih, jơ̆ mơnuih pơhiăp klơi yĕt tă-tăn, tơl r̂ơi tr̂ĕ kơđi ñu ti r̂oi glaĭ bih klơi nŭn. 37Yua Ơi Adai ti yap ih kơpă, r̂ai mơ̆ng klơi ih pơhiăp, wŏt ñu ti yap ih wĕ-wŏ, r̂ai mơ̆ng klơi ih pơhiăp mơ̆n.»
R̂ăng čiăng ƀôh klơi myang
(Mak 8:11-12; Lŭk 11:29-32)
38Pah anŭn môt gru pơto klơi juăt Môsê hr̂ŏm môt Pharasi pơanah, gơñu kơña Yêsu: «Ơ gru, mơi čiăng ƀôh klơi myang ih ngă, nŭn mơi mơ̆ng thâo ih r̂ai mơ̆ng Ơi Adai.»#An Mat 16:1; 1Kô 1:22. 39Yêsu til glaĭ pơ gơñu: «Nôk mơnuih ne set dăp bĭ kơpă hr̂ŏm Ơi Adai, gơñu hla ti bơnai ngă kao kŏ kơi. Gơñu sem čiăng ƀôh klơi myang, plai Ơi Adai bĭ pha br̂ơi gơñu ƀôh ôh, gơñu ti ƀôh ha tô̆ klơi myang Ơi Adai ngă mơ̆ng Yônah, pô ba pơhiăp Ơi Adai.#An Mat 16:4. 40Yua Yônah dŏ tăm čian kan dŭt, klâo r̂ơi klâo mlăm,#An Yôn 2:1. kâo Nă Mơnuih ti dŏ tăm kơnah klâo r̂ơi klâo mlăm hla ti nŭn mơ̆n.#An Mat 16:21. 41Tơl r̂ơi tr̂ĕ kơđi, nă plơi lan Niniwê ti gŭ đĭ hr̂ŏm mơnuih nôk ne, gơñu ti phong kơđi gô-ih, yua gơñu pơlih bŭt-tai pah gơñu hmĭ klơi Yônah r̂ă r̂oi.#An Yôn 3:5. Ep wŏ, nêne hmâo ha r̂ăng pr̂ŏng hloh mơ̆ng Yônah dŏng. 42Tơl r̂ơi tr̂ĕ kơđi, pơtao đahmơi mơ̆ng čal ping gah nuă#12:42 Ping gah bơgăn nŭn pơanah laĭ «Ping gah dil» pơanah dŏng laĭ «Ping gah nuă.» Khme laĭ “ខាងត្បូង.” ti gŭ đĭ phong kơđi mơnuih nôk ne, yua ñu r̂ai mơ̆ng ƀon nŭč lŏn kơnah čiăng hmĭ klơi lơgơi pơtao Salômôn.#An 1Pơtao 10:1-10. Ep wŏ, nêne hmâo ha r̂ăng pr̂ŏng hloh mơ̆ng pơtao Salômôn dŏng.»
Yang set wŏt glaĭ
(Lŭk 11:24-26)
43«Tơl yang set biă đuĕ mơ̆ng mơnuih ha r̂ăng boih, nŭn ñu mŭt tăm ƀon thu yô sem ƀon čiăng bơdơi, plai sem bĭ ƀôh ôh. 44Pah anŭn ñu laĭ: “Kâo ti wŏt glaĭ pơ sang kâo phr̂âo biă đuĕ ahlâo.” Pah ñu tơl glaĭ, ñu ƀôh sang nŭn dŏ lơngăn, pih kŏl lôi, dăp pr̂ăp met lơdjĕt. 45Nŭn ñu yô jak yang set juh r̂ăng pơkŏn set hloh mơ̆ng ñu dŏng, mŭt nao tăm sang nŭn, ngă br̂ơi mơnuih nŭn kơnap-tap hloh mơ̆ng ahlâo dŏng.#An 2Pê 2:20. Mơnuih set mơ̆ng nôk ne hla ti nŭn mơ̆n.»
Mĭ Yêsu hr̂ŏm yŏng dơi Yêsu
(Mak 3:31-35; Lŭk 8:19-21)
46Pah Yêsu dŏ pơhiăp nao pơ mơnuih lô, nŭn mĭ Yêsu dăp môt adơi ñu#An Mat 13:55; Buă 1:14. dŏ dŏng gah ia-wang čiăng pơhiăp hr̂ŏm ñu. 47Hmâo ha r̂ăng r̂ă br̂ơi Yêsu: «Ep wŏ, mĭ ih dăp môt adơi ih dŏ dŏng gah ia-wang čiăng pơhiăp hr̂ŏm ih.» 48Plai Yêsu hiăp til glaĭ hr̂ŏm pô nŭn: «Lơi mĭ kâo? Lơi yŏng dơi kâo?» 49Nŭn Yêsu čr̂âo nao pơ môt hyĕn tui ñu, jr̂ŏng nŭn ñu laĭ: «Môt ne yơh mĭ kâo, yŏng dơi kâo. 50Lơi ngă tui bŭt-tai Ma kâo dŏ mơ̆ng adai dih,#An Mat 6:10; 7:21. pô nŭn yơh yŏng dơi mai dơi kâo, dăp mĭ kâo he mơ̆n.»
© 2024, Wycliffe Bible Translators, Inc.