2~KORINTHU 3
3
Dang: Theing Thang" cab Aseig Mo Deizoo: Yi
1Hidsu" ein: tid zigi ngoonu" da" khyoo: ri ngoonu" nyang: phau: khuang tid zi nghoid la". Byu dayham" bang: yhang: ti"- ngoonu" gi ngoonu" da" khyoo: bo pang" thoug byid: da" mougsoug"- nanu" ri byid: ca" shi" la". Houg su" anghoid lang" gi nanu" jang" mo bo pang" thoug da" mougsoug" ri mho' voin ca" shi" la". 2Nanu" nya: gung nyang: byu hang" we' nghab yu" lho" si wa shid mo ngoonu" da" e" myed nheigloem: khoug: moo lhid" to" da" lhid" cab, nyang: nghoid boem bye. 3Hau: lhid" cab ri Khristu nyang: nyang lhid" lho: ngoonu" ri foin: kaid zigi bang bang nyang nghoid nyid. Hau: moug soig" ri mhug yeung yo' alhid" loo: za: Dei nyid da" Mangso Venyi yo' hau: lug yho' joem moo anghoid loo: za: Xangsu: byu yi da" nheigloem: emyid khoug: moo lhid" yoin" to.
4Ngoonu" hidsu" ein: tid zigi Ngoonu" gi Khristu yoomo Mangsoo jang" mo nheig shid: nheig deug da" khyoo: yo" yu boem yoomo nghoid nyid. 5Ngoonu" gi he: da" moo" ri yo" zei: ein: yo" tid wa ngoonu" moo ce" yoem: so' we' abo boem› Ngoonu" yo" yu da" yoem: so' gi Mangso jang" mo za: nghoid nyid. 6Ngoonu" gi dang: theung thang" cab, da" shid re" moozoo" yo" voin vu, boem baja"- ngoonu" ri yoem: vhoo" byid: su: gi hau: aseig: nyang: nghoid nyid hau: dang: theung da" thang" cab aseig gi lhid" to" da" mougsoug" moo bo zi anghoid loo za: Venyi jang" mo nghoid nyid. Khasumvimgari lhid" cab, yo' lhid" to" da" tarha" gi kangso ri said pyam nyid lho: Hau: Venyi koem gi kangso' ri dei loo nhang: nyid.
7Lug yho' moo lhid" to" da" tarha" ri byid: da" uri Mangso da" myonhoo: phung" yoeb doug bang thu lo nyid. Hau: myonhoo: phung" yoeb da" bang yi lo zigi Moshe da" myonhoo: mo zo" re" bei: lo" byug bye. Nghoid loug we' gye" dabang nyid shi" yoomo Israela byumyu" yi gi nya: myonhoo: ri ayo" yu" nghoid ago" da:- shid gyoin, noogyoin, ri bue' loo nhang: da" tarha" gi haug: yhang":" te" doug bang da" myonhoo: phung" yoeb yo" dabyid: nghoid rigi 8Hau: Venyi wigi moo" zei: lhu: nhau" kaid da" myonhoo: phung" yoeb je" sen: da khyoo: gi je" wigi doug bang da" khyoo: zeing anghoid wa la". 9Youg: noo yoobo da" dam kaid wa shi re" dang: phyed byid: ziyo' sen: da" moozoo" gi myonhoo: phung" yoeb yo' byeung" shoin: jo, nghoid rigi Khyoid yu khyoo: yo' sen: da" moozoo" gi khayhi' gyeung" myonhoo: phung" yoeb je doug bang jo, wa lha". 10Akhid" je" wigi doug bang jo, da" myonhoo: phung" yoeb yoomo shid' phyang" dalheung:- gye" doug bang: lo yu" bye: da- myonhoo: phung" yoeb gi bei: loo" bye: ein: ngoonu" tid ca" bye. 11Daso" za: te" geung: jo, se' da" moozoo" lang" gi myonhoo: phung" yoeb bo nyid zi nghoid rigi dageung: jo, da" moozoo" moo gi khayhi' gyeing" je" wigi myonhoo: phung" yoeb bojo, wa anghoid la".
12Ngoonu" gi houg: yhang: te" da" nheig byu joyoo yo" boem yoomo ngoonu" yoem: zug nyid boem. Myonhoo: mo phung" yoeb bei: lo" byug bye: ziri Israela byu yi amyang boem baja" ga: nya: myonhoo: ri myonhoo: nghoeb, yo' nghoeb ci: da. 13Ngoonu" gi Moshe yhang: ti" anghoid- nyang: gi nya: myonhoo: mo phung" yoeb bei: lo" byug bye: ziri Israela byu yi amyang boem baja" ga: nya: myonhoo: ri myo, nghoeb, za: pain" yo' nghoeb ci: da. 14Israela byumyu" yi da" nheugloem: joem gi gyeung" nyang: myhed" nghoeb to" boem ago". Akhid" nyid" ju" sho' lang" gi dang: theung mougsoug" xoug" ri nghab khang" moo" nyangnu" da" nheigloem: ung: khoug: joem moo hau: da" myo, nghoeb za: pain" yo, danghoeb to" shi" ago". Byu dayug gi Khristu moo kangso' dei loo" lang" she-hau: myo, nghoeb ri dayo" she' pyam. 15Akhid" ju" sho' lang" nyangnu" gi Moshe da" tarha" ri nghab khang" moo" hau: da" myo, nghoeb gi nyangnu" da" myidsoin: khyoo: moo da nghoeb to" nyid shi" ago". 16Nghoid loug we hau: Aseing: shoid khyoo: nyang: phoug loo lang" gi hau: myo, nghoeb za: pain" shed' pyam byid: zi shau nyid ga: wigi Moshe da" khyoo: lhid" to" yhang: ti" shed' pyam byid: zi shau. 17Akhid" ‹Aseing:› ein: zigi hau: Venyi ri tid nyid zi nghoid. Aseing: da" Venyi nyid joyoo moo loid byoin akhang" we' jo, jo, gu nghoid. 18Houg: yoomo ngoonu" dangain" bang: gi myonhoo: nghoeb ziri phang pyam boem bye:. Myonhoo: yo' hau: Aseing: da" myonhoo: phung" yoeb da" alhoo: ri doem tau" pang shug nyid boem bye. Hau: myonhoo: phung" yoeb nyang: Venyi ein: da" Aseing: jang" mo ju" re" wigi Aseing: yo' jeje du go" lo da" myonhoo: phung" yoeb shoid khyoo: ngoonu" ri thed, shai" loo" nhang: nyid.
Currently Selected:
2~KORINTHU 3: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.