2~KORINTHU 2
2
1Houg: yoomo nanu" ri nheig koug: nhang: zi abui" baja"-nanu" jhang khyoo: ngoo adoem ri" loo: wa ein: myid phyed pyam bye. 2Khasu" wim gari ngoo nanu" ri nheig ze" kung nhang: nghoid ri gi ngoori gau yi nhang" wa zi hang" se' nyid loo: wa ngoo nheig ze" kug byid: mo, za: deung nyid wa zi nghoid. 3Ngoo ri gau yi ngei pyoo: nhang: wa da" byu yi yoomo ngoo myid apyo: khyoo: abue" loo baja" - ngoo nanu" jhang khyoo: anau ri loo. houg: yoomo xang: shid" lheung: mo mougsoug" ri nanu" jhang: khyoo: ngoo lhid" kaid zi nghoid. cenoem vim gari Ngoo gau yi ngei pyo: ri nanu" dangain" mo, we' gau yi ngei pyoo: wa ziri ngoo myid loem. 4Ngoo gi shid: gyoin noogyoin,- nheig koug nheig shu: zi gye" shau" wigi-ngoug byid: myoo" sho' thu' zoore"- hau: mougsoug" ri lhid" kaid zi nghoid. Ngoo myid soin" khyoo: gi nanu"' ri nheung kug nhang: wa shid re" anghoid. Nanu" ri ngoo khayhi' jheddab nyid ziri si' nhang: noug yoomo lhid" kaid zi nghoid.
Shoid Su: Ri: Yooboo Byid: Da" Khyoo:
5Akhid" byu dayug yug gi ngoori nheig koug nhang: nghoid rigi ngoori za: anghoid- nanu" dangain" mo, ri nghoid loug we' dayham: ri nheig koug nhang: nyid. (Hau: youg da" atho' moo yooboo zeing ri afoin: noug yoomo ngoo he: khyoo: ri tid nyid zi nghoid) 6Nanu:" myoo: loo boug wigi yooboo foin: gyi koid zi shau: khyoo: gi hau: youg shid re" moin: yi" da" shid: gyoin" nghoid bye. 7Hau: yug gi gye" atho kham: zeung: da" kougshu: khyoo: moo anoeb lo" byug baja"- nyang: ri yooboo khyoid byid: lho: nheig teung ung: teung byid: ge'. 8Houg: su" nghoid yoomo nanu" gi nyang: ri gyeung" nyang: jheddab nyid da" khyoo:- nyang: se' loo sho' koid nyid wa shid re" ngoo nanu" ri mho' sang: kaid. 9Xang: shid" ri ngoo nanu" jhang khyoo: mougsoug" lhid" kaid da" khyoo: gi ca: leug yu" khyoo: nanu" khayhi' yo" kham zeung: da" khyoo: ri ngoo jhau" mho'- khyoo: shed' vho" she: khyoo: ri cang loo" wa shid mo khanham we' jen" jen" nghoid nyid gu nghoid boem la". ein: ziri si' wa shid mo lhid" kaid khyoo: nghoid. 10Nanu" gi byu dayug yug ri nyang: shoid vhang: d" yooboo khyoid pyam byid: nghoid rigi_ - ngoo we' bo khyoid pyam byid wa. Khasu" wim gari daja: ja: byid" yoomo byu dayug yug ri yooboo khyoid byid: ca: lo da" uri ngoo gi nanu" da" myonhoo: ri tu: lho: Khristu da" shid khoin" moo nya yooboo ri khyoid pyam byid: zi nghoid. 11Ngoo hidsu" koid da" khyoo: gi-satan gi nanu" tho' moo xang: shid" aoung: loo" baja"- phajhi" khyo" koid zi nghoid. Khasu" wim gari ri-zhandan gi phajhi" khyau" nyid ziri ngoonu" se' nyid boem zi nghoid.
Troa voogung Moo Polu Myid Myo: Khyoo:
12Khristu da" ngeibu: ludang: kho" kyoo" wa shid mo Troa voo moo ngoo ju" yhe: uri hau: joyoo moo moo" yo" zei: baja"- nga" shid re" Mangsoo gi khoem" phang byid to. 13Nghoid loug we' ngoonu" da" mang nhung" phoo - Titu yo' ngoo ashug" goo" yoomo ngoo atho' tid loo: sho' myid myoo ung: loug nyid. Houg: yoomo Houg: mo da" byu yi ri vho" too" kho' lho-Makedoni mung" khyoo: yhe" loo" bye.
Khristu Yoomo Oung: Doid Lo" Khyoo: Yo" Yu
14Nghoid loug we' Mangso jeju" gi gye" gyi: jo, da- Khasu" wim gari nyang: gi ngoonu" ri Khristu yo' dadeung: daloem: za: bui nhang: wigi Khristu da" oung: doid lo pui" moo oung: yain: lo" da" thung: byu yi yhang: ti"- Mangsoo gi ngoonu" ri shu" vho" shi: bye. Khristu se' lo da" lasi, laleug gi nam, pyo: da" shoem: yhang: ti"- joyoo khyi khang" moo myoo- byo loo" nhang: wa shid re" Mangsoo gi ngoonu" ri ci: yhoung" nyid bye. 15Khasu" wim gari ngoonu" gi Mangso jang" moo Khristu xoin" to' bye: da" nampyo: shoem: yo' du nyid boem bye. Hougsu" nampyo" da" shoem: gi khyoid yu zi shau" bye: mo, moo we' soem" joem: lo" zi shau" bang: jang moo we' byo sain" loo" bye. 16Hau: da" shoem: gi soem:" joem: loo" shau" mo, shid re" gi shid: loo" nhang: da" shid" gyoem: noo gyoem: bui: lo" lho: Khyoid yu zi shau" bye: bang: da" shid re" gi kangso' dei loo nhang: da" ngei pyo: da" shoem: nghoid nyid. Houg: yoomo houg: yhang: te" moozoo" ri voin wu, wa shid re" gi khayug moin: yi" nyid lha". 17Nyhang" gi byu gootu: myoo" sho' bang: yhang: ti"- Mangso da" mungdang: ri ce: phoug" adab da" phaga" zi yhang: ti"- oung" khyoo: qei khyoo: ngoonu" akoid boem. Nghoid loug we' ngoonu" gi Mangsoo nhang: kaid mo, nghoid wigi Khristu da" deizoo: yi khyo" wigi Mangso da" shidkhoin" moo hau: mungdang: ri deungmain" gyeung: shang: da" nheigloem: yo' kho" kyo" boem zi nghoid.
Currently Selected:
2~KORINTHU 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.