2~KORINTHU 4
4
Moozhoo" Vhoem: Joem Khoug: Mo Venyi Soidgain
1Mangsoo gi nya: nyeig khyeig shoo" go: da" nheigloem: yoomo ngoonu ri he: da: moozoo" voin wa moo" ab byid: bye: yoomo ngoonu" moo nheigloem: gyau: -yoem: shoin: wa khyoo: aboo. 2Nyhang" gi yhoem" too" zau" to"- nghoeb to" da" moozoo" asho, ashed" moo" dangain" ri ngoonu" jhoid she: pyam boem bye. Ngoonu: gi mhau' fain" khyo" akoid loo: za: Mangso da" mungdang: ri we' mhau' fain" vo- aphug alhoin" atid boem ngoonu" gi Mangso da" shid khoin" moo hau: deung main" da" khyo" bidbang moo kangso' yeug co: phyu: da" nheugloem: bo loo sho' zei: so' so" yen" boem. 3Ngoonu" kho" kyo" da" ngeibu: ludang: ri byu yi ato' se' gyo: nghoid rigi hau: Venyi moo soem" joem: loo" mo, za: ase' gyoo: zi nghoid. 4He: da" mougmyid tho' mo akhyeing" ashoeb da" - Mangsoo ga: da" yu satan phoo gi nyangnu" da" neig loem: ri mougcoid, yo' nghoeb too" byid: bye: yoomo nyangnu" aloem" ajeung" boem loo. myo, jed too" nhang" bye. Nyhang" gi Mangso da" veddu, gungdu nyang: nghoid nyid nghoid loug we' Khristu da" phung" yoeb da" khyoo:- hau: ngeibu: ludang: mo thu' lo da" bidbang ri amyang nhang: loo: nghoid da. 5Khasu" wim gari ngoonu" gi ngoonu" nya: khyoo: ri kho" kyo" zi anghoid. Yesu Khristu gi Aseing: nghoid nyid khyoo:- ngoonu" gi Yesu yoomo za: nanu" da" deizoo: yi nghoid da" khyoo: ri dakho" kyo" boem. 6Yesu khrsitu da" myonhoo: mo bang lo da" - Myo nhoo: phung" yoeb khyoo: nanu" se' loo baja"- yha" da" nheig loem: moo bidbang zhoo: byid: da" Mangsoo: gi Moug coid mo bidbang bang loo wa ga: wigi tid da" Mangsoo nyang: nghoid bye.
7Nghoid loug we' hau: athang agoin da" yoem: moo" so' moo" koem gi-ngoonu" jang" mo anghoid- Mangso jang" mo, nghoid nyid khyoo: ri yo" toin" shid baja" -He: Venyi soid gain yo" jo da- ngoonu" gi yu maya" moo zhoo" jhoem: yo" za: du nyid. 8Ngoonu" gi daso' so' kyi" kyeug yau: khe" khyoo: shau" boem.Nghoid loug we' thoung" mhoin' pyam zi shau" zi anghoid. Dalheung: lheung: vhu" gyam gyam zi shau" boem- nghoid loug we' nheigloem: thang byug boem zi anghoid. 9Ngoonu" ri gyi koid mo, myoo" sho' nyid boem- nghoid loug we' bidnoem dayug we' aboo loo- khanham we' anyid yu' boem, dalheung: lheung: noophyoo" gye" shau" boem- nghoid loug we' lhu: phyo' lhu: shoin, pyam zi anghoid. 10Aseing Yesu gi ngoonu" da" gungdu: moo dei loeb kangso' kaid byid: nyid ziri bang bang se' loo wa shid mo ngoonu" da" shid: se' da" gungdu: joem gi Yesu kham zo: lid loo bye: da- shid: gyoin noogyoin, kyi" khyeug jam jau khyoo: ri khanham we' kham zo: nyid boem. 11yesu da" kangso' dei nyid khyoo: gi ngoonu" da" shid: se' gungdu: moo bang thu' loo baja"- Ngoonu" nya: kangso' dei nyid bidnyid gu: moo ayo, khang" moo" Yesu shid re" shid: kham: wa khyoo: moo so" lo" nyid boem zi nghoid. 12He: zigi ngoonu" jang" moo shid: loo" no lo" da" tarha" gi moo" zei: nyid zi nghoid. Nghoid loug we' nanu" jang" moo koem gi kangso' dei da" tarha" gi moo" zei: nyid.
13Jhoem: mungdang: moo Ngoo loem" jeung" yoomo ngoo kho" kyo" ga: wigi tid nyid ziyo' dakhyoo" ti"- ngoonu" we' loem:" jeung" yoomo kho" kyo" zi nghoid. 14Aseing Yesu ri - shid: jang" mo doem dei to'' loo nhang" da" Mangsoo gi ngoonu" ri we' Aseing: yesu yo' dage" doem dei to'' loo nhang: wa zi nghoid yoomo nanu" yo' dage" nya: shid khoin" moo shu" yu wa zi nghoid ziri ngoonu" se' nyid boem. 15He: da" khyoo" dangain" gi nanu" moo akyu" ara: bo loo wa shid mo nghoid bye. Mangso da" jeju" ri kham: yu da" byu yi we' je" je myo: lo ziyo' dakhyoo" ti"- Aseing: da" myonhoo: phung" yoeb ri jeju" boin: coung" nghei - akyu" mho' da" khyoo: joem moo we' je" wigi myo, tham: loo wa zi nghoid.
Loem" Jeung" Ziyo' Kangso' Dei Khyoo:
16He: da" khyoo: joem yoomo ngoonu" gi khanham we' nheung loem: ayoin"- yoem: agyau: boem. Ngoonu" da" nghizain shoid khyo" yo' shau" myang nyid da" xangsu alhoo: gi yen, yen, za: byo, yoin" lo" nyid bye Nghoid loug we' akhoug: mo Venyi alhoo: gi nyid: khang" moo"- Aseig doem soin' nyeung byid: nyid ziri yo" shau" kham: yu nyid boem. 17Hau: lho: ngoonu" daso' dadam thoung" shau" nyid da gyoug dain phoo: dajhi' dathang: gi je" gyi: ziyo' apyaid atoo: mo myonhoo: phung" yoeb ri kham: yu nhang: wa zi nghoid nyid. 18Ngoonu" gi myo, jid" yo' yu" myang ja" - zi ri za: vhoo: bo nyid zi anghoid loo: za: myo, jed" amyang: ja: ri she- dayu" whoo: bo nyid boem. Khasu" wim gari myojid" myang nyid da" zijoem gi daso' dadam za: jo lho: myo jid" ayo" myang ja: gi apyaid atoo: moo dageung: jo, jo.
Currently Selected:
2~KORINTHU 4: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.