SAAM HLABU 5
5
Himnak Hrang Thlacamnak #David Ih Phuahmi Hla
1Maw Bawipa, ka ṭongmi hi
ngai hram awla,
Ka hui ka aihramnak hi thei
hram aw.
2Ka Siangpahrang le ka Pathian,
Bomnak dil ih ka au-nak hi
I ngaisak hram aw.
Maw Bawipa, na hnenah
thla ka cam,
3Zingtin ka thlacamnak cu na thei,
Ni a suah tikah ka thuhla cu
na hnenah ka thlenter;
Cule na thulehnak hngak in ka um.
4Sual tuahnak ah lungawitu Pathian
na si lo;
ṭhat lonak cu na hnenah
na umter lo.
5Mi tluangkhawng pawl cu na hmu
thei lo;
Mi ṭha lo hmuahhmuah na hua a si.
6Thuphan pertu hmuahhmuah
na siatsuah ih,
Thisen suah hiartu le mibum hmang
pawl cu na fih hai.
7Sikhalsehla a hmunmi
na duhdawtnak a natsat ruangah,
Kei cu na inn sungah ka lut ding;
Na Biakinn thianghlim sungah
ka lo bia ding ih,
ṭihzahnak thawn na hmai ah
ka kun ding.
8Maw Bawipa, ka ral an tam
ngaingai,
Na duhmi tuah dingah i hruai aw.
Ka thlun theinak dingah na lamzin
tluangter aw.
9Ka ral pawl ih ṭongkam cu rintlak
a um hrimhrim lo;
Mi siatsuah lawng an duh.
An kaa cu thlaanka ong-aw vek a si,
An lei cu a naalzet ih mibum
a thiam ngaingai.
10Maw Bawipa, annih pawl cu
hnong awla hrem hai aw.
An khawkhannak ṭha lo cu
an tluknak ah canter aw.
An sualnak a tam ruangah le
Nangmah an lo dodal ruangah
Na umnak ihsin hlon suak hai aw.
11Na hnenih himnak a tongtu cu
an lung a awi ding,
Lungawi in hla an sak ringring
ding.
A lo duhdawtu cu na hum hai a si.
Nangmah ih ruangah annih cu
mi lungawi taktak an si.
12Maw Bawipa, mi ding pawl
cu na thlawsuah hai ih,
Na zaangfahnak thawn phaw bangin
na hum a si.
Currently Selected:
SAAM HLABU 5: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
