SAAM HLABU 18
18
David Ih Sakmi Nehnak Hla #Pathian Hnenah David Ih Sakmi Hla
(2 Sam 22.1-51)
1Maw Bawipa, ziangtluk in so
ka lo duh!
Nang cu ka cahnak na si.
2 Bawipa cu ka lungpi,
ka ralhruang le i runtu a si.
Ka Pathian cu ka beunak lungpi,
ka ralphaw le ka rundam cahnak
a si;
Amah sungah cun ka him.
3Thangṭhat tlak Bawipa cu
ka ko ih,
Ka ral pawl kut sung ihsin
i luatter.
4Thihnak hrihrual in i ngerh ih
Siatnak tilian in i khuh.
5Sheol hridai in i awk ih
Thlaan in thang i kam.
6Harsat ka ton laiah Bawipa cu
ka ko;
I bawm dingah ka Pathian cu
ka ko a si.
A biakinn ihsin ka aw a thei;
Ka aunak aw a hna sungah a lut.
7Pathian a thin a heng ruangah
Leilung cu a hnin ih a thir,
Tlang pawl ih hram ṭoh-nak tla cu
An khur ih an ṭhia thlohthlo.
8A hnarkua in meikhu a suak ih,
A kaa ihsin meihlio le meivam
a suak zukzo.
9Van a caihkuur ih a rung ṭum,
Khawdur sahzet a ke hnuai ah a um.
10Cherub parah to in a rung zam;
Thli ih thla parah to in zamrang
tein a ra.
11Khawthim in a tuam aw;
Tidai in a khatmi mero sahzet
a kimvel ah a um.
12A hmaiih nimthlakau tle sungin
Rial le meivam an rung tla ih
Khawdur sahzet cu a run pah suak.
13Cule Bawipa cu van ihsin
khawri bangin a ri durdo;
Cungnungbik in a aw a suah.
14A conkiang a sai ih a ral pawl
a ṭhio ṭheh;
A nimthla a kauter ih a tlanter
ṭheh hai a si.
15Maw Bawipa, na thinheng in
na ral pawl na kawk ih
na huuk ciamco tikah cun,
Tipi thuanthum ih tawne a lang ih
Leilung ih hramṭohnak tla
an lang ṭheh a si.
16 Bawipa in tlun ih van ihsin
i run dawh ih i run kai;
Tithukpi sung ihsin i dirh suak.
17A cakzetmi ka ral pawl ih kut
sungin i suah;
I huatu le ka hrangih a cak
tukmi kut sungin.
18Ka vanduai ni ah annih in in do;
Asinain Bawipa in i hum.
19Ṭihphannak ihsin himnak hmun
kaupi ah i suah;
Ka parih a lung a awi ruangah
i run.
20A dikmi ka tuah ruangah
Bawipa in laksawng i pek;
Ka kut a thianhlim vekin
i lehrul a si.
21 Bawipa ih lamzin cu ka zawh;
Ka Pathian hnen ihsin hlothlau
zetin ka tlansuak dah lo.
22A daan hmuahhmuah ka hmai ah
an um ringring ih,
A thupekmi pakhatte hman
ka hnong dah lo.
23A hmaiah mawh nei lo ka si ih
Sual phuhrunawknak ihsin
hlimphirte in ka um zo.
24Dingfelte ih ka um ruangah
laksawng i pek;
A mithmuh ih ka kut a thianhlim
vekin i lehrul a si.
25Maw Bawipa, rintlakmi hnenah
rintlak in na lang ih,
Mawh neilo mi hnenah mawh nei
lo in na lang.
26Mi thianghlim hnenah thianghlim
in na lang,
Sikhalsehla mi khermei hrangah
cun na khermei ve a si.
27Mi tangdor pawl cu na run suak
ṭheu,
Asinain mi hngal pawl cu na nam
thlak a si.
28Maw Bawipa, nangmah in
ka mei-inn na vang ih,
Ka Pathian, nangmah in ka thimnak
tla na tleuter.
29Ka ral pawl do theinak ah le
An ṭannak hruang pawl lan thei
nakah thazaang ṭha i pek.
30Hi Pathian ih lamzin cu
a famkim a si;
Bawipa ih thutiamnak cu
rintlak a si!
A hnenih beunak a hawltu hrangah
Amah cu ralphaw a si.
31 Bawipa siar lo Pathian dang
zoso a um?
Kan Pathian hlei ah lungpi dang
a um mawsi?
32Amah cu i caktertu Pathian
a si ih,
Ka lamzin khalah himnak a umter.
33Zukneng bangin ka ke zuan
a zaangter ih,
A saannak hmun ah himte in i umter.
34Dar ih tuahmi li hman nawp
thei dingah,
Amah in ral do i zirh a si.
35Maw Bawipa, nangmah in na
rundamnak phaw i pek;
Na vorhlam kut in i kaifek ih,
Na nunneemnak in i tumlianter.
36Ka fehnak lamzin na kauter ih,
Ka rilbah dah lo.
37Ka ral pawl ka dawi ih ka man
hai a si;
Ka siatsuah ṭheh hlan lo
ka kir lo.
38Ka saat hai ih an tho thei
nawn lo;
Ka kehram ah an ril.
39Nangmah in hi raldonak ah
thazaang i pek ih,
Ka ral pawl cu ka hnuai ah
an tlu ṭheh.
40Ka hnen ihsin ka ral pawl cu
na tlanter ih,
I huatu hmuahhmuah ka siatsuah
ṭheh a si.
41Bomnak dil in an au,
Asinain zohman in an run hai lo.
Bawipa ih hnenah an au,
Asinain a sawn hai lo.
42Ka deengcip vivo hai ih,
Thli ih semmi leivut vekah an cang.
Ka palcih vivo hai ih,
Lamzin ih ciarbek vekah an cang.
43Dodal hmang miphun sung in
i run ih,
Miphun tampi uktu ah i tuah.
Ka theih dah lomi pawl cu
i riantu ah an cang.
44Ka thuhla an theih cun ka thu
an thlun;
Ramdang mi tla ka hmaiah kun in
an ra.
45Annih tla cu an thin a phang ih
An ralhruang sung ihsin ṭhia
thlohthlo in an ra suak.
46 Bawipa cu a nung a si!
Ka ṭannak lungpi cu thangṭhat
si ko seh.
Ka rundamnak Pathian cu hlorh in
um seh.
47Phuba i laksaktu amah a si ih,
Mi hmuahhmuah ka ke thuaiah a ret.
48I raltu pawl ih kut ihsin
i runsuak.
Maw Bawipa, ka ral pawl ih
tlunah i khaisaang;
Mi suaksual pawl lakin i runsuak.
49Curuangah maw Bawipa, miphun
tampi lakah ka lo lawm ding;
Na hmin thangṭhatnak hla in
ka sak ding.
50Pathian in a siangpahrang
hnenah nehnak tumpi a pek;
Hriak a culh zomi David le
a tesinfa hnenah kumkhua in
A hmunmi a duhdawtnak cu
A langter ringring a si.
Currently Selected:
SAAM HLABU 18: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
