SAAM HLABU 17
17
Hremtu Kut Ihsin Luatnak Hrang Thlacam #David Ih Thlacamnak
1Maw Bawipa, dingfelnak hrangih
Ka thlacamnak hi ngai hram aw.
Bomnak dil ih ka aunak cu ruat
hram aw.
Ka thlacamnak cu thei hram aw;
Bum hmang lo ka hmurka ih thla
ka camnak hi!
2Thudik na theih ruangah
Keimah ṭan in thu na ṭhen ko ding.
3Nangmah in ka thinlung na thei;
Zan ah i rung veh ih,
I hlathlai thluh hmanah,
ka sungah ṭhat lonak zianghman
na hmu lo.
Ka hmurka in ṭongsia ka ṭong lo.
4Midang ih tuah vek cun ka tuah lo,
Na thukham ka thlun ih
Mi nunsia pawl ih lamzin
ka thlun lo.
5Na lamzin ah ka feh ringring ih
Ziangtik hmanah ka bah dah lo.
6Maw Pathian, thla ka cam tikah
Nang cun i run let ringring.
Atu khalah na hna i tun awla
Ka thu hi i theihsak aw.
7Maw in Runtu, na duhdawtnak
mangbangza cu run langter hram aw.
Na kiangih a um hmuahhmuah cu
ral pawl ih kut in an him a si.
8Na mitmu na kilven vekin i kilveng
hram aw;
Na thladem thuaiah i thup hram aw;
9Mi ṭha lo pawl in in do ih,
Mithah hiar ka ral pawl in
in kulh ṭheh a si.
10Zaangfahnak zianghman nei loin,
Puarthau zetin an ṭong.
11Ka fehnak kip in zawt ih in
kulh ṭheh,
Dirthlu dingah caan ṭha lawng
an bawh.
12Kiosa vek an si ih bauhthlek
thluh lawng in tum.
Kiosa no vekin an kua ihsin in
bawh a si.
13Maw Bawipa, tho awla ka ral
pawl cu do in neh hai aw.
Ka nunnak hi mi ṭha lo pawl kut
ihsin na ralnam thawn i hum aw.
14Maw Bawipa, na ban thacak in
i hum hram aw,
Leitlun covo lawng a neimi pawl
kut sung ihsin.
An hrangih na khawl ciami hremnak
in hrem hai aw,
An faale hrangah hremnak um sehla,
An tesinfa pawl hrang tla ah
taang hrih seh.
15Asinain kei cun dingnak thawn
na hmai ka hmu ding;
Ka ṭhangharh tikah na mithmai
ka hmu ding ih,
Ka lungawinak a kim ding.
Currently Selected:
SAAM HLABU 17: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
