MIPUM SIARNAK 29
29
Kum Thar Puai ih Thawinak
(Pui 23.23-25)
1Thla sarihnak#29.1 Thla sarihnak: timi hi Hebru ṭong in Tishri a si lole Ethanim an ti ih September thlahrek le October thlahrek a ceem. ni hmaisa bik ni ah pumkhawmnak thianghlim nan nei pei ih hna zianghman nan ṭuan lo pei. Cuih ni ah tawtawrawt nan tum pei. 2Bawipa ih hnenah rimthaw mei-ur thawinak nan pek pei: raitluan cawcangte pakhat, tuucang pakhat, le kum khat ti tuucangte pasarih, an si pei. 3Olif siti thawn rawimi sangphut in thlairawl thawinak felzetin nan tuah pei. Cawcang hrangah sangphut reel khat le a tan, tuucang hrangah reel khat, 4kum khat ti tuucangte pakhat ah reel tan an si pei. 5Cuih tlunah sualthlah thawinak hrangah mecang pakhat nan pek pei ih cuticun misenpi thianhlimnak hrangah sualthlah thiannak nan tuah pei. 6Hi thawinak pawl cu thla thar ni hmaisa bikih mei-ur thawinak le thlairawl thawinak, nitin mei-ur thawinak le thlairawl thawinak le inmi thawinak pawl ih hlei ah nan pek pei. Hi rawlhun thawinak pawl cu Bawipa ih hrangah rimthaw an si.
Sualthlah Ni Ih Thawinak
(Pui 23.26-32)
7Thla sarih thla, ni hra ni ah Pathian biak dingah nan pumkhawm pei. Rawl nan ei lo pei, hna khal nan ṭuan lo pei. 8Bawipa ih hnenah rimthawmi mei-ur thawinak pek uh: cawcangte pakhat, tuucang pakhat le kum khat ti tuucangte pasarih, an zatein raitluan an si pei. 9Olif siti thawn rawimi sangphut in thlairawl thawinak felzetin nan pek pei: cawcang pakhat hrangah sangphut reel khat le a tan, tuucang hrangah reel khat, 10kum khat ti tuucangte hrangah reel tan a si pei. 11Cule misenpi thianhlimnak hrangih sualthlah thiannak, nitin mei-ur thawinak, thlairawl thawinak le inmi thawinak pawl ih hlei ah sualthlah thawinak hrangah mecang pakhat nan pek pei.
Rawllak Puai ih Thawinak
(Pui 23.33-44)
12Thla sarih, ni hleinga ni ah pumkhawmnak thianghlim nan nei pei. Bawipa sunloihnak ah hi puai cu ni sarih sung nan tuah pei ih hna zianghman nan ṭuan lo pei. 13Hi puai ni hmaisa bik ni ah Bawipa ih hnenah meisa thawn rawlhun thawinak rimthaw nan pek pei: cawcangno hlei thum, tuucang pahnih, le kum khat ti tuucangte hleili, an zatein raitluan an si pei. 14Olif siti thawn rawimi thlairawl thawinak cu feltein nan tuah pei: cawcang pakhat hrangah sangphut reel khat le a tan, tuucang pakhat hrangah reel khat, 15kum khat ti tuucangte pakhat hrangah reel tan le inmi thawinak pawl nan pek pei. 16Cuih tlunah sualthlah thawinak hrangah mecang pakhat nan pek pei. Hi thawinak pawl cu nitin mei-ur thawinak le thlairawl thawinak le inmi thawinak hlei ih pekmi an si pei.
17Ni hnihnak ni ah cawcangno hleihnih, tuucang pahnih le kum khat ti tuucangte hleili nan pek pei. An zatein raitluan an si pei. 18Cule thlairawl thawinak le inmi thawinak tla cawcang hrang, tuucang hrang le tuucangte hrangah a zat an khiah cia vekin nan pek cih pei. 19Cuih tlunah nitin nan pekmi mei-ur thawinak, thlairawl thawinak le inmi thawinak pawl cu sualthlah thawinak hrangih mecang pakhat nan pekmi thawn nan pek cih pei.
20Ni thumnak ni ah cawcangno hleikhat, tuucang pahnih le kum khat ti tuucangte hleili nan pek pei. An zatein raitluan an si pei. 21Cule thlairawl thawinak le inmi thawinak tla cawcang hrang, tuucang hrang le tuucangte hrangah a zat an khiah cia vekin nan pek cih pei. 22Cuih tlunah nitin nan pekmi mei-ur thawinak, thlairawl thawinak le inmi thawinak pawl cu sualthlah thawinak hrangih mecang pakhat nan pekmi thawn nan pek cih pei.
23Ni linak ni ah cawcangno pahra, tuucang pahnih le kum khat ti tuucangte hleili nan pek pei. An zatein raitluan an si pei. 24Cule thlairawl thawinak le inmi thawinak tla cawcang hrang, tuucang hrang le tuucangte hrangah a zat an khiah cia vekin nan pek cih pei. 25Cuih tlunah nitin nan pekmi mei-ur thawinak, thlairawl thawinak le inmi thawinak pawl cu sualthlah thawinak hrangih mecang pakhat nan pekmi thawn nan pek cih pei.
26Ni nganak ni ah cawcangno pakua, tuucang pahnih le kum khat ti tuucangte hleili nan pek pei. An zatein raitluan an si pei. 27-28Himi thawn hmun khatah ni khatnak ni ih nan pekmi thawinak dang pawl khal a zatein nan pek cih pei.
29Ni ruknak ni ah cawcangno pariat, tuucang pahnih le kum khat ti tuucangte hleili nan pek pei. An zatein raitluan an si pei. 30-31Himi thawn hmun khatah ni khatnak ni ih nan pekmi thawinak dang pawl khal a zatein nan pek cih pei.
32Ni sarihnak ni ah cawcangno pasarih, tuucang pahnih le kum khat ti tuucangte hleili nan pek pei. An zatein raitluan an si pei. 33-34Himi thawn hmun khatah ni khatnak ni ih nan pekmi thawinak dang pawl khal a zatein nan pek cih pei.
35Ni riatnak ni ah pumkhawm thianghlim nan tuah pei ih hna zianghman nan ṭuan lo pei. 36Bawipa ih hnenah mei-ur thawinakih pekmi thlairawl thawinak rimthawmi cu nan pek pei: cawcangno pakhat, tuucang pakhat le kum khat ti tuucangte pasarih, an zatein raitluan nan pek pei. 37-38Himi thawn hmun khatah ni khatnak ni ih nan pekmi thawinak dang pawl khal a zatein nan pek cih pei.
39Hi thawinak pawl hmuahhmuah cu a tikcu ciarah Bawipa hnenah nan pek pei. Mei-ur thawinak pawl, thlairawl thawinak pawl, inmi thawinak pawl le sualthlah thawinak pawl cu nan pek thluh pei. Hi pawl cu nan thukam kimternakih pumpak ciarih pekmi thawinak, a si lole mah lungtho teih pekmi thawinak pawl hlei ih nan pekmi an si pei.
40Cuticun Bawipa ih thupekmi hmuahhmuah cu Moses in Israel misenpi hnenah a sim ṭheh.
Currently Selected:
MIPUM SIARNAK 29: FCL
Highlight
Copy
Compare
Share
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.
